The Definitive Guide to Living in the Capital , Cairo , Egypt

زمان وإحنا صغيرين كان دايمًا أهلنا بيحذرونا من اللعب بالنار، لكن واضح إن صناع فيلم Playing with Fire ماكانوش بيسمعوا الكلام.

فيلم Playing with Fire بيحكي عن مجموعة شباب من فرقة إنقاذ ومكافحة الحرائق، آه صحيح مهنة صعبة وشاقة ومحتاجه قوة وتركيز، لكن الدنيا هتبوظ منهم لما يكون مطلوب منهم  يحموا مجموعة من الأطفال والمراهقين.

مفهوم طبعًا إن الكوميديا في الفيلم قائمة على التناقض بين شخصية رجال الأطفاء الجادة، وبين مهمتهم والمواقف الكوميدية اللي بتحصل، ويمكن من هنا كان اختيار “جون سينا” المصارع الشهير في دور البطولة علشان بنيته الجسدية وملامحه الجادة، لكن ومع ذلك “جون سينا” معرفش يقدم الجزء الكوميدي من الشخصية بشكل كويس، وده حسينا بيه من أول مشهد ولحد نهاية الفيلم.

الطفل “كريستيان كونفيري” قدم أداء جيد في شخصية “ويل” و”فينلي سلاتر” في دور “زوي” وبصراحة الاتنين قدروا يقدموا أدوار جيدة جدًا ومتناسبة مع أعمارهم وبنتوقع إن يكون لهم أدوار كبيرة في المستقبل.

أومال المشكلة كانت في إيه؟ المشكلة كانت في سيناريو الفيلم اللي حب يلعب على المضمون وخد “الجانب الآمن” أو الـ Safe side وبالتالي قدم كوميديا تقليدية، بدون ما يجرب يقدم مواقف جديدة أو حتى إيفيهات مختلفة علشان يعمل كوميديا من بره الصندوق، وبالتالي الفيلم كله يعتبر من الأفلام الكوميدية التقليدية.