The Definitive Guide to Living in the Capital , Cairo , Egypt

Tomorrowland

Tomorrowland: فيلم إنساني جميل

  • بريت روبرتسونجودي جرير...
  • إثارةخيال علمي
  • براد بيردبراد بيرد
تم التقييم بواسطة
Mohamed Hamdy
قيم
قيم الآن
Tomorrowland: فيلم إنساني جميل

المخرج براد بيرد كان المفروض يكون مخرج أحدث أجزاءStar Wars ، لكنه فضل يخرج فيلم اليوم على أنه يخرج جزء من سلسلة، حتى لو كانت السلسلة واحدة من أفضل وأقوى سلاسل أفلام الخيال العلمي على مر التاريخ.

كايسي (بريت روبرتسون) بنت مراهقة عندها أفكار عظيمة وطريقة مختلفة وجديدة في التفكير والتعامل مع الواقع، لكن حياتها الواقعية مش بـ تمكنها من تحقيق أحلامها، ما بين أب بـ يعمل على مشروع فاشل لوكالة ناسا ومهدد مشروعه بالهدم في أي وقت، الأمر اللى بـ يدفع كايسي لمحاولة تعطيل هدم المشروع قدر الإمكان، إلا أنه بـ يتم القبض عليها، وعند خروجها من القسم بـ تعثر على "زرار" صغير لما بـ تلمسه… بـ ينقلها لعالم جديد ومختلف كليًا، العالم ده هو "عالم الغد"، وفيه فرانك والكر (جورج كلوني) بـ يتعرض للطرد منه وبـ يتعاون مع كايسي في سبيل تحسين "عالم الغد" وإنقاذ الكوكب كله من الهلاك، الأمر اللى بـ يدخلهم في عالم من المطاردات المستمرة والصراع اللى بـ يوصل في بعض الأحيان للهرب ببرج إيفل وتحويله لصاروخ في الجو!

عجبنا جدًا عدم محاولة حصد أرباح إضافية من خلال عرض الفيلم بتقنية 3D وهي الحجة الجديدة اللى طالع فيها القائمين على الأفلام لزيادة الإيرادات، وبـ نشوف أفلام كثير بـ تعرض بتقنية ثلاثية الأبعاد فقط علشان تزود ثمن التذكرة على المشاهدين، لكن بعض المشاهد في الفيلم حسينا أننا كنا عاوزين نشوفها بالتقنية دي، إنما لو كانت IMAX نعتقد أنها هـ تكون أكثر إبهارًا وجمالًا، واضح جدًا أن الفيلم لسه له جزء ثاني وأحداث جديدة هـ يتم إضافتها، وشخصيات هـ يتم الدفع بها للأحداث وشخصيات هـ يتم الاحتفاظ بها، لكننا واثقين أن شخصية "أثينا" (رافي كاسيدي) الإنسانة الآلية الجميلة وخفيفة الدم هـ يتم الاستعانة بها من جديد وإعادة إحياء دورها في السلسلة.

أداء جورج كلوني كان متميز، لكن في بعض المشاهد حسينا أنه أصبح أكبر سنًا ومحتاج نوعية أدوار مختلفة، طبعًا كلامنا ممكن يضايق الآلاف من المعجبين بكلوني -وخصوصًا من الجنس اللطيف- لكن ده كان انطباعنا عن أداء كلوني، ويمكن ده اللى دفع بالقائمين على الفيلم الدفع بشخصية كيسي كشخصية أكثر شبابًا وقدرة على قيادة السلسلة في الأجزاء القادمة.

الموسيقى التصويرية كانت متميزة ودافئة، صحيح خرجنا من الفيلم مش متذكرين بعض المقاطع، ودي علامة سيئة عندنا بـ نقيم على أساسها الموسيقى التصويرية لأي عمل بـ نشوفه، لكن بشكل عام الموسيقى كانت قوية وتُحترم، كمان الديكورات اللى تحالفت مع المؤثرات الخاصة علشان تخلق حالة جميلة عجبتنا على مدار الأحداث.

Tomorrowland فيلم محترم وبـ يقدم رسالة هادفة من خلال أحداثه، لكن لو مش بـ تحب الخيال العلمي ومش بـ تقدر "تبيع عقلك" للمخرج والمؤلف.. ننصحك تشوف فيلم ثاني.

عجبك ؟ جرب

Interstellar.

نصيحة 360

هذا الفيلم يعد التعاون الثالث بين جورج كلوني وجودي جرير.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح