The Definitive Guide to Living in the Capital , Cairo , Egypt

بنشوف طوال الوقت حالات كتيرة بتبين اختلاف رأي النقاد في فيلم معين، عن رأي المشاهدين في نفس الفيلم، وإزاي أفلام ممكن تنجح نقديًا بشكل كبير لكن تفشل جماهيريًا في تحقيق النجاح المطلوب، والعكس صحيح. لكن الوضع في فيلم Gotti اللي بيحكي عن قصة زعيم المافيا الشهير (جون جوتي) واللي بيقوم بدوره جون ترافولتا، الوضع في الفيلم ده كان رأي الجمهور والنقاد على طرفي نقيض. بعض النقاد مش عاجبهم الفيلم إطلاقًا، والبعض من الجمهور عاجبه الفيلم جدًا!

السبب في ده كان السيناريو الخاص بـ Gotti واللي حسينا أنه بينصف جون جوتي، ودايمًا النوع ده من الإنصاف بيعجب الجمهور علشان بيحب يشوف الشرير في صورة الشخص اللي شره له مبررات وأثار جانبية إيجابية، لكن من ناحية تانية النقاد شافوا الفيلم كمشجع للجريمة أو محاولة لغسل يد (جون) من عمليات كتير قذرة قام بيها.

وعلى الرغم من أن بطولة الفيلم من نصيب ممثل ضخم زي جون ترافولتا، واحد من الفنانين اللي قدم الرقص والتمثيل وقام بأدوار رومانسية وأكشن قوية جدًا، ولا يمكن ننسى أدواره في أفلام حازت على شهرة واسعة جدا زي Face Off و رائعة المخرج كوانتن ترانتينو pulp fiction من أنتاج 1994 وغيرها من الأعمال السينمائية والمسلسلات، على الرغم من التاريخ القوي لترافولتا في التمثيل إلا أن أداؤه في Gotti كان ضعيف وغير واضح الملامح، وأثر المكياج المبالغ فيه على أداء ترافولتا للشخصية بشكل واضح.

من ناحية تانية أثار أعجابنا مونتاج الفيلم والتنقل بين مشاهد أخبار (جون) في افتتاحية ونهاية الفيلم وعجبنا أن المونتاج بالشكل ده أدخلنا في صميم الأحداث وربط بين الأحداث الحقيقة وأحداث الفيلم. كمان الموسيقى التصويرية والديكورات لعبت دور مهم علشان يخرج الفيلم في النهاية بصورته النهائية القوية نسبيًا.

باختصار… فيلم Gotti فيلم عادي، لكن كان ممكن يكون أفضل لو كان تم الاهتمام بالسيناريو أكتر من كده، ولو كان تم الأهتمام بإسناد دور البطولة لفنان قادر على أنه يقدم أداء أفضل مش مجرد الاهتمام بالشكل الخارجي وأسم الممثل الكبير ونسيان الأداء التمثيلي نفسه.

علشان تبقى عارف: تقييم الفيلم على موقع IMDB وصل لـ 4.8 من 10.