The Definitive Guide to Living in the Capital , Cairo , Egypt

تسوق
أبو عوف – Abu Auf

أبو عوف: بيت المكسرات بيقدم مخلل وعسل وفواكه مجففة في مول مصر

  • مول العرب – الدور الثاني – بوابة c
تم التقييم بواسطة
Ramy Soliman
قيم
قيم الآن
أبو عوف: بيت المكسرات بيقدم مخلل وعسل وفواكه مجففة في مول مصر

روحنا في زيارة لمول مصر اللي فتح أبوابه للجمهور من شهور قليلة وعمل ضجة كبيرة في كل أنحاء الجمهورية. وهناك روحنا الفرع الجديد لأبو عوف، وطبعًا إحنا ماكدبناش خبر ودخلنا نشتري شوية حاجات. أول حاجة بتخطر على بالنا لما تيجي سيرة أبو عوف هي المكسرات والفواكه المجففة، بس الحقيقة إنك هتلاقي عنده كل حاجة، من المخلل لغاية العسل بأشكاله وألوانه.

أول حاجة لاحظناها إن الفرع ده مش أكبر فروعهم، بس الميزة أنهم استغلوا كل شبر فيه كويس جدًا وكل حاجة معروضة بطريقة واضحة ومنظمة. على الشمال هتشوف ثلاجة فيها مشروبات باردة ومياه معدنية وكل أنواع البلح، وحاويات صغيرة مليانة فواكه مجففة ومكسرات أبو عوف وكمان فواكه مجففة مشكّلة. على اليمين هتلاقي كل أنواع المكسرات اللي إحنا عارفينها وكمان عندهم مكسرات بنكهات مختلفة.

أما المخلل وبذور الشيا والكينوا وغيرهم من الحاجات اللي بتتباع بكمية أقل فهتلاقيها معروضة على أرفف عند الكاشير. المفاجئة كمان إن العرض اللي في نص الفرع كان عليه منتجات محلية جنب منتجات أبو عوف.

أما عن أجدد منتجات أبو عوف فهي زبدة مكسرات، وقررنا نجرب منها زبدة لوز (260 جنيه) وزبدة فول سوداني (80 جنيه). يمكن سعر النص كيلو يخض شوية، بس قوام زبدة اللوز كان روعة ويا سلام على قطع اللوز الصغيرة اللي عملت طعم قوي ومميز. كان لازم نجرب حاجة جديدة ومختلفة بالزبدة دي، فاستخدمنا زبدة اللوز علشان نعمل طبق سموزي وفعلًا عملت شغل عالي، والغريب إن قطع اللوز بعد كل ده ماكانتش مطحونة كويس.

أما زبدة الفول السوداني فكانت قريبة من زبدة اللوز من ناحية القوام والملمس. أما من ناحية الطعم فتحسها فول سوداني خام، ودي حاجة كويسة لو هنطبخ بيها أو نعمل بيها حاجة حلوة. الفكرة هنا إن الزبدة دي صحية، وأكيد مش هتكون اختيارك الأول لو بتدور على زبدة زي الأنواع الموجودة في السوبر ماركت.

كان صعب نمشي قبل ما نشتري شوية لوز مدخن (50 جنيه/125 جرام) مع مكسرات مشكلة Trail Mix سعرها (81 جنيه/280 جرام) نقزقز فيهم. صعب تلاقي قرمشة زي قرمشة اللوز المدخن اللذيذ عند أبو عوف بطعمه المملح القوي ونكهته المدخنة اللي ممكن تضيفه على أي سلاطة عشان يغير من طعمها التقليدي.

نفس الكلام بالنسبة للمكسرات المشكلة اللي بتتكون من بلوبيري وعين جمل وزبيب وتوت أحمر وفستق مقشر ولوز. التنوع الجميل في المكسرات كان روعة وبكده تقدر تستمع بكذا نوع مكسرات في وقت واحد، وكمان إحنا عملنا اختراع باسمنا ورشينا شوية منها على طبق السموزي – ممكن تتفرجوا على الصورة في الأول.

في نهاية رحلتنا مع أبو عوف نقدر نقول إن زبدة المكسرات كانت هايلة، وكل المنتجات في الفرع الجديد معروضة بشكل أنيق، وكمان أبو عوف عنده ميزة مهمة وهي إنه بيستخدم في منتجاته أعلى جودة خامات ممكنة – كل اللي هنحتاجه إننا نطلب زيادة المرتب علشان نقدر نشتري من أبو عوف باستمرار.

نصيحة 360

مش عايز تدخل المحل؟ أبو عوف عنده كشك صغير في مول مصر قصاد كارفور.

أحسن حاجة

أبو عوف – جودة عالية منذ 1976.

أسوأ حاجة

أبو عوف – سعر غالي منذ 1976.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح