The Definitive Guide to Living in the Capital , Cairo , Egypt

الحقيقة أننا فى كايرو 360 مش قادرين ننفي انحيازنا الإيجابى لفيلم “The Citizen” هو وبطله المصرى خالد النبوى فى واحد من أقوى أدواره اللى أداها على طريق العالمية اللى بـ يأخذ عليه خطوات ثابتة يوم بعد يوم.

وبصراحة لو ما كناش هـ ننحاز لفنان مصرى محترم بـ يجتهد علشان يقدم أفلام جديدة وعالمية، ويقدر يوصل باسم مصر وفنها لهوليوود يبقى هـ ننحاز لمين؟ السبكى؟! انحيازنا مطلوب ومفهوم، وكنا نتمنى نعطى الفيلم خمس نجوم لكن بعض العوامل الأخرى منعتنا من كده، وده اللى هـ نتكلم عليه النهاردة.

المخرج والمؤلف سام قاضي بـ يحكى على مدار حوالى ساعتين هى عمر الفيلم عن محاولة شاب لبنانى (إبراهيم) الاندماج مع المجتمع الأمريكى بعد فوزه فى اليناصيب الأمريكى بالهجرة للولايات المتحدة.

المشاهد الافتتاحية للفيلم بـ تورينا تعنت ضباط الجوازات مع إبراهيم جراح لملامحه العربية، والحظ السىء بـ يخلى إبراهيم يوصل الأراضى الأمريكية، يوم واحد فقط قبل أحداث 11 سبتمبر الإرهابية، وتشابه الاسم ومحل الميلاد بينه وبين زياد جراح أحد الإرهابيين المنفذين للحادث، أعطى الأمريكان الحق فى اعتقاله لمدة 6 شهور بدون محامى أو أى حقوق أخرى بدعوى التصدى للإرهاب، إلا أن الفيلم خلانا نحس أن فترة الشهور الستة عدوا كأنهم بعض لحظات والسلام، وما شوفناش أى ملامح على وجه خالد النبوى تدل على ستة شهور فى السجن سوى أنه نام بعمق وشكل مفاجىء لما راح لصديقته الأمريكية ديان (أجنيس بروكنير) اللى تعرف عليها فى وقت سابق.

مشكلتنا مع الفيلم هى محاولة تصوير إبراهيم بصورة الشخص المثالى، بـ يدافع عن الآخرين ويساهم فى إيواء المشردين، بـ يستحمل عصبية أصحاب العمل اللى بـ يشتغل معاهم، بـ يشتغل الصبح ويذاكر فى المساء فى فصول تقوية اللغة الإنجليزية اللى بـ تتيح له التعرف على شابة عربية جميلة بـ يحاول الزواج منها ثم بـ تنتهي العلاقة بشكل غريب لإفساح المجال للأمريكية ديان علشان تكون البطلة النسائية الوحيدة فى حياة إبراهيم.

مش عاوزين نحكى أكثر من كده عن الفيلم علشان ما نحرقش الأحداث، لكن أداء خالد النبوى كان سهل ممتنع، على الرغم من حالة الاستعجال اللى سادت الربع الأخير من الفيلم وخصوصًا المشاهد الأخيرة، إلا أن أداء النبوى كان ثابت انفعاليًا ومستمر على طول خط الأحداث بشكل ممتاز، وبـ نرشح لكم فيلم “المواطن” بشدة لو عاوزين تشوفوا نجم مصرى وعربى محترم وهو بـ يواصل طريقه للعالمية.