The Definitive Guide to Living in the Capital , Cairo , Egypt

في الأول حسينا بحماس كبير لفيلم Bloodshot بمجرد الإعلان عنه، وده لإنه بيجمع بين “فين ديزل” وبين فكرة الأبطال الخارقين، لكن في الحقيقة بعد ما شوفنا الفيلم.. ما انبسطناش وهنقول لكم ليه.

فيلم Bloodshot بيحكي عن جندي أمريكي بيعيش حياة سعيدة مع مراته، وفي يوم من الأيام بيتعرض لحادثة هتكون سبب في وفاته هو ومراته، لكن بتقنيات وتكنولوجيا حديثة جدًا، بيتم استعادته تاني للحياة.. والهدف من ده هو تنفيذ مهام معينة، لكنه بيقرر ينتقم في نفس الوقت من اللي قتلوا مراته.

إحساسنا بالإحباط كان سببه “تريلر” الفيلم اللي حرق لنا قصة الفيلم بالكامل.. علشان كده بننصحكم لو عاوزين تشوفوا الفيلم بلاش تشوفوا الإعلان بتاعه.. ومش عارفين إزاي مخرج الفيلم “ديف ويلسون” وافق على إنه يعمل إعلان بيشرح تقريبًا كل حاجة في الفيلم بالشكل ده!

للأسف دي مش غلطة “ويلسون” الوحيدة، ففيلم Bloodshot هو تجربة الإخراج الأولى لـ “ويلسون” ويمكن علشان كده بالغ في استخدام تقنيات التصوير البطيء، وحاول يعالج كل ده في المونتاج.. لكن حتى المونتاج باظ منه، وحسينا في كتير من المشاهد إن فيه مشاكل في تقطيعها والانتقال منها لمشاهد تانية.

لكن من ناحية تانيه أداء “ديزل” التمثيلي كان جيد، والحقيقة إنه قدم لنا كل اللي متوقعينه منه، مشاهد حركة طول الوقت ومطاردات جيدة، لكن طبعًا مش بنتوقع الكتير من “فان ديزل” على صعيد الأداء الدرامي، لأنه ممثل أكشن بالمقام الأول.