أفريكا سفارى بارك: حياة الأكشن على طريق مصر إسكندرية الصحراوي - الحياة في كايرو Feature - كايرو 360
 







أفريكا سفارى بارك: حياة الأكشن على طريق مصر إسكندرية الصحراوي
أفريكا سفارى بارك: حياة الأكشن على طريق مصر إسكندرية الصحراوي
اصدرت في: 09/09/2014

عارفين فيلم أفريكانو؟.. وأنت بـ تتفرج ما قولتش فى سرك: "الله! إيه المكان الحلو ده"، هو الواحد يعنى لازم يسافر أفريقيا علشان يقدر يتعامل مع الحيوانات دى ويلعب ويتصور معاها مباشرة ويقضى كام ساعة فى هدوء فى جو الغابات الإستوائية؟ حتى لو ما كنتش من هواة الحيوانات بس أكيد المكان جذبك، وتخيلت ولو للحظة أنك أحمد السقا!

طيب كايرو جايبة لك تجربة جديدة.. هى مش جديدة أوى من 2004 تقريبًا، لكن مختلفة جدًا، أفريكا سفارى بارك.. وكأنه جزء من غابات أفريقيا الإستوائية، المكان فعلاً يستحق أنك تروحه.

المكان مش بعيد أوى عند الكيلو 65 علي طريق مصر إسكندرية الصحراوى حوالي ساعة ونصف من رمسيس تقريبًا.. الحديقة عبارة عن غابة مفتوحة، بعض الدارسين قالوا عنها أنها أكبر حديقة حيوان مفتوحة فى مصر والشرق الأوسط تقريبًا، بها عدد لا بأس به من الحيوانات البرية من المفترسة والأليفة والزواحف... إلخ، الجميل فى الرحلة أنك بـ تتفرج Live، ده حقيقي.. الحيوانات أمامك مش مقيدة ولا محبوسة وممكن تتصور مع الأليف منها وتستمتع بجو مغامرة غريب يكاد يعزلك عن عالمك الخارجى تمامًا.

تكلفة الرحلة لدخول السيارة الواحدة 350 جنيه، أيًا كان عدد الأفراد بها، وتشمل التكلفة السفارى والرحلة البحرية ودخول الكهف، وللمجموعات بداية من 28 شخص 55 جنية للفرد، والميكروباص 550 جنيه، لازم تدخل الحديقة بعربية، ده من شروط الحديقة علشان تتحرك وسط الحيوانات المفترسة بسهولة.

 

برنامج الزيارة:

رحلة سفارى، أول ما تدخل هـ تلاقى أسهم بـ تدلك على الطريق للحركة بسهولة، الرحلة سريعًا هـ تأخذ من وقتك 45 دقيقة، لكن لو عاوز تتصور وتغازل الحيوانات الأليفة ده حسب رغبتك أنت.. إحنا عن نفسنا قعدنا من 10 صباحًا لحد 6 مساءً زى الكتاب ما بـ يقول بمعنى أصح، لازم تلتزم بالتعليمات زي عدم إلقاء مخلفات على الأرض، قفل شبابيك العربية أحيانًا.. إلخ.

من أشهر الحيوانات اللى موجودة في الحديقة: النمر، وده تقريبًا أول حيوان بـ يستقبلك، اللاما، سيد قشطة، النعامة، الغزلان، الأسد اللبؤة، ببغاوات بألوانها المبهجة، بعدين بقى القرود شكلها مضحك بطريقة هيستيرية وهم بـ يتنططوا على العربيات وهى بـ تتجول في الحديقة، وبـ يطاردوك.

يليها الرحلة النهرية، ودى ثانى مرحلة من الرحلة، لطيفة جدًا بـ تستغرق حوالى ربع ساعة، مرينا على شلالات صناعية لكن مُنفذة بطريقة دقيقة جدًا، والأشجار المليئة عشش الطيور والقرود وهى بـ تحوم حولك وبـ تزاولك، كمان بـ تقدر تتفرج على التماسيح على الطبيعة، النسناس، والشمبانزي.. إلخ.

وبعدها الكهف: وده آخر مكان فى الغابة، هو جزء مهيء كبيئة للـ 22 نوع من الزواحف والطيور النادرة، داخل عدد من الغرف المغلقة بـ تتفرج من بره وهى مقفولة زي الثعابين، النسر، الصقر، البومة، السلحفاة، الورال، الجربوع، الحرباء، الوطواط والزقزاق.. وهكذا.

بعد كده تعبنا جدًا الحقيقة كان لازم نروح نتغدى، ممكن تكون عامل حسابك فى وجبة غداء من البيت، لو مش عامل حسابك هـ تلاقي مطعم هناك اسمه "زامبيزى" بـ يقدم الأكل على مع الموسيقى الأفريقية أغلبها مشويات وأسماك مختلفة، المطعم بـ يطل على نهر وشلالات بـ تعيش فيها الزواحف والتماسيح، المنظر كان روعة الحقيقة، وكأنك فجأة سافرت أفريقيا.

نيجى بقى على الجزء الترفيهى، وده الحقيقة كان بالنسبة لنا مفاجأة لأننا لقينا أنشطة كثير ممكن نمارسها زى التنس وكرة القدم والطاولة، والهوكى، والبلياردو.. إلخ.

كمان اكتشفنا حاجة كده مش ع البال هى "أفريكا موتيل" وده لو قررت تكمل عزلتك لمدة يوم ولا أكثر وتبات في الحديقة، هـ تلاقي فندق صغير فى جزيرة بـ يطل على نهر منعزل عن الحديقة تمامًا بـ توصله من خلال سفينة نهرية، الفندق بـ يتميز بهدوء رهيب، تقريبًا ما بـ تسمعش غير أصوات الطيور المهاجرة، كل غرفة فيها حمام سباحة وتراس، ولو عددكم كبير ممكن تأخذوا جناح وبـ يزيد عليه حديقة خاصة، بالإضافة لوجود خزينة، مينى بار، تكييف وتليفزيون فى كل منهم، أنت كمان ممكن تصطاد سمك من غرفتك، أما عن الأسعار شاملة الإفطار، ورحلة سفارى، والكهف والرحلة النهرية: الغرفة العادية 1200 جنيه، والغرفة المتميزة بــ 2000 جنيه، والجناح بـ 3000 جنيه.. بالإضافة إلى إمكانية تنظيم حفلات زفاف وشهر عسل حسب الاتفاق مع إدارة الفندق.

مواعيد البارك من 9 صباحًا لحد 6 مساءً، وممكن تدخل على موقعهم على الإنترنت علشان تعرف معلومات أكثر، أو اتصل بهم على تليفون 0127126235، 0104712576، 0123600967، 0101175098.

مزيد من الصور
  • أفريكا سفارى بارك: حياة الأكشن على طريق مصر إسكندرية الصحراوي
  • أفريكا سفارى بارك: حياة الأكشن على طريق مصر إسكندرية الصحراوي
  • أفريكا سفارى بارك: حياة الأكشن على طريق مصر إسكندرية الصحراوي
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
منى أبو عامر
حرر بواسطة:
منى أبو عامر
تاريخ النشر:
09/09/2014
كاتبة، حماسية جدًا. حبت القراءة على كِبر، واكتشفت كمان أنها بـ تعرف ترسم وهي عندها 20 سنة، بـ تحب التصوير أوي لكن مش موهوبة، بـ تحس بمتعة رهيبة وهي بـ تشتغل إكسسوار Handemade بحب، بـ تحب الحياة وكوكي بنتها جدًا.