The Definitive Guide to Living in the Capital , Cairo , Egypt

مهرجان الفول: حدث مميز لتحقيق رقم عالمي لأكبر طبق فول

مهرجان الفول: حدث مميز لتحقيق رقم عالمي لأكبر طبق فول
written by
Cairo 360

بالرغم من أن مطبخنا المصري عامر بالأكلات المميزة، واللي مش ممكن تأكلها في حتة ثانية في العالم زي الكشري والطعمية، إلا أن الفول هو ملك الأكلات المصرية بلا منازع؛ مش بس لأنه مغذي وحنيّن على الجيب، ده كمان بـ تحويجاته وطرق عمله المختلفة من منطقة للثانية -لدرجة أن مطاعم كثيرة بدأت تطلع بأفكار جديدة لعمله- كل ده يخليه أكلة مناسبة لأي وقت في اليوم.

علشان شركة كنور فاين فوودز بـ تشجع الأكلة الحلوة، وعارفة كمان قد إيه أهل كايرو بـ يحبوا الأكل، قرروا أنهم يقدموا لنا حدث غريب ومتميز الويك إند ده.

هو صحيح مهرجانات الأكل بدأت تنتشر في القاهرة من فترة، بس المهرجان ده بالذات مش بعيد يكون هو الأحسن؛ لأن المهرجان المرة دي –والمقام في حديقة الحرية بالزمالك يوم 21 مارس- هـ يحاول صنع أكبر طبق فول في العالم، واللي بـ يقولوا أن مساحته هـ تبقى حوالي 100 متر مربع.

إحنا كـ "كايرو 360" متحمسين ومتأكدين أنه هـ يكون أكبر وأحلى طبق فول في العالم كله، لأن شركة كنور فاين فوودز بعثت لنا –في لفتة كريمة ولذيذة منهم- عينة من الفطار المصري الأصيل اللي هـ يبقى موجود يوم المهرجان.

بجانب الرقم العالمي اللي الحدث قائم عليه بشكل أساسي، هـ تشارك العديد من المطاعم في الحدث بعرض مجموعة من مأكولاتها… يعني اللي بـ يفكر يعمل دايت ينساه تمامًا في اليوم المهم ده.

مش بس كده، هـ يكون فيه كمان بازار معروض فيه منتجات لماركات ومصممين محليين، وفي آخر اليوم المميز ده، هـ يكون فيه حفل موسيقي بـ تقدمه فرقة وسط البلد؛ وهي من أكبر الفرق المحلية المشهورة بأغانيها اللي لها طابع روك شرقي.  

اليوم هـ يبدأ الساعة 2 الظهر، وهـ يستمر لبقية اليوم بمجموعة كبيرة من الأنشطة المسلية لأي حد، يا ريت بس يكثروا من العيش البلدي وما ينسوش المخلل بس علشان ما نقدرش نأكل فول من غيرهم.

لمعلومات أكثر عن  الحدث والتذاكر اضغط هنا، أو صفحة الفيسبوك الرسمية لكنور.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح