The Definitive Guide to Living in the Capital , Cairo , Egypt

بعض الأفلام صُنع ليشاهد بتقنية الـ3D والبعض الآخر صنع ليشاهد على شاشات العرض العادية، أما Gravity فـ نقدر نقول بأريحية شديدة أنه لازم يتشاف على شاشات IMAX فائقة الجودة لأن الفيلم يستحق الاستغراق فى أدق تفاصيله تمامًا.

الحقيقة اللى عاوزين نعترف لكم بها أننا مش بـ نحب أفلام الفضاء، عندنا تجربة مروعة مع فيلم زى 2001: A Space Odyssey اللى رغم انحياز النقاد الشديد له كان بالنسبة لنا فيلم ضعيف المستوى يمكن لأننا شوفناه فى 2012 بينما هو إنتاج 1968، باختصار كان عندنا إحساس عام أن أفلام الفضاء الخارجى مش بـ تعمل أى شىء سوى تقديم ترفيه وقتي خفيف للمشاهد وخلاص، لكن نظرتنا اختلفت بالتأكيد بعد Gravity.

رغم محدودية عدد الأبطال وظهور جورج كلونى فى مشاهد قليلة إلى حد ما مقارنة بزميلته ساندرا بولوك اللى يعتبر الفيلم واحد من أحسن أعمالها على الإطلاق، ورغم أن الفيلم فى النهاية مش بـ يحكي غير عن رائدة فضاء تاهت فى الفضاء بس رجعت تاني، إلا أن الفيلم قادر على حبس أنفاسك من فرط الانبهار والأحداث المتتابعة طوال الوقت.

بـ نشوف ساندرا بولوك (ريان ستون) وجورج كلوني (مات كواليسكى) كرواد فضاء فى ناسا فى مهمة فضائية لإصلاح مكوك فضائى والعودة للأرض، المهمة بـ تتحول لجحيم حقيقى لما بـ يخبط رواد الفضاء أشلاء قمر صناعى للتجسس بـ تضربه روسيا بأحد صواريخها، بـ يتحتم على رائدة الفضاء أنها تتجه لمركبة فضاء ثانية وتنتقل بها لقمر صناعى صينى هو الوحيد اللى يقدر يوصلها الأرض بسلام.

بعيدًا عن المغامرة فى الفيلم، بـ نشوف الحياة الشخصية لأبطال الفيلم من خلال حواراتهم ومن خلال الأحداث، بـ نشوف حياة الأم اللى فقدت بنتها وبـ تحاول تغوص فى مزيد من العمل لنسيان مشاكل حياتها الواقعية وغيرها من التفاصيل الصغيرة اللى بـ تعطينا تفاصيل صغيرة عن الأبطال اللى بـ نشوفهم على الشاشة، وده كان التحدى اللى بـ يواجهه المخرج ألفونس كوارون وهو مخرج من أصل مكسيكى كان من أحلامه أنه يكون رائد فضاء ومن الواضح أنه قرر يعمل فيلم عن الفضاء بدلاً من التواجد هناك بنفسه!

على الناحية التقنية الفيلم أفضل من رائع بمراحل، كمان عجبنا جدًا التركيز على الأخطاء الصغيرة اللى كان بـ يقع فيها المخرجين اللى بـ يعملوا أفلام عن الفضاء قبل كده، مثلاً مش بـ نسمع أصوات الانفجارات فى الفيلم بسبب أن الصوت مش بـ ينتقل فى الفضاء، بـ نشوف فرق الضغط بين مركبة الفضاء من الداخل والفضاء الشاسع فى الخارج، وغيرها من التفاصيل الصغيرة اللى برع المخرج فى الشغل عليها، كمان بعد شوية بحث على الإنترنت اكتشفنا أن سفينة الفضاء الصينية اللى بـ تظهر فى الفيلم موجودة فعلاً وحقيقية ولها اسم هو “تيانجونج” وغيرها من التفاصيل.

رغم بساطة الفكرة، إلا أن التفاصيل وطريقة إخراج الفيلم بـ يرشحوا Gravity أنه يكون واحد من أحسن الأفلام اللى شوفناها فى الفترة الأخيرة، ننصحكم تشوفوه.