بعض الأفلام اللي بنشوفها، بتعتمد على أسلوب في الرعب اسمه: ضع نفسك مكان هؤلاء الأشخاص. وفي رأينا أن الأسلوب ده في الرعب من أقوى الأساليب علشان بيضع المشاهد في مكان الممثل، وبيضمن اندماج المشاهد بنسبة 100% من الأحداث.
الفكرة
فكرة وجود مجموعة من الأفراد في تجربة نفسية مجنونة، أو في ظروف مرعبة، فكرة قديمة مش جديدة، سبق وشوفناها في فيلم يمكن مش كتير من المشاهدين شافوه في وقت عرضه، وهو فيلم The Experiment واللي كان بيحكي عن مجموعة من الأشخاص بتشارك في تجربة نفسية، من خلال لعب مجموعة من الأشخاص دور المساجين، ومجموعة أخري دور السجانين، ومع الوقت والتفاعل بين المساجين والسجانين، بيبدأ السجانين في إتباع أقصى وأسوأ الأساليب ضد المساجين.
معالجة تانية شوفناها في فيلم No Escape من إنتاج سنة 2015، لكن لم يكن هناك تجربة نفسية في الفيلم ده، لكنه كان بيحكي عن محاولة أب وأسرته الهروب من مطاردة أهل مدينة كاملة لهم!
وأكبر مثال على الفكرة اللي بنتكلم عنها هي سلسلة أفلام SAW اللي بتحكي عن مجموعة من الأشخاص بيتم وضعهم في تجربة معينة. بتمتاز بالدموية والموت.
القصة والإخراج
الفيلم بيحكي عن منشأة أمريكية، بيتم تطبيق تجربة على الموظفين العاملين فيها. التجربة عبارة عن أنه بيتم احتجاز كل العاملين في المؤسسة وعددهم حوالي 80، ومن ثم بيتم إخبارهم من خلال مكبرات صوت موزعة في كل مكان، أن كل شخص فيهم لازم يقتل الأخرين، وإلا بعد مرور وقت معين سيتم قتل كل الموجودين في المكان بلا استثناء!
على الرغم من جنون القصة لكن مجرد إن المشاهد يضع نفسه في مكان أحد أبطال الفيلم، هيبدأ في سؤال نفسه: هل أكون قاتل أم مقتول؟! وهل هناك طريقة ثانية للخروج من المأزق ده؟ وده كان دور الإخراج في تقديم صورة واقعية من داخل المبنى، علشان يشعر المشاهد بالتماهي مع الأحداث بنسبة 100%.
فريق العمل
الفيلم من تأليف جيمس جن ومن إخراج جريج ماكلين، والبطولة كانت من نصيب أدريا أرجونا وجون سي مكجينيلي مع توني جولدوين وإبرهام بينريبا.
الديكورات والموسيقي
الديكورات والموسيقى التصويرية كان لهم دور رائع في أحداث الفيلم، وخاصة الديكورات المتميزة، واستخدام أدوات المكتب البسيطة علشان تتحول لأدوات للقتل والتهديد، كل التفاصيل الصغيرة دي كانت نتاج تضافر جهود الإخراج مع الديكورات علشان نوصل في الأخر للنتيجة المتميزة النهائية للفيلم.
وأخيرًا…
فيلم The Belko Experiment فيلم رعب وأكشن متميز، بيلعب على تكنيك وضع المشاهد مكان بطل الفيلم، في وضع مرعب وحالك السواد… وخلينا نشوف لو كنت مكان الأبطال كنت هتختار تكون قاتل أم مقتول؟!
علشان تبقى عارف:
تم تصوير جانب كبير من أحداث الفيلم في كولومبيا.
أكتب تقييم
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
