The Definitive Guide to Living in the Capital , Cairo , Egypt

الحياة في كايرو

دليل كايرو 360 لأماكن مناسبة للمذاكرة فى القاهرة

أماكن للمذاكرة، Co-Working Spaces
دليل كايرو 360 لأماكن مناسبة للمذاكرة فى القاهرة
    بواسطة
    Omar Mossad

    في مشهد سينمائي مستهلك:

    وسط الصخب المعتاد لقعدة الهري اليومية مع شلة الأنس، يسرح البطل شوية، والمزيكا تعلو في الخلفية، وصوت دوشة الكلام يختفي ببطء، والكادر يبدأ يضيق على وش البطل تدريجيًا، وهوبا يقوم صاحبنا قايم مرة واحدة، وخابط خبطة مفزعة ببطن كفه على الترابيزة،
    ثم صمت تام.. ثم كلمة حاسمة.. ثم ينتهي المشهد بعاصفة من الضحك الهستيري لأفراد الشلة.. بيضطر بعدها صاحبنا أنه ينسحب في هدوء ساخط.. علشان يحافظ على قراره..
    وكرامته!

    عادة في بداية فترة الدراسة ولحد الإمتحانات بيلعب الطالب المصري دور البطل في المشهد السالف ذكره.. على اختلاف وتنوع شلة الأنس من بيئة للثانية، وعلى اختلاف مكان وزمان القعدة..

    لكن يبقى دور البطل محفوظ مصون لطالب مصري أصيل وهو بيقول كلمته الأثيرة: “هأذاكر”.. وعادة بعد الكلمة دي بيقفل المشهد الأول ويعقبه مشهد أسود تمامًا.. في خلفيته صوت شامخ يتغنى بقول موسيقار الأجيال عبد الوهاب: “امتى الزمان.. يسمح يا جميل؟”.

    إمتى وفين صحيح!

    غالبًا لو معاك كارنيه عضوية في نادينا الوهمي كـ “طالب مصري أصيل”، فأنت هتتبسط أكثر بالمذاكرة بره البيت.. وبناء عليه فأنت أكيد هتتبسط لو لقيت إجابة مفصلة على سؤال: “أذاكر فين”؟.. وبناء على اللي بنينا عليه فخلينا نجاوب ونقول:

    لو أنت من هواة الأماكن المغلقة:

    يبقى المكتبات العامة والـ “Co-Working Spaces” هتكون خيارات ممتازة بالنسبة لك.

    بالنسبة للمكتبات العامة فالاختيار الأفضل هيكون مكتبة مصر العامة بفروعها، وقلنا “الأفضل” لأن الهدوء هناك مضمون، وكمان لو احتجت أي مرجع مساعد في مجال مذاكرتك أكيد هتلاقي!

    فروع المكتبة في القاهرة تلاتة: في الجيزة، وفي الزيتون، وفي الزاوية الحمراء، ممكن تشوف الموقع الرسمي وتعرف من عليه العنوان بالضبط وبقية التفاصيل، وعلى نفس الموقع هتلاقي تفاصيل عناوين الفروع.

    أما بالنسبة للـ Co-Working Spaces واللي بدأت تنتشر مؤخرًا بشكل ملفت فخلينا نقسمها كده جغرافيًا ونسرد أهمها بشكل سريع.

    أولًا: بلاد “الدقي” وما حولها: ودي ما شاء الله زي ما قال المثل: “عّمَار يا دقي”:

    هتلاقي هناك شفشاون – ChefChaoun وفيه إنترنت، ومطبخ تقدر تساعد به نفسك في أوقات البريك، ومكتبة لو حبيت تقرأ حاجة، وFunroom  لو حبيت تكسر حدة الملل شوية، فاتحين يوميًا من 10 صباحًا لـ 10 مساءً، وممكن تشوف صفحتهم على الفيسبوك.

