The Definitive Guide to Living in the Capital , Cairo , Egypt

أفلام الجاسوسية من أمتع الأفلام من وجهة نظرنا، لأنها بتجمع ما بين الجاسوسية والتشويق والإثارة والأكشن مع بعض الرومانسية، خليط جميل بيحمل روائح أفلام جيمس بوند و Mission Impossibleوغيرها من الأفلام اللي اتعودنا على مشاهدتها من الصغر… فيلم Our kind of Traitor  بيتبع نفس النهج ده.

الفيلم من تأليف جون لي كاري وإخراج سوزانا وايت في أول تجاربها الإخراجية في عالم الجاسوسية، بنشوف فيلم بيحكي عن شاب وصديقته بيتقابلوا صدفة مع مجرم دولي بيعتبر واحد من أهم الناس اللي بتشتغل في مجال تبييض وغسيل الأموال لحساب المافيا الروسية، اللقاء بينتج عنه أحداث مؤسفة مش عاوزين نحرقها عليكم ونخليها لما تتفرجوا على الفيلم بنفسكم أحسن.

الأداء التمثيلي لكل الأبطال كان متميز جدًا، وحسينا أن الكاستينج تم اختياره بشكل سليم إلى أبعد الحدود، كمان الحبكة حسينا أنها حقيقية وما فيهاش مبالغة، على الرغم من تعودنا على أن أفلام المخابرات بيكون فيها مبالغات كتير وجو عالي من الأكشن اللي بيحتاج درجة كبيرة من تكبير الدماغ، لكن الحقيقة الفيلم قدر يتجاوز المرحلة دي ويقدم لنا حبكة قوية مبنية على أسس سليمة.

الموسيقى التصويرية كمان كان لها دور مهم في الأحداث، لكن لو هنقارن بينها وبين الديكورات على سبيل المثال نلاقي أن الديكورات كانت أكثر قوة وتناسقًا مع البيئة العامة للأحداث وقدرت تقربنا وتدخلنا لجو الفيلم بشكل أسهل وأسرع من الموسيقى التصويرية.

Our kind of Traitor من نوعية الأفلام اللي ممكن ما يكونش عندنا كلام كتير عنه، لأنه واضح ومباشر بشكل كبير، والسيناريو ممتع وغير ممل والأداء التمثيلي خدم القصة بشكل كبير، يمكن لو كانت العوامل المساعدة زي الموسيقى والديكور والإنتاج بشكل عام كانت أقوى، كان ممكن الفيلم ينافس كواحد من أفضل أفلام الأكشن والجاسوسية اللي شوفناها السنة دي.

أخر حاجة عاوزين نضيفها هي أن من الواضح أن انجلترا بتحاول تهزم أمريكا فنيًا في جزئية الأفلام الاستخباراتية، ومهما قدمت هوليوود أفلام قائمة على فكرة الجاسوسية والمخابرات، مش هينفع تغلب انجلترا في النقطة دي، خاصة فيما يتعلق بالقصة والحبكة والسيناريو، هوليوود بتتميز أكتر بإنتاج أضخم ودعاية أكبر وأروع.