The Definitive Guide to Living in the Capital , Cairo , Egypt

من أحلى الحاجات اللي ممكن يعملها المخرج، أن يكون له بصمة في كل أعماله، بحيث لما تشوف الفيلم تقدر تستنتج اسم المخرج بدون ما تشوف معلومات عن الفيلم. في مصر عندنا يوسف شاهين، وداوود عبد السيد وعاطف الطيب، اللي ممكن نقول أن لهم بصمة مميزة -وغيرهم كتير طبعًا- ولما شوفنا The Northman ما بذلناش مجهود كبير علشان نعرف أن المخرج هو  روبرت إيجرز.

The Northman بيحكي عن (أملث) اللي قام بدوره ألكسندر سكارسجارد. الإبن المدلل لواحد من ملوك الفايكنج في أيسلندا. واللي بتتقلب حياته رأسًا على عقب لما بيغدر عمه بأبوه، ويحتل مملكته، وياخد زوجته – أم (أملث)- أسيرة عنده. وبيلاقي أملث نفسه مُطارد ومشحون برغبة لا تنتهي في الانتقام.

ربما تكون الحبكة مكررة وشوفناها في أفلام كتير، وفي تعليق كوميدي قريناه على تويتر بيقول صاحبه: “الفيلم هو إعادة تقديم لقصة الكارتون الشهير The lion king”. والحقيقة أن التعليق رغم أنه كوميدي لكن صح بنسبة كبيرة. تيمة الانتقام واحدة من أقدم تيمات الأعمال الفنية على الاطلاق. لكن تناول المخرج والمؤلف روبرت إيجرز هو اللي أعطى الفيلم الزخم والأهمية الخاصة بيه.

روبرت -كعادته- خلط بين الأسطورة والواقع، في مشاهد غاية في الصعوبة والاتقان. وقدر يجسد معاني مُجردة زي الحقد، الغضب، الشهوة، الحيرة، لمشاهد بصرية ممتعة جدًا ومتعوب عليها. كل ده مع وحدة ألوان بتسيطر على معظم المشاهد تقريباً، وبتفكرنا بأجواء فيلم The Witch أو The Lighthouse اللي أخرجهم إيجرز سنة 2015 و 2019 على الترتيب. وكانت حاجه عظيمة أننا نشوف مُخرج مهتم يعمل لغة بصرية واحدة في كل أعماله تقريبًا. علشان يدخل المُشاهد بصريًا في الأحداث.

مشكلة The Northman كانت في الوقت اللي بيخرج فيه روبرت إيجرز من عالمه الخاص، ويبدأ في تقديم اللي بيحبه الجمهور التجاري البسيط المباشر: قصة انتقام في عالم الفايكنجز.. ساعتها حسينا أنه كان بيقدم مشاهد الأكشن والصراع النفسي كقربان للمشاهدين العاديين علشان يتفرغ للمشاهدين اللي عاوزين الفلسفة من ورا الأحداث. بالتالي كان الربع الأخير من الفيلم مش بنفس جودة باقي الأحداث. خاصة لما حسينا أن المونتاج شال كتير من زمن الفيلم علشان يكون صالح للعرض التجاري. ولم يشفع لإيجرز أنه استعان بأبطال بحجم نيكول كيدمان وويليم دافو وأنيا تايلور جوي وغيرهم. واللي قدموا أدوار أكتر من رائعة وموظفة بشكل ممتاز مع بنيتهم الجسدية والإنسانية.

هتحبوا The Northman لو كنتم من اللي بيحبوا الأعمال الفلسفية الغير مباشرة. وماعندكمش مشكلة مع مشاهد أكشن صعبة ودموية جدًا. وهتشوفوا أن الفيلم من أحلى أفلام 2022 ومبذول فيه مجهود عبقري.

أما لو كل هدفكم مشاهدة قصة انتقام تقليدية في عصور ما قبل التاريخ بدون (حوارات) كتير. هتشوفوا The Northman واحد من أسوأ الأفلام في التاريخ. لأن النوعية دي من الأعمال مافيهاش حلول وسط. يا تحبها بجنون.. يا تكرهها بجنون برضه!