زهقان؟ أماكن غير تقليدية للخروج في العيد
Nagla Ashraf
العيد فرحة وبهجة ولمة الأهل والأصحاب، مش بيتحس بيه إلا لو العيلة متجمعة وسعيدة سواء في البيت أو في أي مكان تاني، ولأن الناس بتزهق بسرعة من قعدة البيت حبينا نقترح عليكم أماكن غير تقليدية للخروج في العيد.
شارع المعز
من الأماكن اللي مليانة حاجات جديدة ممكن تجربها، زي السوبيا المززة من عند الكيلاني، أو أنك تضرب كبدة بالردة وتحبس بعدها بعصير قصب فريش. بس الأكيد إن أنوار شارع المعز بالليل وسط هيبة المساجد الأثرية، وجمال الشارع الصبح وسط بياعين غزل البنات والفشار والبلالين كافيين أنهم يغيروا مودك ويفرحوك بالعيد.
ski Egypt في مول مصر
من الأماكن اللي فتحت جديد في مصر، وبدأت تجذب الأطفال والكبار بالتجهيزات اللي عاملينها علشان يوفروا مساحة كبيرة من الجليد للتزحلق، ده غير البطاريق. بس برضه مول مصر بيعمل حفلات مختلفة ممكن تستمتعوا بيها غير محلات الأكل.
حديقة الأزهر
حديقة الأزهر مش بس مكان مثالي أنك تفصل عن الدوشة وزحة العربيات، لكن مسرح الجنينة كمان بيقدم عروض مختلفة تقدروا تستمتعوا بيها. غير ان لو عنك أطفال صغييرين ممكن تطيروا بلالين هناك أو تعملهم ألعاب خاصة بيهم وتقضوا يوم خاص سوا.
أنليشد
أما لو كنت مضغوط في رمضان ما بين عزومات وزحمة في الطريق ونرفزة شغل، فمافيش مكان أفضل من أنليشد تتخلص فيه من غضبك علشان تستمتع بالعيد. وده مكان تقدر تصرخ فيه براحتك وتكسر كل اللي أنت عاوزه وانت مترفز. وكنا كتبنا عنه مقال فيه كل المعلومات اللي هتحتاجها هنا.
شقة جاردن سيتي
لو أنت من أصحاب المزاج العالي وبتحب تسمع أغاني الست وفيروز وعبد الحليم وسط ديكور قديم، يبقى مكانك شقة جاردن سيتي واللي بتقدم قعدة هادية في وسط البلد تفصلك عن الدنيا.
وتقدر تعرف أكتر عن المكان من هنا.
