The Definitive Guide to Living in the Capital , Cairo , Egypt

The Wolf of Wall Street

The Wolf of Wall Street: فيلم عبقري بمعنى الكلمة

  • جان دوجاردانجونا هيل...
  • غموض وتشويقكوميدي
  • مارتن سكورسيزىمارتن سكورسيزى
  • في1 Cinema
تم التقييم بواسطة
Mohamed Hamdy
قيم
قيم الآن
The Wolf of Wall Street: فيلم عبقري بمعنى الكلمة

الحقيقة أننا فى كايرو 360 كنا مشتاقين من زمان جدًا لفيلم بالمستوى الفني المبهر الخلاب اللى شوفناه ده، وكان رهاننا على توليفة مارتن سكورسيزى المخرج مع ليوناردو دي كابريو فى البطولة لا يمكن تعمل فيلم وحش أبدًا، وكان رهاننا فى محله تمامًا .

الصراحة أننا مش عارفين نبدأ منين بالضبط، من التمثيل الباهر من كل المشاركين فى الفيلم من أصغر دور لأكبر دور، وطبعًا على رأسهم العبقرى العظيم ليوناردو دي كابريو اللى عمل أفضل وأهم دور فى تاريخه السينمائى فى الفيلم ده وقدر يثبت أنه غول تمثيل من الطراز الأول، وأنه قادر على أنه “يلبس” أى شخصية بـ يقدمها ويتوحد معاها ويتحول لها، مهما حاولنا نوصف مدى انبهارنا بأداء ليوناردو مش هـ نوفيه حقه، ويكفى أنه فى أحد مشاهد الفيلم (مشهد المكالمة التليفونية وهو سكران) سمعنا صرخات المشاهدين من فرط الاستمتاع بالأداء.. الصرخات اللى إحنا نفسنا ما قدرناش نمسكها أمام واحد من أفضل وأهم الفنانين فى العالم لما بـ يجتمع أداؤه مع واحد من أهم المخرجين فى العالم.

الفيلم المأخوذ عن قصة حقيقية بـ يحكى قصة صعود الملياردير جوردان بيلفورت فى عالم المال والأعمال والبورصة فى وول ستريت، شارع المال والثروة فى الولايات المتحدة، جوردان بـ يضطر لمخالفة القانون علشان يوصل لحجم الثروة بتاعته، بـ ينزلق لعلاقات نسائية وإدمان على الخمور والمخدرات، والأحداث بـ تتطور باستمرار بشكل يكتم الأنفاس من فرط الإثارة والتغيرات الدرامية فى الأحداث.

نتكلم عن إيه ثانى؟ الديكورات الأكثر من رائعة؟ ديكور اليخت اللى أوحى لنا بالرفاهية والفخامة؟ الموسيقى التصويرية اللى كانت متناسبة مع كل حدث؟ الخدع السينمائية فيما يتعلق بالحوادث؟ كل تفصيلة فى الفيلم تم ابتكارها بحرفية شديدة ومتميزة.

عاوزين بس نتكلم عن حاجه ما عجبتناش، عرفنا أن الفيلم تم اقتطاع حوالى 30 دقيقة من أحداثه بسبب مقص الرقابة المصرى، مقص الرقابة اللى تخيل أنه ممكن يقطع 30 دقيقة من مجهود واحد من أفضل المخرجين فى العالم لمجرد وجود بعض المشاهد الإباحية، مش سر أننا نقول أن أكثر من نصف الشباب المصرى بـ يحملوا أفلامهم عن طريق الإنترنت، يعنى فى كل الأحوال مافيش أى مجال للسيطرة على انتشار المشاهد الإباحية من خلال قطعها فى السينما، والحل الوحيد هو اعتماد أسلوب الرقابة الأمريكية، عرض الفيلم بالكامل مع تحقيق رقابة على الفئة العمرية اللى بـ تتفرج على الفيلم بحيث ما يتفرجش عليه غير أصحاب الشريحة العمرية المفروض أنها تشوفه، أما أننا نعتمد على القص واللزق ده بـ يفقد الفيلم كثير من معناه وممكن يؤثر على خط سير الأحداث.

The Wolf of Wall Street واحد من أفضل الأفلام فى تاريخ هوليوود وهـ ينافس بقوة على الأوسكار، ندعوكم لمشاهدته مهما كان اختلاف الأذواق، بالتأكيد فى النهاية الفيلم هـ يسيب عندكم تأثير حقيقى وقوى.

عجبك ؟ جرب

The Great Gatsby.

نصيحة 360

اقفل موبايلك.. فضي نفسك.. مش لازم تأكل فيشار المرة دى.. الفيلم يستحق كده وأكثر.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح