The Definitive Guide to Living in the Capital , Cairo , Egypt

من أول مشهد في الجزء الأول من سلسلة أفلام John Wick كنا عارفين أننا أمام مستوى جديد من أفلام الأكشن. مش بس علشان الفيلم قدر يقدم مشاهد قتال والتحام جديدة، لكن علشان الفيلم قدر يخلق عالم كامل من عوالم الجريمة، بكافة تفاصيله وقوانينه، وحتي بالعملة اللي بيتم التعامل بيها، وطريقة وضع جوائز على رأس أي شخص.

فيلم John Wick: Chapter 2 من تأليف ديريك كولستاد وإخراج تشاد ستاهلسكي، ومن بطولة كيانو ريفز و روبي روز و بريدجيت مويناهان.

الفيلم بيبدأ بمشاهد افتتاحية لمعركة أخيرة لجون ويك بيخوضها لإنهاء قصة صراعه القديم ضد المافيا، واللي شوفناه بالتفصيل في الجزء الأول، واللي بدأ بعد تعرض ويك للاعتداء وقتل الكلب اللي تركته له زوجته كذكرى قبل وفاتها، وسرقة سيارته المفضلة.

ولما نتوقع أن كل الأمور انتهت بيبدأ فصل جديد في القصة، لما بنكتشف أن جون ويك مدين بالبقاء على قيد الحياة لأحد رجال المافيا، واللي بيطلب منه رد الجميل، وتنفيذ جريمة في غاية الصعوبة. ولأن تنفيذ الوعود من أهم قوانين عالم الجريمة، ورغم قراره بالتقاعد، بيضطر جون ويك يعود من جديد لساحة الجريمة المنظمة.

سيناريو الفيلم مكتوب بتأني وصبر، وبيأصل لحاجات كتير شوفناها في الجزء الأول وما كناش فاهمينها قوي، وفي نفس الوقت بيلعب على أوتار يعرفها كويس اللي أتفرج على الجزء الأول من السلسلة زي قصة قتل جون ويك لمجموعة من المجرمين باستخدام قلم رصاص فقط!

لكن السيناريو لم يكتفي باللعب على الأوتار القديمة، بل قدم لنا أفكار جديدة وقنوات مختلفة ممكن تمشي فيها الأحداث، زي ماضي جون ويك في عالم الجريمة، والتنازلات اللي أضطر لتقديمها علشان يظل على قيد الحياة، وقصة اعتزاله عالم الجريمة ورغبته في الراحة بعد لما لقى حب حياته.

الأكشن في الفيلم كان متميز إلى أقصي درجة، لكن بنعيب عليه الاهتمام بمشاهد تبادل إطلاق النار على حساب مشاهد القتال والتلاحم، على الرغم من تعلم كيانو ريفز لقواعد رياضة الجو جيتسو اليابانية علشان يقدر يقدم المشاهد دي في الجزء الأول.

من الأمور الجيدة جدًا المرة دي في الفيلم، مشاهد تجهيز جون ويك، والجمل الحوارية المستترة اللي بيستعملها علشان يوصل المعاني اللي عاوزها، ومشاهد صناعة البدلة واختيار الأسلحة ومن ثم أستعمالها بعد كده في الأحداث.

الموسيقى التصويرية كانت من أفضل ما يكون، وكانت مكونة من موسيقي قديمة تم استخدامها في الجزء السابق، وموسيقى جديدة قوية معبرة عن الأحداث، وقدمت لنا تجربة موسيقية جديدة ومختلفة جعلتنا نبحث عن الموسيقى الأصلية بعد نهاية الفيلم علشان نسمعها بتأني.

الجزء الثاني والأحدث من سلسلة جون ويك، بيمهد لظهور الجزء الثالث والأخير – حتي الأن- زي ما أعلن صناع السلسلة، وهى السلسلة اللى بنتوقع لها نجاح واستمرارية، وقدرة على منافسة سلاسل أفلام أكشن مهمة زي Mission Impossible أو حتى سلسلة أفلام جيمس بوند.

علشان تبقى عارف:

مخرج الفيلم كان بيشتغل دوبلير في سلسلة أفلام ماتريكس!