The Definitive Guide to Living in the Capital , Cairo , Egypt

واحدة من أهم عوامل نجاح أي فيلم هي إن المشاهد تكون مترابطة مع بعضها، وبتخدم الهدف النهائي للفيلم، وهو تقديم حدوته مختلفة بشكل مختلف وجديد. لكن مشكلة “ولاد رزق 2” إن جزء كبير من مشاهده كان منفصل عن بعضه، ومش بيخدم قصة الفيلم.

الفيلم بيحكي عن حياة أولاد رزق بعد نجاح مهمتهم الأخيرة، وبعد قرارهم التوقف عن الأعمال غير المشروعة. وازاي ده أثر على حياتهم بشكل سلبي، وخلاهم يوافقوا على عرض الظابط رؤوف “محمد ممدوح” علشان ينفذوا عملية جديدة وكبيرة.

نقدر نقسم الفيلم لمجموعة فصول، كل فصل منهم بيحكي حكاية، لحد هنا عادي ومفيش مشكلة، لكن مشكلة “ولاد رزق 2” إن بعض الفصول دي مش مترابطة، ومش بتخدم السياق العام للقصة، حتى إن بعض الشخصيات لو أتلغت تمامًا أو أتبدلت بشخصيات تانيه خالص كان الفيلم هايستمر بدون أي اختلال “زي غاده عادل في دور نانسي”.

بالنسبة للأداء التمثيلي، أحمد عز وعمرو يوسف عاملين دويتو سينمائي قوي وجميل، أما أحمد الفيشاوي فكانت مساحة دوره مش أد موهبته الكبيرة، وكريم قاسم قدم دور جامد جدًا، ومساحة دوره ساعدته على ده.

مفاجأة الفيلم كانت في “أحمد داوود” اللي قدم دور مختلف وممتاز إلى أقصى درجة، وخالد الصاوي لا يمكن ننسى دوره اللي على الرغم من قلة عدد مشاهده لكنه كان مؤثر جدًا في الأحداث وده العادي من خالد الصاوي وافتكروا دوره القصير والقوي في فيلم “الفيل الأزرق2”

الأدوار الذكورية في الفيلم كانت مسيطرة وقوية، مقارنةً بالأدوار النسائية اللي كانت ضعيفة جدًا، ونقصد هنا غاده عادل وريم مصطفى، لكن الضعف ده مش ضعف موهبة، لكن ضعف ناتج عن قلة المساحة المخصصة لأدوارهم.

“ولاد رزق2” نجح في إنه يقدم كل حاجة شوفناها في الجزء الأول بس بكمية أكبر، مطاردات أكتر، أكشن أكتر، وموسيقى تصويرية أحلى وألفاظ ومشاهد جريئة أكبر، لو عجبكم الجزء الأول هاتلاقوا التوليفة بتاعته بس بكمية أكبر في الجزء الثاني.