-
أليسون ميلرروبرت بلوشي...
-
رعبغموض وتشويق
-
تايلر جيليتتايلر جيليت...
-
في1 Cinema
Mohamed Hamdy
تيمة الرعب من الأطفال حديثى الولادة، أو عملية الحمل والولادة اللى بـ يتدخل فيها الشيطان أو الأشباح أو.. إلخ من أشهر تيمات أفلام الرعب الحالية، التيمات اللى حاسين طوال الوقت أنها مكررة وما أصبحش فيها أى تجديد من أى نوع يذكر، لدرجة أننا لو فكرنا فى عمل فيلم رعب هـ نقدر نستنسخ أى فيلم رعب موجود حاليًا ونضيف عليه بعض التعديلات ونعيد تقديمه من جديد.
من إخراج أيلر جيليت ومات بيتينيلي أولبين بـ نشوف أليسون ميلر وجاك جيلفورد زوج وزوجة متزوجين حديثًا، بـ يفاجأوا بخبر حمل الزوجة، ومع تطور عمليات الولادة اللى بـ يتم تصويرها على كاميرا فيديو محمولة بـ نبدأ نكتشف حقائق مرعبة فى حقيقة المولود الموجود فى بطن الأم.
زى ما قولنا التيمة متكررة وسبق شوفناها فى أفلام ثانية كثير، لكن يمكن الجديد المرة دى هو أسلوب التصوير اللى اعتمد فى جانب كبير منه على التصوير الشخصى بحيث نشوف الأحداث من خلال كاميرا فيديو محمولة فى يد الزوج.
الأسلوب ده فى التصوير بـ يفيد فى حاجتين، الأولى أنه بـ يوفر على المخرج استخدام الخدع والمؤثرات الخاصة بشكل كبير لأنه يقدر يتحجج بالتصوير المحمول عن تقديم بعض المشاهد اللى ممكن يكون فيها صعوبة من ناحية المؤثرات، الحاجة الثانية أنه بـ يدخل المشاهد بشكل سريع للحدث وبـ يندمج مع مشاهد الرعب بسرعة ويحس أنه جزء من الأحداث، ده من الحاجات اللى عجبتنا فى الفيلم اعتماده على أسلوب تصوير مختلف.
الموسيقى التصويرية والديكورات لعبت دور كبير فى دخول المشاهدين للأحداث بسهولة، لكن نعيب عليها أن التوافق بينها وبين المشاهد ما كانش مستمر على طول الخط الدرامى للفيلم، وكانت بـ تزيد أحيانًا فى مشاهد عادية أو تنقص فى مشاهد محتاجة تكون فيها أقوى.. الديكورات كانت كويسة، وساعد على عدم إظهار عيوبها أسلوب التصوير المختلف زى ما قولنا.
لو بـ تحب أفلام الرعب بشكل عام Devil’s Due هـ يكون فيلم كويس بالنسبة لك، لكن لو كنت من اللى زهقوا زينا من التيمات المكررة فى الأفلام وعاوز تشوف حاجة جديدة ننصحك تنتظر شوية.