-
أوين ويلسوندان فوجلر...
-
كارتونكوميدي
-
جيمي هايواردجيمي هايوارد
-
في1 Cinema
Mohamed Hamdy
الجميل فى هوليوود قدرتها على صنع الأسطورة من أبسط التفاصيل، وعمل قصص عظيمة من مجرد بعض التفصيلات الصغيرة، وعلى الرغم من ألة الإنتاج الضخمة اللى تقريبًا مش بـ تتوقف عن العمل لإنتاج الأفلام على مدار العام على كل الأصعدة، إلا أنها قادرة على الإتيان ببعض الأفكار الخلابة والقوية، ومن النوعية دى بـ نشوف Free birds.
من إخراج وتأليف جيمى هيوارد بـ نشوف أوين ويلسون، وودى هاريلسون، آيمي بولير وغيرهم فى الأداء الصوتى، عن قصة محاولة اثنين من الديوك الرومى السفر للماضى وإزالة صنف الديوك الرومية من قائمة الطعام، الأمر اللى هـ يتسبب فى “عتق” رقبة كل الديوك الرومية فى المستقبل من الذبح والالتهام فى عيد الشكر.
الحقيقة أن مستوى الجرافيك فى الفيلم كان متميز وحيوى، كمان اختيار الألوان كانت دقيقة وفى محلها، وأعطانا إحساس عام بالانبهار والتفاؤل نتيجة خليط الألوان المتجانس سواء فى ملامح الشخصيات أو ألوان الديكورات والخلفيات، وحتى فى المشاهد اللى بالإضاءة الخافتة كنا بـ نلاحظ تفوق نسبى فى الإضاءة وتكوينات الألوان الخاصة بالمشاهد.
الموسيقى التصويرية نجحت فى توصيل المطلوب منها للمشاهد، وقدرت تعيشنا فى جو متناغم مع الأحداث، على الرغم من أننا لاحظنا بعض الخروج عن النص الموسيقى العام فى بعض المشاهد إلا أن ده خدم الفيلم –من وجهة نظرنا– وساعد على دخول المشاهد فى التفاصيل أكثر.
قد يبدو الفيلم من الوهلة الأولى أنه موجه فى الأساس للأطفال، إلا أن الحقيقة أنه موجه للأطفال والكبار على حد سواء، وطوال الوقت بـ نتعلم قيم عن ضرورة تقبل الآخر، وقبول الناس على عيبهم فى الطريق للوصول للأهداف اللى الناس راسماها فى حياتها، قيمة مهمة نعتقد أننا فى مصر أول ناس محتاجين نعرفها.
Free birds فيلم خفيف وكوميدى، ويستحق تشوفه لو عاوز تشوف عمل خفيف وظريف، أو عاوز أولادك يقضوا وقت كويس أمام شاشة العرض السينمائى.