The Definitive Guide to Living in the Capital , Cairo , Egypt

Daddy’s Home

Daddy’s Home: كوميديا صراع الأباء!

  • توماس هيدن تشيرشليندا كارديليني...
  • كوميدي
  • شون أنديرزشون أنديرز
تم التقييم بواسطة
Mohamed Hamdy
قيم
قيم الآن
Daddy’s Home: كوميديا صراع الأباء!

الحقيقة وقبل كل شىء، إحنا متضايقين أننا بـ نكتب مقال نقدي لفيلم كوميدي فى يوم تشييع جنازة الفنان الراحل الجميل ممدوح عبد العليم.. أسرة كايرو 360 بـ تدعو له بالرحمة ولأهله الصبر والسلوان ولمحبيه فى مصر والعالم العربي خالص التعازي.

مين قال أنك محتاج فكرة جديدة ومبتكرة علشان تقدم فيلم كوميدي؟! أحيانًا بـ يكون طريقة تقديم الفكرة القديمة فى حد ذاتها معيار كافي جدًا للحكم على الفيلم الكوميدي بالنجاح، أو نقول لكم من الآخر؟ مش مهم خالص تعملوا قواعد ثابتة لاستمتاعكم وانبساطكم… الكوميديا فى الفيلم ده هـ تفرض نفسها على كل شىء وهـ تخليكم تضحكوا لمدة حوالى ساعة ونصف هى عمر الفيلم.

من إخراج شين أندريز وبطولة ويل فاريل ومارك ويلبرج -واللى بـ يتعاونوا للمرة الثانية بعد فيلم The Other Guys– وبـ يشاركهم البطولة توماس هادن شيرش وليندا كارديليني بـ نشوف قصة معركة بين الأب البيولوجي والأب الجديد لطفل وطفلة صغيرين.. المعركة بـ تنشأ نتيجة رغبة كل واحد فيهم استمالة الأطفال له فى المقام الأول، الأمر اللى بـ يفجر مجموعة من المواقف الكوميدية شديدة السخونة.

بداية لازم نتكلم على فكرة أن موضوع الأب البيولوجي والفرق بينها وبين الأب العايش مع الأم، الفكرة دي كلها غربية جدًا ومش موجودة فى مجتمعنا العربي الشرقي، الأمر اللى ممكن يسبب مشكلة للمشاهدين المتحفظين، لكن إحنا لاحظنا أن الجميع مبسوط من سير الأحداث وقادر يتعامل معاها ذهنيًا بشكل عادي، ومن هنا بـ نشوف أهمية السينما فى قدرتها على تصدير الأفكار للآخرين بدون أي مجهود، وإزاي السينما العربية فاشلة فى تصدير أي قيم عربية أو مصرية حقيقية، بعيدًا عن عوالم الكباريهات وخناقات الحواري!

نرجع لفيلمنا.. الإخراج قائم على حشد أكبر قدر ممكن من مشاهد الكوميديا والمواقف الظريفة بشكل متتالي وسريع، بالتالي مافيش مكان للملل أو الإحساس بعدم أهمية مشاهدة الفيلم، لكن البعض ممكن يحس أن الهدف الوحيد للفيلم هو الكوميديا المعتمدة على أسلوب واحد: المشاهد المفاجئة والمفارقات الكوميدية، واللى بـ تكون أشبه ببرامج المشاهد الطريفة اللى بـ نشوفها فى التليفزيون.. لكن مين قال أننا بـ نزهق من المواقف دي؟! مين قال أننا مش بـ ندور عليها على يوتيوب والفيسبوك؟! لكن فى رأينا أن الفيلم كان محتاج بعض التنويع فى طبيعة الكوميديا اللى بـ يقدمها.

الموسيقى التصويرية والديكورات لعبت دورها المفروض منها فى النوعية دي من الأفلام، وتوارت علشان تعطي المجال كامل للكوميديا أنها تسيطر على دفة الأحداث، والحقيقة أن نوعية المشاهدين اللى بـ تعجبهم الأفلام دي بـ تكون الموسيقى والديكورات آخر همهم.

 Daddy's Homeفيلم كوميدي جميل تقدروا تبدأوا به السنة الجديدة.. كل سنة وأنتم طيبين.

عجبك ؟ جرب

The Other Guys.

نصيحة 360

أحد مشاهد الفيلم تم تصويرها فى ملعب كرة سلة حقيقي ووسط مباراة حقيقية وبحضور جمهور حقيقي!

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح