The Definitive Guide to Living in the Capital , Cairo , Egypt

أفلام
Fast & Furious presents: Hobbs & Shaw

فيلم Fast & Furious presents: Hobbs & Shaw: أكشن ياخد العقل

furious اكشن عربيات فاست فيلم
  • إدريس إلباجيسون ستاثام...
  • إثارةحركة ومغامرات
  • ديفيد ليتش
تم التقييم بواسطة
Mohammed Sabry
قيم
قيم الآن
فيلم Fast & Furious presents: Hobbs & Shaw: أكشن ياخد العقل

طالما بنتكلم على واحد من سلسلة أفلام Fast & Furious، طبيعي ييجي في بالنا كمية الأكشن والضرب والعربيات المتكسرة في كل مكان. بس لما يكون الجزء ده من إخراج “ديفيد ليتش”، اللي قدم لنا Deadpool 2 وAtomic Blond، كده سقف التوقعات ارتفع لحتة تانية خالص.

في الفيلم بنشوف الجندي الخارق بريكستون “إدريس إلبا” من منظمة (إيتيون) الإرهابية، بيطارد هاتي شو “فانيسا كيربي”، علشان يسترجع منها فيروس مبرمج يقضي على البشرية. فبتلجأ السلطات للعميل لوك هوبز “ذا روك” وديكارد شو “جيسون ستيثام”، علشان يتصدوا لبريكستون وحلفائه.

طبعًا القصة مفيهاش أي حاجة ملفتة، شغل أطفال كعادة أفلام Fast. خطر بيهدد عدد كبير من الناس، والحل مش موجود غير عند أبطالنا. اللي مصير العالم دايمًا في إيديهم. لكن الملفت، برضو كعادة السلسلة، هو جرعة الأكشن والأدرينالين اللي بيقدمها كل فيلم. وده اللي دخلنا الفيلم علشانه.

“ذا روك” و”جيسون ستيثام” محافظين على مستواهم، عاملين على الشاشة دويتو أكتر من رائع. أكشن 10/10، كوميديا 10/10. كده الطبخة مظبوطة. ده غير ظهور مفاجيء لشخصيات معينة – مش هنحرقها – زود الضحك على الآخر.

“Look at me. Um black superman”

بجد “إدريس إلبا” هو سر حلاوة الفيلم ده. له طلة مميزة وقبول غير طبيعي. رغم إنه بيلعب دور الشرير، إلا إنك بتتبسط أول ما تشوفه. لابس الشخصية صح وعامل الدور بمزاج. حتى وانت شايفه بيضرب الأبطال، مش متضايق. من الآخر ماكنش في أي حد هيعمله أحسن منه. أما “فانيسا كيربي” فبعد دورها في فيلم Mission: Impossible – Fallout، بتأكد في الفيلم ده إنها نجمة أكشن على الطريق. وطبعًا ظهور “هيلين ميرين” كان جميل وخفيف.

مشاهد الأكشن كانت ولا أروع. “ديفيد ليتش” عودنا على تصميم المشاهد بشكل يشد العين، وبأفكار ماتخطرش على البال. حتى لو فيها شوية مبالغة، بنتفرج وإحنا منبهرين. ومواقع التصوير كانت أكتر من هايلة، خاصة المشاهد اللي اتصورت في “ساموا”. أول مرة نشوف شكل الجزيرة الجميل، والمناظر اللي فيها. صحيح الفيلم فيه شوية حاجات مش منطقية، زي الوقت اللي مر علشان ينقذوا هاتي ويسافروا ساموا ويستعدوا للمعركة، رغم إن الفيروس المفروض هيقتلها خلال 72 ساعة بس. أو مواجهة هوبز وشو الأخيرة ضد بريكستون، وإزاي اتغلبوا عليه. وغيرهم كتير. بس في النهاية، وإيه يعني؟ كده كده الفيلم حلو وإحنا انبسطنا. واستنوا لما الفيلم يخلص، علشان في مشاهد بعد تتر النهاية.

عجبك ؟ جرب

The Fate of the Furious - Furious 7

نصيحة 360

مش محتاج تتفرج على أفلام Fast & Furious علشان تشوف الفيلم ده

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح