The Definitive Guide to Living in the Capital , Cairo , Egypt

للأسف ما كناش متوقعين كثير من فيلم يعتبر جزء ثاني لسلسلة أفلام كان الجزء الأول منها ضعيف بالأساس.. وإحنا عارفين أن الأجزاء الثانية من أي سلسلة بـ تكون دايمًا سيئة.. طبعًا دي مش قاعدة عامة نقدر نقيس عليها كل الأفلام، لكن نقدر نقول أن بنسبة 90% الجزء الثاني والثالث من السلاسل بـ يكون أضعف لأنه بـ يكون معتمد فى الغالب على النجاح اللى حققه الجزء الأول من نفس السلسلة.

من إخراج تيم ستوري وبطولة آيس كيوب وكيفن هارت وبنجامين برات وكين جيونج بـ نشوف الأحداث اللى بـ تستمر بعد نهاية الجزء الثاني، لكن الأحداث بشكل عام منفصلة عن الجزء الأول.. بمعنى أن المشاهد لو ما شافش الجزء الأول مش هـ تبقى مشكلة كبيرة بالنسبة له وهـ يقدر يتابع الأحداث بنجاح، لكن لو شاف الجزء الأول هـ يكون فهمه أفضل وأفضل لها واللى بـ تبدأ بمهمة أخيرة وسهلة فى ميامي.. لكن المهمة اللى بدأت سهلة أصبحت أصعب وبدأت الأمور فى الخروج عن السيطرة ومن هنا بـ تستمر الأحداث بجرعة عالية من المواقف الكوميدية.

للأسف ما لاحظناش أي تجديد على مستوى الكوميديا، نفس الإيفيهات والمواقف والشتائم اللى خلت تصنيف الفيلم PG-13 -يعني الأقل من 13 سنة لازم يخش الفيلم مع شخص بالغ- بالإضافة لبعض مشاهد المخدرات، ما ننكرش أن بعض المواقف كانت بـ تخلينا ننفجر فى الضحك، لكن بشكل عام مستوى وحجم الكوميديا كان أقل من المعتاد وأقل حتى من الجزء الأول من السلسلة.

زي ما قولنا قبل كده الموسيقى التصويرية والديكورات مش بـ تكون من العناصر اللى بـ يركز عليها صناع النوعية دي من الأفلام لاهتمامهم الأساسى بالكوميديا والمواقف الكوميدية.. وده إلى حد ما أمر مفهوم.. لكن اللى مش مفهوم هو نقص جرعة الكوميديا عن باقى الأفلام.

Ride Along 2 مش أسوأ فيلم كوميدي ممكن نشوفه، لكن خلوه اختياركم الأخير خاصة أن عندنا موسم سينمائى ساخن جدًا وفيه أكثر من فيلم مرشح للأوسكار.