جلا جلا! قرب قرب! الساحر العجيب هيقدم لكم عرض جديد ومختلف جدًا عن أي عرض تاني ممكن تشوفوه.. هي دي الكلمات السحرية اللي بيجذبنا بيها أي ساحر علشان نشوف العرض بتاعه، وبينما بيوهمنا وبيجبرنا على التركيز على إيده اللي ماسكة العصاية بيكون بيحضر نفسه علشان يطلع لنا الأرنب من القميص بتاعه. هي دي كانت فكرتنا عن السحر لحد ما شوفنا فيلم Now You see me في الجزء الأول منه واللي كان عظيم جدًا. والنهارده جه اليوم اللي نشوف الجزء الثاني علشان نستمتع بجولة جديدة من السحر والإبهار.
الفيلم من إخراج جون إم تشو، وبطولة دانيال رادكليف، وودي هاريلسون، مارك روفالو، بنشوف استكمال للجزء السابق من الأحداث، واللي الفيلم بيبدأ بمشاهد افتتاحية بيتم الشرح فيها للمشاهدين اللي بيشوفوا الفيلم للمرة الأولى بدون متابعة الجزء الأول، وفي خلال دقايق معدودة بيصبح كل المشاهدين عارفين نفس المعلومات اللي المفروض يعرفوها.
وكأن التعقيد كان غير كافي في الجزء الأول، الفيلم بياخدنا في حالة من التعقيد الشديد للألعاب السحرية اللي بيمارسها مجموعة من السحرة المحترفين، واللي بيلعبوا بأسلوب روبن هود فى إعادة توزيع الثروة على الفقراء بعد سرقتها من الأغنياء، السحرة أبطال الفيلم واللي بيسموهم (الفرسان) بيحركهم تنظيم سري اسمه (العين) بيشتغل لحسابه الفنان مورجان فريمان واللي بيعرفنا معلومات أكتر عنه وعن طريقة عمله.
المشكلة أن التعقيد الشديد وغموض الأحداث دخلنا في حالة من عدم الفهم، وحسينا أننا زي الأطرش في الزفة، ومع الوقت بدأنا نفهم الأحداث شوية لكن لحد لما جاء الوقت ده كان أصابنا بعض الحيرة والتخبط وعدم فهم أحداث الفيلم وده في رأينا كان غير إيجابي لأن الفارق بين التشويق والغموض وبين إحساس المشاهد بالغباء وعدم الفهم فارق كبير جدًا.
الجميل في الفيلم الحس الكوميدي اللي كان عالي جدًا، خاصة في مشهد زي مشهد إخفاء كارت الكوتشينة من الفريق الأمني كان مشهد في غاية الإثارة والذكاء والكوميديا، والحقيقة أنه واحد من أفضل المشاهد اللي شوفناها مؤخرًا في الأفلام اللي من النوعية دي ومش عاوزين نحرق عليكم الأحداث وبننصحكم تشوفوا المشهد بنفسكم وتحكموا عليه.
الموسيقي التصويرية للفيلم كانت مميزة وقوية جدًا.. حماسية وشدتنا من اللحظة الأولي للنهاية بلا توقف، وكان صناعها عارفين إمتى تبدأ الموسيقى وإمتى تتوقف وإمتى تعلو وإمتى تهبط، ودي نقط مهمة جدًا بتعرفنا أن المسئولين عن الموسيقى فى الفيلم كانوا محترفين وعارفين شغلهم صح.
لو كنت من محبي السحر والخدع السحرية وألعاب الذكاء والمطاردات الذكية، ما تضيعش وقت وشوف الجزء الثاني من Now You See Me ولو ماشوفتش الجزء الأول ننصحك تشوفه قبل مشاهدة الفيلم لمزيد من المتعة والخيال والأثارة.