    عندك كمان Creativo في ميدان المساحة في الدقي برضه، عمارة رقم 10 في شارع حسين واصف، وبيبقوا فاتحين يوميًا من الساعة 9 صباحًا للساعة 11 مساءً، شوف صفحتهم على الفيسبوك.

    ثانيًا: “وسط البلد” وما حولها:

    ودي برضه من الأراضي العمار، وهتلاقي هناك أماكن كثير، من أنسبها: عندك كمان ملاذ – Malaaz فى شارع طلعت حرب، عندهم القعدة مجانًا، الحساب بيبقى على المشروبات أو الطلبات اللي بتطلبها بس، لكن حاول تبعد شوية عن الفترة من 7 لـ 9 بالليل علشان بتبقى زحمة غالبًا بسبب الورش والفعاليات اللي بتتعمل في الوقت ده، غير كده الهدوء مضمون بعون الله، وهما بيبقوا شغالين يوميًا من الساعة 11 صباحًا للساعة 11 مساءً، ودي صفحتهم على الفيسبوك.

    ثالثًا: بلاد “أكتوبر”:

    وهناك هتلاقي Qafeer Laps في الحي الـ 11 – شارع المحور المركزي – بلوك 66 – شقة 2، ولو حابب تشترك اشتراك شهري وتقعد يوميًا برصيد ساعات مفتوح ممكن تعمل ده، وبيشتغلوا يوميًا من 11 صباحًا لـ 11 مساءً، ودي صفحتهم على الفيسبوك.

    رابعًا: بلاد “الهرم”:

    وهناك هتلاقي “الرُّكْنَة” فى المريوطية، طريق شبرامنت، أمام فندق “جراند بيراميدز”، عمارة 51، الدور الثاني، وبيبقى عندك الشاي والقهوة Free طوال الوقت، والنت هناك كويس جدًا، بيفتحوا يوميًا ماعدا الجمعة أو الأحد (بالتناوب) من الساعة 10 صباحًا: 10 مساءً، ودي صفحتهم على الفيسبوك.

    خامسًا: بلاد “مصر الجديدة”:

    ودي هتلاقي فيها Eco Space فى 8 شارع الشهيد محمد عبد الهادي من شارع الثورة فى هليوبوليس، بيفتحوا يوميًا من الساعة 10 صباحًا: 10 مساءً، لكن يفضل قبل ما تروح تتصل تعرف المكان متاح ولا لأ علشان الفعاليات اللي بتتعمل هناك وكده، ودي صفحتهم على الفيسبوك.

    وMariam Gallery فى عمارات المروة القديمة “عمارة الضرايب القديمة” بجانب مترو كلية البنات أرض الجولف – مصر الجديدة، ودول بـ يبقوا فاتحين يوميًا (ماعدا الجمعة) من 10 صباحًا لـ 10 مساءً، وعندهم مساحة هادية مخصصة للمذاكرة.

    أما بقى لو أنت من هواة الأماكن المفتوحة:

    عندك المساجد الأثرية القديمة، وأفضلها من حيث السعة والروح والجو ثلاثة: “عمرو بن العاص” في مصر القديمة.. وده بيبقى فاتح طول اليوم من الفجر لحد نهاية اليوم .. وهادي جدًا طول الوقت تقريبًا.

    الثانى “الحاكم بأمر الله” في نهاية شارع المعز، بيفتح يوميًا من 11 صباحًا لحد صلاة العشاء، لكن يفضل أنك ما تروحش في يوم أجازة (جمعة أو سبت) علشان بيكون زحمة جدًا في الغالب ومش هتعرف تركز.

    الثالث “السلطان حسن” في السيدة عائشة، بيفتح يوميًا من الصبح بدري لحد الساعة 5 عصرًا، وبيكون فاضي وهادي في معظم الوقت.

    وعندك كمان الحدائق العامة لو بتحب أجواء الخضرة وبتستريح فيها، لكن ابعد عن أيام الأجازات علشان أكيد هتكون زحمة و.. وبالتوفيق يا حضرة الطالب!

    مقترح