The Definitive Guide to Living in the Capital , Cairo , Egypt

الأفلام العربية الرومانسية بيكون لها اهتمام خاص عندنا. يمكن لأننا مش بنشوف اللون ده في أفلام كتير في الفترة الأخيرة مع سيطرة أفلام الأكشن والكوميديا على الساحة.

الفيلم بيحكي عن يوسف “أحمد حاتم” اللي بتحطه الظروف في علاقة مع جميلة “هنا الزاهد”. ونبدأ نشوف مجموعة من المشاكل والمعوقات اللي بتواجه قصة الحب دي. وأزاي ممكن يتصدى أبطالها للظروف الصعبة اللي بتواجههم.

أحمد حاتم قدر يقدم أداء جيد جدًا. خلانا نحس أننا أمام ممثل قادر يطور من أدواته، وطرق توصيل مشاعره للمشاهدين. هنا الزاهد كمان بدأت تطور من نفسها. لكن في رأينا محتاجه شغل أكتر على أدواتها التمثيلية، علشان نقدر نحس بيها ونتعاطف معاها.

تصميم المشاهد والكادرات كان من أحلى الحاجات اللي شوفناها في الفيلم. كل لقطة كان فيها اهتمام بعنصر التصوير والجمال ودقة الألوان. وبشكل عام التجربة البصرية في الفيلم بالكامل كانت مميزة وتستحق التحية.

فترة طويلة مرت على مشاهدتنا لفيلم رومانسي خفيف قادر على إنه يجذب اهتمامنا. (قصة حب) بيحاول يتمرد على الأشكال التقليدية للأفلام الرومانسية. ويقدم فكرة جديدة من حيث القصة والأحداث، وطريقة تناولها بشكل مختلف.