The Definitive Guide to Living in the Capital , Cairo , Egypt

  • باتريك ويلسونفيرا فارميجا...
  • حركة ومغامرات
  • جوم كوليت
  • في1 Cinema
تم التقييم بواسطة
Mohammed Sabry
قيم
قيم الآن
فيلم The Commuter: ليام نيسون وهو بيلعب ليام نيسون

بالرغم من مشاركته في أفلام ضخمة زي (Gangs of New York – 2002) أو (Batman Begins – 2005)، إلا إن النجم “ليام نيسون” اتشهر بدوره في فيلم (Taken – 2008). وخصوصًا جملته المشهورة “I will look for you, I will find you, and I will kill you”. ومن ساعتها بقى هو مثال الشخص المناسب، المُدرب باحتراف، اللي يقدر يقوم بأي مهمة غيره مايقدرش عليها. بس هل The Commuter قدم جديد؟ خلينا نشوف.

الفيلم بيدور عن مايكل ماكولي (ليام نيسون) – شرطي سابق، وحاليًا موظف شركة تأمين بقاله 10 سنين –  اللي عايش حياة روتينية عادية، لحد ما الشركة في يوم تقرر تستغنى عن خدماته وتفصله. في اليوم ده بيركب القطر زي ما هو متعود كل يوم علشان يروح بيته، وبيقابل واحدة غريبة، بيدور بينهم حوار قصير. وبتطلب منه يتعرف على شخص اسمه “بريم” راكب القطر، مقابل مبلغ مالي كبير. وبدون ما يعرف السبب. وعلشان ينفذ المطلوب، بتهدده بسلامة عائلته. ومن هنا بيبدأ البطل يدور على شخص هو مايعرفوش. وتبدأ تساؤلاتنا مين هو الشخص؟ عايزين منه إيه؟ وإزاي قدروا يوصلوا لعائلة مايكل ويهددوه؟

 

مانقدرش ننكر جو الإثارة اللي بيعيشك فيه الفيلم. وإزاي البطل بيراقب كل ركاب القطر، اللي منهم يحسسك إنه الشخص المطلوب، وبعدين تستبعده وتشك في غيره. وتفضل في حالة ترقب للنهاية. وكمان مشاهد الأكشن والقتال اللي قدمها المخرج (جوم كوليت سيرا) بطريقة الـ one shot، خلت للفيلم طعم تاني. ونضيف على ده إن الأحداث كلها بتحصل على القطر بس، مش في أماكن مختلفة. وده بيزود الإثارة في إن الشخص المطلوب ممكن يكون جنبك وانت مش عارف.

لكن الصراحة ماشوفناش حاجة مختلفة من (ليام نيسون). وزي ما اتعودنا من أفلامه: شخص في حاله، عنده مهارات قتالية عالية، بتحصل مشكلة كبيرة، هو اللي بيحلها بقدراته ومهاراته وذكائه، خلص الفيلم وتوتة توتة. نفس اللي شوفناه في Non-Stop، وRun All Night، وA Walk among the Tombstones. هو هو ليام نيسون بيلعب نفس الشخصية، بس مرة محقق خاص، مرة شرطي سابق، مرة ضابط جوي، ومرة جاسوس سابق. المهم بتبقى كلها وظائف الخلفية بتاعتها إنه شخص مدرب على أساليب القتال باحتراف.

وكمان فكرة إن شخص عنده 60 سنة – زي ما قال في الفيلم -، وبقاله 10 سنين بعيد عن عمل الشرطة واستخدام الأسلحة. فجأة يتحول لمقاتل محترف لما يتحط في مواجهة مع حد تاني، ماكانتش مبلوعة شوية.

النجمة (فيرا فارميجا) اللي لعبت دور جوانا، عملت دور قوي ومؤثر رغم وقتها القليل على الشاشة. في دقايق من حوارها مع (ليام نيسون) قدرت توترك وتوصلك إحساس بالقلق من الشخصية اللي بتتكلم قدامك. اللي كلامها لوحده قلب كيان البطل. أما الضابط أليكس مورفي (باتريك ويلسن) فرغم إن دوره مهم وبيأثر في سير الأحداث بشكل كبير. إلا إن أداؤه ماكنش أحسن حاجة. ونسيناه مجرد ما الفيلم خلص.

لو انتوا بتحبوا (ليام نيسون) زي ما هو كده، الشخص المناسب وقت الخطر، الفيلم أكيد هيعجبكم. وبعدين معلش يعني ده هو الراجل اللي قلب الدنيا علشان بنته، ورجعها في يومين بس، لما اتخطفت في Taken. يعني مش أي حد.

عجبك ؟ جرب

 Non-Stop  – A Walk among the Tombstones

نصيحة 360

الفيلم ده رابع تعاون بين (ليام نيسون) والمخرج (جوم كوليت سيرا) بعد: Unknown – Non-Stop – Run All Night

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح