The Definitive Guide to Living in the Capital , Cairo , Egypt

الحياة في كايرو

هتفطر وتتسحر فين؟ رمضان أحلى في أجمد خيام القاهرة الرمضانية

هتفطر وتتسحر فين؟ رمضان أحلى في أجمد خيام القاهرة الرمضانية
بواسطة
Cairo 360

طبعًا كلنا في القاهرة بننتظر رمضان من السنة للسنة، هو في أحلى من رمضان وليالي رمضان وسهرات رمضان؟ طبعًا مفهوم إن رمضان هو شهر التواضع والتعبد، بس ده ما يمنعش إن له سحر خاص، سحر في أكله، سحر في الصحبة الحلوة وغيرها من الأوقات اللي صعب تتنسي.

كل القاهرة السنة دي استعدت كويس، من فنادق لأماكن خروج بمختلف أنواعها علشان يقدموا لنا خيام رمضانية على أعلى مستوى. الخيام السنة دي بتقدم حاجات متنوعة أكيد هتعجب معظم الناس من أكل لترفيه لمفاجآت ثانية – علشان كده جمعنا لكم عدد من أجمد الخيام الرمضانية في قاهرة المعز.

 

عالكورنيش – فيرمونت نايل سيتي

بعد نجاحهم في رمضان على مدار سنين كثير وتقديمهم لخيام رمضانية هايلة زي رمضان زمان والليلة الكبيرة و1001 ليلة، فيرمونت نايل سيتي رجعت ومعاها خيمة "عالكورنيش"، وفيه بيقدموا كل حاجة بنشوفها على كورنيش نيلنا الجميل زي عربيات الذرة والحمص، وطبعًا أحلى الأكلات والعروض الترفيهية وغيرها من الاحتفالات الرمضانية. لمعلومات أكثر عن عالكورنيش والحجز، كلموهم على 01286188880.

 

وحوي رمضان لاونج – الباشا 1901

خيمة وحوي لاونج رجعت للسنة الرابعة على التوالي، وهي أكيد من أشهر الخيام الرمضانية في الفترة الأخيرة اللي بتقدم تجربة رمضانية مميزة. وحوي تعتبر من أحلى أماكن السحور اللي تقدر تستمع فيها بألعاب الطاولة وتتفرج على مسلسلاتك المفضلة وطبعًا ماتشات يورو 2016 المنتظرة. وحوي كمان بتستضيف كل ليلة تخت شرقي، مع عرض ماتشات يورو 2016 وفنان مشهور "مفاجآة" بيسهر في الخيمة. للحجز ومعلومات أكثر، اتصل على 01227703329.

 

عالطاولة – جاليريا40

بعد النجاح الكبير لخيمة المولد في جاليريا 40 السنة اللي فاتت، غالبًا المكان المميز في الشيخ زايد هيمشي على نفس الخطوات ويقدم لنا "عالطاولة" في رمضان. من أبرز الحاجات في الخيمة دي إن الأكل بيتقدم من مطاعم جاليريا40 زي جابيز وتشاتشيمبا وأيادينا وغيرهم، وبكده نضمن وجود تنوع كبير في الأكل. للحجز ومعلومات أكثر، اتصل على 01090410438 أو 01113005140.

 

رمضانا – بورجندي

طارق نور وخيمته الرمضانية الشهيرة "رمضانا" كانت أول من أسس للشكل الحديث للخيمة الرمضانية اللي بنشوفها حاليًا. تقدروا تزوروا الخيمة المتنقلة السنة دي في مطعم وبار بورجندي الموجود في القاهرة الجديدة. بنتوقع كالعادة أكل رائع مع أجواء ترفيهية ساحرة وتجربة رمضانية فخيمة زي ما تعودنا منهم.

 

وسط البلد – ريتز كارلتون النيل

فندق ريتز كارلتون النيل محتفظ بسحره وبيقدم لأول مرة خيمة رمضانية للسحور مستوحاة من أجواء وسط البلد. خيمة وسط البلد ناوية تقدم تجربة سحور ما حصلتش تجمع بين فخامة الفنادق مع الأجواء البسيطة المريحة اللي كلنا محتاجينها بعد الفطار. للحجز ومعلومات أكثر، اتصل على 0225778899.

 

سي عمر – فيرمونت هليوبوليس

من 2005 ولحد النهارده قدرت سي عمر تثبت نفسها ضمن أحلى الخيام الرمضانية في المحروسة، وكل سنة بتزيد حلاوتها عن اللي قبلها، وواضح أن خيمة فيرمونت المميزة استعدت كويس جدًا لرمضان 2016. الخيمة هتفتتح رسميًا يوم 8 يونيو، ولغاية دلوقتي مانعرفش شكل الخيمة عامل إزاي، بس الأكيد إننا في انتظار حفلات التخت الشرقي والعود كل يوم، وكاريوكي كل يوم اثنين وطبعًا بطولات بلاي ستيشن أيام الثلاثاء وماتشات بطولة يورو 2016. للحجز ومعلومات أكثر، اتصل على 0222678441.

