The Definitive Guide to Living in the Capital , Cairo , Egypt

تسوق
آشلي فيرنيتشر – Ashley Furniture

آشلي: أثاث أمريكي راقي ومريح وبأسعار معقولة في سيتي ستارز

  • مول سيتي ستارز - الدور السابع - مدينة نصر
  • أثاث ومستلزمات منزل
تم التقييم بواسطة
Cairo 360
قيم
قيم الآن
آشلي: أثاث أمريكي راقي ومريح وبأسعار معقولة في سيتي ستارز

القعدة أمام التليفزيون مع الأصحاب أو الأحباب أو حتى لوحدنا محتاجة حاجة مريحة، وبصراحة مع كل مرة كنا بـ نحاول فيها أننا نجرب قدر الراحة في ركنة أو أنتريه بـ نشوفه، كنا بـ نتضايق من أن التنجيد ناشف شوية، أو طري لكن ضعيف جدًا مع الاستعمال هـ يهبط، التنجيد كان مشكلتنا الأساسية.

يمكن الأماكن الوحيدة اللي التنجيد فيها بـ يكون مريح وظريف هي الحاجات الأمريكانى، لاحظنا أن اهتمامهم بوجود كميات خشب بارز وشغل أويما معدوم مقارنة بالراحة، اللي هي الهدف الأساسي من الرُكنة أو الأنتريه، لكن كمان لاحظنا أن أسعارهم أوفر بالمعنى الحرفي للكلمة، يعني رُكنة صغيرة ممكن تدخل في 20 ألف جنيه، وأنتريه بسيط جدًا ممكن تلاقيه بـ 18 ألف جنيه، الأسعار دي ما عجبتناش، وقررنا ندور على حاجة مش أمريكاني لكن بنفس الجودة، لحد ما عرفنا عن الخصومات اللي عند آشلي.

آشلي له فرع واحد بس في سيتي ستارز، المحل ده تبع “إن & أوت”، لكن الحاجات اللي معروضة فيه مختلفة تمامًا عن كل المعروض في إن & أوت، في الذوق والشكل تحفة، وعندهم تشكيلة أنتريهات وركنات أكثر من رائعة، عجبنا مجموعة كبيرة من الأنتريهات، لكن اختارنا في الآخر ركنة، مش هـ نقول لكم طبعًا عن التنجيد المحترم المريح للحاجة عندهم، لكن هـ نتكلم في الأسعار والمعاملة.

أولاً المعرض كبير وطريقة العرض فيه ظريفة جدًا، وفيه إمكانية لتجربة الجلوس على الأثاث المعروض، طبعًا عندهم غرف نوم أمريكان من غير دولاب، وعندهم وحدات أدراج، وترابيزات وأباجورات وتحف، وغرف جلوس مختلفة.

عندهم إمكانية اختيار أي قطعة لوحدها مش لازم الطقم على بعضه، يعني ممكن نشتري الكنبة بس، أو الكرسي بس، أو كرسي وكنبة بس، مش بـ يجبروا الزبون على حاجة، هو وذوقه، البائعين متحمسين وبـ يتعاملوا بطريقة حرفية، وبـ يوضحوا كل حاجة للناس.

لما روحنا كان فيه خصم 30%، وده نزل أسعار كثير من الغرف اللي كانت بـ توصل لـ 19 و20 لـ 15 و14 و12 كمان، التعامل معاهم مريح جدًا، مجرد ما بـ تختار حاجة وتدفع جزء أو بالكامل، النقل والتركيب والتطليع مجانًا لحد الدور الثالث بعد كده الدور بـ 15 جنيه!

لو اخترت حاجة وحبيت تبدلها مافيش مشكلة، أكثر حاجة تعبتنا هي حساب الخصم، لما تحاول تحسب السعر بـ تضطر تحسب ثمن كل قطعة منفصلة، وتطبق عليها الخصم علشان تقدر تعرف السعر النهائي وإذا كان مناسب ولا لأ، طبعًا دي عملية مرهقة خلتنا في أول زيارة مش عارفين نركز في الحساب ولا في الاختيار والمفاضلة بين الحاجات الكثير المعروضة، في النهاية اضطرينا نزورهم مرة كمان، وفي الزيارة الثانية اكتشفنا أن فيه حاجات ما قدرناش نشوفها من عدم التركيز في المرة الأولى.

من حسنات آشلي، أنها تكاد تكون المكان الوحيد في مصر اللي الحاجات المعروضة فيه هي هي اللي موجودة على موقعهم الإلكتروني، عاوزين نقول لكم أننا مشينا في المرة الأولى مرتبكين ومش فاهمين من كثر دربكة الأسعار وكثر الحاجات المعروضة، ولما دخلنا الموقع اختارنا حاجات معينة ولما روحنا المرة الثانية شوفناها كأننا بـ نشوفها للمرة الأولى، لذلك ننصحكم لما تروحوا تزوروا الموقع الأول، وتعرفوا حجم الخصم على القطع اللي أنتم عاوزينها وما تقلقوش لأن الواقع نسخة من الموقع، صحيح بعض الحاجات ما كانتش متوفرة، لكن حوالي 90% من الموجود بالموقع موجود في العرض.

نصيحة 360

زوروا الموقع الإلكتروني الأول.

أحسن حاجة

المعاملة من البائعين، والخصومات، والجودة الخاصة بالركنات والأنتريهات.

أسوأ حاجة

عدم كتابة السعر النهائي للغرف الكاملة، قبل الخصم أو حتى بعده.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح