The Definitive Guide to Living in the Capital , Cairo , Egypt

على الرغم من إننا بنحب الأفلام الرومانسية، ودي حاجة بيشاركنا فيها ناس كتير، إلا أننا زهقنا من تكرار أفكار قصص الأفلام الرومانسية باستمرار، علشان كدة عجبتنا فكرة فيلم Every Day اللي قرر صناعه مزج الفانتازيا بالرومانسية. فهل نجح الفيلم في هدفه؟

القصة

فيلم Every Day بيحكي عن كيان فانتازي بيصحى كل يوم علشان يلاقي نفسه في شخص مختلف. الكيان ده بيقع في حب بنت، الأمر اللي بيخليها كل يوم تقابل شخص مختلف وتقع في حبه بينما هو في النهاية نفس الكيان! هل  هتنجح قصة حب بالشكل الغريب ده؟

فريق العمل

الفيلم من إخراج  مايكل سوكزي، والمعالجة السينمائية لـ جيسي أندروز اقتباسًا عن رواية ديفيد ليفاثان، ومن بطولة جاستيس سميث، أوين تيج وانجويراي رايس وكولين فورد ويعقوب باتالون.

الأداء التمثيلي

الأداء التمثيلي لكل الأبطال كان جيد جدًا، خاصة إنجويراي رايس اللي قدرت تنقل لنا مشاعرها طوال الأحداث وشعورها المتواصل بالدهشة من وقوعها في الحب يوم بعد يوم مع أشخاص مختلفين بيجمعهم أن كلهم بيحركهم نفس الكيان. مش سهل أبدًا على الممثل أنه يقدم أداء متجدد ومستمر على مدار الأحداث بالشكل ده لكن رايس نجحت في مهمتها.

السيناريو والحوار والإخراج

سيناريو الفيلم سريع ومش ممل أطلاقًا، وتنفيذه على الشاشة كان رائع خاصة مع استغلال المخرج لإمكانيات أبطالة التمثيلية وقدراتهم المختلفة على القيام بأدوارهم بشكل ممتاز ومتناغم علشان يقدم في النهاية فيلم قوي ورومانسي مع نكهة من الفانتازيا في نفس الوقت.

الديكورات والموسيقى والأزياء

ديكورات الفيلم كانت جيدة وقوية واختيار أماكن التصوير كان أفضل، وبشكل عام الفيلم خلق جو وحالة من الحميمية في أحداثه تسربت لنفسية المشاهدين بسهولة وده شيء يحسب لكل العاملين على الفيلم قدرتهم على خلق الحالة دي عند المشاهدين.

الخلاصة

فيلم Every Day فيلم رومانسي خيالي مختلف وجميل وهيعجب أي حد عاوز يخرج بره إطار الأفلام الرومانسية التقليدية.

علشان تبقى عارف:

تقييم الفيلم على موقع IMDB وصل لـ 6 من 10.