لو حسيت أن الدنيا ضاقت بيك، ومافيش طريق بديل ومريح غير اللي أنت فيه، فيلم Second Act بيقدم لكم تجربة عن تغيير شكل حياتكم.
الفيلم بيحكي عن مايا “جينفر لوبيز”، اللي بتشتغل في أحد الشركات. بتقابل كتير من الصعوبات وحاسة أنها عايشة حياة مش حياتها. لكن عند مرحلة معينة بتقرر أنها تعيد بناء حياتها من جديد، بالشكل اللي تحبه.
المميز في الفيلم أنه يصلح للمشاهدة كفيلم كوميدي عادي، أو كقصة ملهمة، عن عدم الاستسلام لليأس وتغيير شكل الحياة بالكامل.
“جينفر لوبيز” واحدة من الممثلات اللي قدرت تثبت نفسها بقوة في عالم السينما. وهي من رائدات مدرسة السهل الممتنع في الأداء. قدرت تقدم أداء كوميدي جيد، بدون ماتفقد تركيزها على باقي رسائل الفيلم. وبيشاركها البطولة ميلو فينتميلي، فانيسا هادجنز، ليا ريميني.
من الجميل كمان في الفيلم اختيار أماكن التصوير والديكورات. اللي عكست إنتاج ضخم، واهتمام إخراجي بكل التفاصيل. اللي بتصب في النهاية لمصلحة الفيلم والمشاهدين.
الفيلم مش أحسن عمل كوميدي أو إنساني بنشوفه. لكنه محاولة جيدة وتستحق التشجيع والمشاهدة. بنرشحه للمشاهدة لو عاوز تتحمس على خطوة جديدة تغير حياتك.