The Definitive Guide to Living in the Capital , Cairo , Egypt

تسوق

أفكار مجنونة، غريبة ومبتكرة لهدايا في القاهرة

أفكار مجنونة، غريبة ومبتكرة لهدايا في القاهرة
بواسطة
Nadine El Shiaty

هو صحيح فكرة الهدية في حد ذاتها كفيلة بأنها تقرب الناس أكثر من بعضهم، إلا أن الواحد ما يقدرش ينكر أن الهدايا متعتها في حاجتين: عنصر المفاجأة ومدى غرابة فكرتها، وبما أن موضة الدباديب والميداليات الفضة كهدايا راحت عليها من زمان، قررنا في كايرو 360 أننا نساعدك تقدم هدية ظريفة ومبتكرة بمجموعة من الأفكار المختلفة.

 

شموع:

زمان الشموع آخرها كانت تبقى Metallic ولها شكل حلزوني، وكانت بـ تستخدم في العزومات من غير ما حتى نولعها كنوع من أنواع الشياكة (ونوّلعها ليه لما فيه كهرباء، خسارة دي تقعد للعزومة الجاية). إنما دلوقت الشموع بقيت أشكال وأنواع وروائح ونكهات، ومش مجرد قالب مصمت مالوش لون، ده كمان فيه أماكن ممكن تعملها لك حسب الطلب، أو حتى تختار ما بين اللي عليهم كتابات بالخط العربي، مزينين بالنحاس أو حتى عليها نجوم أفلام الأبيض وأسود. وبالنسبة للأسعار، فهي بـ تترواح ما بين 40 وحتى 500 جنيه حسب الحجم والمكان اللي بـ تشتري منه الشموع.

هـ تلاقي مجموعة كبيرة في  كاندل مانيا – Candle Mania، هوم أند بيوند – Home & Beyond  وموقع Style Treasure.

                                      

كروت مختلفة عن المعتاد:

أكيد كلنا جاء لنا الكارت اللي عليه صورة دبدوب متعوّر عليه "ألف سلامة"، أو اللي عليه صورة لبوكيه ورد في فازة… بغض النظر عن أننا شبعنا منهم، همCute  وكل حاجة بس في نفس الوقت رسميين قوي على هدية لشخص قريب مننا، في مكتبة أ – Alef Bookstore، وديوان – Diwan، هـ تلاقي مجموعة كبيرة مختلفة ودمهم خفيف، عليهم أشهر الجمل اللي سمعناها في الأفلام المصرية، واللي تنفع في مناسبات كثيرة، سعر الكارت 10 جنيه… هو فيه أحلى من كده؟

 

مشغولات يدوية:

من الهدايا المبتكرة والمناسبة لأي سن وأي شخصية هي المشغولات اليدوية، لأن مجالها واسع ومنتجاتها كثيرة: زي قطع الخزف والتماثيل (15: 200 جنيه). شنط الباتش وورك (80: 130 جنيه)، حوامل الأكواب والصواني الخشبية (10: 15 جنيه للأولى) و (150: 400 جنيه للثانية)، وحدات إضاءة من الألباستر (15: 300 جنيه).

ده غير أن أماكن بيع المشغولات اليدوية منتشرة في كل مكان في القاهرة زي: ألتاي  – Altay، هوم أند بيوند – Home & Beyond، وصفحة Creative Egypt على الفيسبوك للمنتجات اليدوية المصرية.

 

شنط جلدية:       

ده اختيار مميز للبنات اللي بـ تستهويهم الموضة وخصوصًا القطع المختلفة منها؛ لأن كم المصممين المصريين الشباب اللي بـ يعتمدوا على التصميمات التراثية كثير ومتنوع، الأسعار بـ تبدأ من 300 جنيه، ولكن ده سعر نسبيًا مناسب لمنتجات جلدية بتصميمات مختلفة عن الموجود في الأسواق، ده غير أنك كده بـ تشجع صناعة بلدك، زور صفحة الفيسبوك لكل من ألاجا – Allaga، وسامي أمين.

 

وحدات إضاءة من الموزاييك:

لو أنت أو اللي بـ تهاديه لكم في الديكور، وحدات الإضاءة الموزاييك هـ تكون أنسب هدية تقدمها، لأنها موجودة بألوان متعددة وأشكال كثيرة في محلات الهدايا الموجودة في خان الخليلي، والزمالك ومعظم المولات بأسعار تبدأ من 150 جنيه.

 

مفكرات وNotebooks:

أحلى حاجة فيها أن منها تصميمات كثيرة وتناسب كل الأذواق، ده غير أن أسعارها متنوعة وممكن تلاقيها في أي مكان. شخصيًا، إحنا بـ نحب تصميمات مفكرة – Mofakera المجنونة واللي رجعتنا لزمن الثمانينات بمجموعة شرائط الفيديو (35 جنيه)، والكاسيت (15 جنيه) والجيم بوي (40 جنيه)، ولو بـ تحب التصميمات الكلاسيكية أكثر هـ تلاقي مجموعة كبيرة منها في Paper Blanks، واللي كمان بـ تتميز بفخامة شكلها، هـ تلاقيهم في مكتبات ديوان وفيرجين ميجا ستورز – Virgin Megastores.

 

المجات اللي بـ تحتفظ بالحرارة:

في عصر السرعة اللي عايشينه الأيام دي لازم يكون عند أي شخص اختراع مهم زي المجات اللي بـ تحتفظ بالحرارة، واللي موجود منهم أنواع وأشكال كثير في مختلف محلات الهدايا في القاهرة؛ زي قرطاسية ديوان وويند جرافيك – Wind Graphic، الأسعار بـ تختلف حسب النوع والشكل والجودة ولكن بـ تبدأ من 28 حتى 150 جنيه.

 

ساعات حائط:

هي الكلمة لوحدها قديمة قوي، ولكن عنصر الوقت مهم في حياتنا… وبعدين إيه أجمل من أن الواحد كل ما يبص في الساعة يفتكر اللي جاب الهدية؟ دلوقت فيه أماكن ومحلات هدايا بـ تقدر قيمة الوقت وبـ تبيع مجموعة كبيرة من ساعات الحائط اللي ممكن تعرف منها الوقت بشياكة زي فروع كاو – Cow المختلفة وإيه بي إن جي   ABn'Gفي الزمالك. الأسعار بـ تختلف حسب الحجم: الصغير بحوالي 80 جنيه والأكبر 200 جنيه.

 

طبعًا مش هـ نوصيك، لو المجموعة دي ما أقنعتكش، دوّر في محلات الهدايا في قسم التسوق عندنا.

مقترح