 

في التراس – 1925

تعتبر 1925 في نايل سيتي تاورز من أبرز الأماكن في القاهرة اللي بتقدم تجربة ما تتنسيش. المطعم والبار المميز بيقدم خيمة فخيمة في رمضان وهي "في التراس" بتجمع بين الأناقة والشكل التقليدي للخيمة اللي كلنا بنحبه، مع عروض ترفيهية ودي جي كل يوم وشاشات بتعرض المسلسلات والماتشات. للحجز ومعلومات أكثر، اتصل على 01000606566.

 

فوانيس – سميراميس إنتركونتيننتال

سميراميس إنتركونتيننتال أكيد بيستغل موقعه المميز أحسن استغلال، والسنة دي بيرجع لنا بخيمته الرمضانية "فوانيس" من جديد في النايل تراس. فوانيس السنة اللي فاتت قدمت أجواء رمضانية رائعة تتميز بالشياكة والفخامة مع أكل هايل وأجواء ممتازة يخلوها من أحلى أماكن السحور.

 

ليالي رمضان – ريفر سايد

قدر ريفر سايد يقدم أوراق اعتماده السنة اللي فاتت باعتباره واحد من أجمد أماكن السهر والأكل والترفيه، ورمضان السنة دي مع ريفر سايد مليان مفاجآت وحفلات لامتاع جمهورهم، مع فنانين محبوبين منهم عدوية وبوسي وحمدي باتشان وغيرهم. أضف على الكلام ده أكل ريفر سايد الممتاز وبكده تقدر تستمتع بسحور مالهوش مثيل.

 

فوانيس – آب تاون كايرو

فوانيس رجعت مع آب تاون كايرو للسنة الثانية على التوالي، ونسخة السنة دي متوقع إنها تكون أكبر وأجمد. الافتتاح كان يوم الجمعة 10 يونيو وكان الموضوع كبير، شاشات التليفزيون عرضت ماتشات يورو 2016 وبعدها حفلة للفريق الاسكندراني مسار إجباري. الخيمة بتستغل الموقع المميز للكلوب هاوس، وواضح أنهم هيقدموا تجربة سحور ماحصلتش. للحجز ومعلومات أكثر، اتصل على16129  أو 01283557000.

 

 خيمة زمان – أرابيلا

في القاهرة الجديدة وداخل كومباوند أرابيلا ميعادنا مع تجربة مميزة، خيمة زمان بتقدم لكم جو رمضاني مليان حنين للماضي، هناك هتقدر تلعب طاولة ودومينوز، وهتحس بأحلى إحساس وانت بتسمع التخت الشرقي وبتتفرج على عروض الفلكلور، الجميل أن القعدة ممكن تبقى عائلية مش بس مع أصحابك، لأن في منطقة ألعاب مخصصة للأطفال.

ولو كنت مهووس بالبلاي ستشن فهتقدر تلعب براحتك في خيمة زمان، ده غير شاشات العرض لعشاق المسلسلات والمبارايات الرياضية. للحجز والاستعلام 01065515406.

 

الخديوي – كمبينسكي رويال مكسيم 

أول رمضان لكمبينسكي رويال مكسيم أكيد هيمتعنا بفخامة الفندق وواضح أنهم ناويين يعملوا ضجة شديدة. بعيدًا عن العروض المتنوعة اللي بتقدمها مطاعم الفندق ( وطبعًا المنتجع الصحي الرائع الخاص به)، خيمة الخديوي واضح إنها ناوية تعمل تجربة رمضانية خيالية في القاهرة الجديدة. الخيمة بتقدم فطار وسحور مع عروض ترفيهية وشيشة على أعلى مستوى طول أيام الأسبوع وسط أجواء شرقية فخمة. لمعلومات أكثر، كلمهم على 0223899000.

 

سمعة باشا – ماريوت القاهرة

خيمة سمعة باشا في ماريوت القاهرة بتلعب على وتر الحنين للماضي اعتمادًا على تاريخ المبنى العريق، والحقيقة إن الخيمة حققت نجاح كبير في رمضان اللي فات بفضل عربيات الأكل والعروض الترفيهية والأجواء الشرقية الممتعة اللي تشمل عروض حية وطبعًا ماتشات يورو 2016. نقدر نقول على سمعة باشا من الأخر إنها خيمة ممتعة لكل الناس على اختلاف أذواقهم.

 

اللمة الحلوة – كونراد القاهرة

خيمة اللمة الحلوة احتلت مكان اللاونج والبار المميز "جايدا" الموجود في فندق كونراد، وأكيد هتقدم أوراق اعتمادها كواحدة من أهم الخيام الرمضانية في القاهرة. عندك يا سيدي إطلالة روعة على النيل وحفلات غنائية وتخت شرقي كل يوم مع فنانين معروفين كل أسبوع، وكل ده وسط أجواء رائعة تتميز بالبساطة مع أكل هايل.

مقترح