The Definitive Guide to Living in the Capital , Cairo , Egypt

كل فرد عاقل بـ يحتاج من فترة للثانية أنه يعمل حاجة خارجة عن المألوف، تخرج الطاقة المُخزنة جواه سواء غضب، أو مشاعر مكبوتة، أو مجرد الملل، وبـ يسعى أنه يعمل حاجة فريدة تشعره بالإنجاز والسعادة. وفيه طبعًا أشخاص دي طبيعتهم أصلاً.. بس دول ربنا معاهم بقى علشان حياتهم كلها مخاطرة لا تنقطع، دول بقى اللي يقولوا لنا نعمل إيه.

كايرو 360 جمعت كل الأنشطة غير التقليدية والمفعمة بالحركة اللى ممكن تمارسها في القاهرة، استعد للرحلة، علشان هـ تخلص الموضوع محضر شنطة سفرك وحاجز تذكرتك وطيران على هناك.

مبدأيًا كده عندك شرم الشيخ والغردقة والجونة دول فيهم أنشطة كثير جدًا ممكن تستمتع بها، غير أنك هـ تستمتع بالبحر والجو وتخرج.

أولًا الغطس هناك حكاية لأن الشعب المرجانية والأسماك اللي في البحر الأحمر أكثر من رائعة، كمان لو رحت الـ Blue Hole (الثقب الأزرق) هـ تستمتع بأجمل شعب مرجانية ممكن تشوفها في حياتك. وفيه فنادق فيها أكوا بارك هناك ممكن تستمتع بها.

كمان الإبحار بالمظلات والتجديف (في نادي التجديف في القاهرة) والأجمد بقى من كل دول القفز بالمظلات اللي برضه مش في الغردقة وشرم بس، لأنك ممكن تتعلمه في نادي الشمس أو تسأل في الاتحاد المصري للقفز بالمظلات وألعاب الهواء.

ممكن كمان تتسلق الجبال في سيناء بالذات جبل سانت كاثرين، فين روح المغامرة؟!

وممكن تعمل تخييم (Camping) في صحراء سيناء أو في واحة سيوة أو الصحراء البيضاء، وتجرب حياة البدو وتتعرف على ثقافتهم، من أجمل متع التخييم أنه بـ يعرفك على الطبيعة الصحراوية اللي مش كلنا نعرفها، وطبيعة الحياة الهادئة هناك اللي بـ تخليك تستمتع وتسترخي تمامًا.

والأجمل من ده التزحلق على الرمال، ورحلة السفاري اللي موجودة في الصحراء المصرية بس أحسن مكان بحر الرمال الأعظم، وحضرتك مش محتاج توصية أنك لازم يبقى معاك خبير في الأماكن من البدو، علشان ما ينتهيش بك الحال وأنت تايه في الصحراء وبـ تتخيل أي حاجة بئر مياه وتغني: “عطشان يا صبابا دلوني على السبيل”، ولا في حقل ألغام وواقف محلك سر زي عبود على الحدود، أو  غرقان مع الرمال المتحركة. بغض النظر عن المخاطر التجربة دي مالهاش زي، كأنك بـ تتزحلق على الثلج، بس الرملة حلوة وماله.

لكن المكان المجهول اللي مش كل الناس تعرفه ويعتبر جنة الله على الأرض في بساطة الجمال رحلة بحيرة البرولس، ودي بـ تبقى عبارة عن مركب بـ تركبها وتمشي بك في البحيرة، المركب بدائية جدًا، نسبة لأنها مركب صيادين، بس أول ما بـ تدخل في وسط البحيرة، بـ تحس كأنك بقيت سمكة أو طائر نورس، بـ تتعمل ساندويتش بين المياه والهواء، سرعة المركب مع الهواء والمياه اللي بـ تتطاير على وشك، كمان بعد كده بـ تروح في منطقة كثبان رملية على طريق مصر إسكندرية الصحراوي، وتكتشف جمال الرمال لما ربنا حب يبدع في صنعها، بـ تجري وسط الكثبان الرملية العالية كده ومافيش حد ممكن يوقف انطلاقك وسطها.. مخك بـ يصفى جدًا وبـ ترجع شخص جديد.

كمان لو رحت يوم الفيوم وقضيته في وادي الحيتان أو وادي الريان، أو لو عاوز تصفي ذهنك بس، فندق الأوبرج هناك أكثر من رائع وبـ يطل على بحيرة، وعنده مكان خاص ممكن لو رايح أنت وصحابك تعدوا فيه على البحيرة على طول.

كمان رحلة وادي وشوشني ورأس شيطان (جنب شرم الشيخ) من أروع الأماكن اللي هـ تمتع بها عينيك وذهنك، لأنك بـ تبقى قاعد في منطقة جبلية وفي نفس الوقت أمام البحر، ولو أنت محظوظ تطلعها في منتصف الشهر القمري، هـ يبقى القمر مكتمل وأمامك مع البحر والطبيعة.. ادعي لنا بقى لما تروح، وفيه بعض الرحلات بـ تعمل معها دورات تأمل.. يعني منتهى المزاج والاستجمام.

وممكن تحجز الرحلات اللي فيها الأنشطة دي يا سيدي الفاضل من: Kites ورحالة وسفاري التزحلق على الرمال، أما بالنسبة للفنادق، فيه منها بـ يوفر لك الأنشطة اللي فوق وأنت بـ تسأل قبل ما تحجز عامة لأن الأسعار متغيرة.

لكن لو مش عاوز تخرج بره القاهرة تعالى نقول لك على أماكن جميلة ممكن تعمل فيها أنشطة مختلفة.

بصي يا سيدي، عندك فجنون، كثير منكم عارفها، ده مكان فيه فنون الخزف وركوب خيل واللعب بالألوان وعمل حرب بالألوان وأنشطة ثانية كثير للكبار والصغيرين، الميزة فيها أنها بـ ترجعك لعفوية الطفولة، بـ تلعب لعب كثير وكأنك دخلت عالم الأطفال بتاعك ومش عاوز تخرج منه.

أما لو عاوز تحس بروح المغامرة في الغابة وتقلد طرزان، بس مش قوي يعني جرب تروح أفريكا سفاري بارك، ممكن تشوف الموضوع اللي كتبناه عنه من هنا. الجميل فيه أنك بـ تعيش مع الحيوانات وهي منطلقة في البارك بمنتهى الحرية، وأنت في عربيتك بـ تأخد جولة حرة وممكن تأخذ جولة في النيل كمان والمكان مش بعيد على طريق مصر إسكندرية الصحراوي.

أو تروح تركب خيل في الريف العربي للخيول اللي بـ توفر لك الخيل وعرض التنورة المميز، كمان ده ممكن تشوف موضوعنا فيه من هنا.

وممكن تجرب تستنى الشروق على هضبة المقطم بس طبعًا ما تبقاش لوحدك وتخلي بالك علشان دي منطقة مقطوعة.

كمان ممكن تروح مع صحابك الأزهر بارك، وتلعبوا هناك (Hide and Seek) أو البحث عن الكنز (Treasure Hunt)، أو تملأ بلالين كبيرة بألوان مياه وتغرقوا بعض بها، ممكن تحيب جردل كبير وفيه صابون ومياه وتعمل فقاقيع مائية (Bubbles) وتقعدوا تفرقعوها، لكن لو نفسك تتجنن بجد، خلي الأطفال اللي عندك في البيت أو فى دار الأيتام اللي بـ تروحها يعملوا لك تسريحة مختلفة في شعرك (بالذات البنات)، هم هـ ينبسطوا وأنتم كمان، بس نصيحة من غير مقصات ولا أي أدوات حادة، مش ناقصين حوادث لأحسن تلاقي نفسك زي الفرخة المنتوف ريشها.

الجنان مش بس فكرة.. الجنان أسلوب حياة.. مش شرط يكون معنى جنانك أنك خلاص بقيت بشهادة المستشفى مختل عقليًا، ولكن فيه جنان محمود وهو الخروج عن مربعات ومثلثات المجتمع، بأننا نخترع مربع دائري أو دائرة مستطيلة، ونسمي أفعالنا دي أفعال مجنونة طائشة مالهاش أي علاقة بالعقل أو الرزانة أو الخضوع لقيود الروتين. استمتع بحياتك على قد ما تقدر من غير ما تضر نفسك أو اللي حولك، وعيش الحياة بروح المغامر اللي جواك، اللي بـ يشوف كل حاجة على أنها هدية من عند ربنا لازم يستفيد منها ويحمده عليها.