The Definitive Guide to Living in the Capital , Cairo , Egypt

الصراحة إحنا بـ نحب الأفلام اللى بـ تتناول العلاقة بين المواطن والدولة، فى إطار الفانتازيا والكوميديا اللى بـ تنتج عنها، ويمكن من أفضل الـSegments  اللى عجبتنا فى مسلسل "صاحب السعادة" بطولة عادل إمام واللى تم عرضه فى رمضان الماضى، هو التعرض لشخصية وزير الداخلية.

من تأليف وحيد حامد وإخراج تامر محسن، بـ نشوف قصة مواطن غلبان (محمد فراج) واللى بـ تتوفى والدته (سوسن بدر) أثناء التجهيز لحفل خطوبة بنت وزير الداخلية، ولأن الوفاة بـ تحصل داخل فيلا الوزير، ولأن علاقة قرابة بـ تجمع بين عائلة "القط" اللى بـ ينتمي لها وزير الداخلية (محمود حميدة) وعائلة "الفار" اللى بـ ينتمي لها (محمد فراج) بـ تحصل العديد من المفارقات الكوميدية المدهشة والمتداخلة مع بعضها، واللى بـ تعرفنا أمور كثير عن الدولة وكواليسها.

المحيطين بالوزير بـ يحاولوا يقنعوه يتصدر العزاء ويلغي خطوبة ابنته، لكن زوجته المتسلطة ميرفت (سوزان نجم الدين) بـ تحاول تفرض وجهة نظرها، وفى وسط كل ده بـ يظهر الابن الضعيف (حمادة الفار) مطالبًا بجثة والدته فى ظل ضغط أهل الحارة اللى عايش وسطها عليه.
الفيلم بـ يختار فترة الرئيس المعزول مبارك للتعرض للأحداث، وبـ نفهم ده من الصور المعلقة على الحائط فى خلفيات المشاهد اللى بـ يظهر فيها وزير الداخلية، ومن الأمور الجريئة اللى لاحظناها فى الأحداث هى تسمية الأماكن والأمور باسمها الحقيقي، على سبيل المثال محمد فراج بـ يشتغل فى جريدة الأهرام واللى بـ يظهر مديرها بصورة المسئول الحكومي اللى بـ يسعى لإرضاء رؤساءه بأى شكل ممكن، وبـ يخاف طوال الوقت من الجواسيس اللى بـ ينقلوا المعلومات للجهات الأمنية.

أيضًا بـ يظهر التعاون بين رؤساء تحرير الجرائد المعارضة وبين الحكومة –طبعًا من تحت لتحت– من خلال المشهد اللى جمع بين الفنان عماد رشاد فى دور رئيس تحرير أحد الجرائد المعارضة، وإزاى بـ يعطي لوزير الداخلية نصائح لتجميل صورته أمام الشعب.

من الأمور اللى بـ نأخذها على السيناريو، طريقة التعرض لأهل الحارة، فى بداية أحداث الفيلم بـ نشوفهم كمجموعة من الطمعانين فى بنت الحتة المثيرة (سوسن بدر)، لكن بعد وفاتها بـ يقفوا كلهم بجوار ابن المنطقة (محمد فراج) وبـ يساعدوه يوصل لجثتها، إحنا فاهمين طبعًا الإسقاط السياسى والمجتمعي فى الأحداث، لكن كنا محتاجين بعض التبرير على صعيد الأحداث العادية.

محمود حميدة فى أداء نمطي لشخصية وزير الداخلية، قدر يدهشنا فى بعض المشاهد، لكن بعض المشاهد الأخرى أداها بشكل نمطي، سوزان نجم الدين فى دور الزوجة المتسلطة ميرفت قدمت دورها بشكل مبالغ فيه، وإن كانت المشاهد الافتتاحية لها أثناء تجهيز الفيلا متميزة، محمد فراج بـ يحاول يجرب نفسه فى نوعيات مختلفة من الأداء التمثيلى، ونعتقد أن دوره فى الفيلم كان جيد بالنسبة لإمكانياته الفنية.

الموسيقى التصويرية كان لها دور مهم فى الأحداث، وكانت متميزة وجميلة، والديكورات كمان كانت رائعة وفيها اهتمام بالتفاصيل، خصوصًا ديكورات فيلا الوزير اللى امتازت بالفخامة والاهتمام بشكل الديكورات خصوصًا مع الكادرات الواسعة للتصوير.

"قط وفار" فيلم كوميدي سياسى اجتماعي عن الأحداث اللى بـ نقابلها فى مصر بشكل يومي، ننصحكم بمشاهدته وتصنيفه وفقًا للمساحة اللى بـ يناقشها.. مش أكثر ولا أقل.