دليل تسوق القاهرة، أحدث المقالات عن تسوق مصر

تسوق

خيوط: مشروع توعية بالفنون وأنواعها من خلال منتجات يدوية بسيطة
اصدرت في: 27/10/2016

الرسام الفرنسي العبقري "هنري ماتيس" كان قال كلام معناه: "وظيفة الفنان مش أنه ينقل الحاجة الجميلة اللي بيشوفها في لوحة، وظيفة الفنان أنه يقدر يوصف الشعور اللي بيحصل في نفسه لما يشوف الحاجة الجميلة دي، وينقل الشعور ده نفسه على اللوحة". ونقدر نبني على كلام عم "ماتيس" ونقول: أن الفن كل ما كان بيخاطب الشعور بقدر أكبر، كل ما كان مبهم نسبيًا لعدد أكبر من الناس، وكل ما كان عدد الناس اللي يقدروا يفهموه ويتذوقوه أقل، وبالتالي فأكثر الناس حرصًا على نشر الفن بصورة أكبر وسط الناس اللي مش هتقدر تتذوق الفنون المجردة، هتلاقيهم دايمًا يحولوا فنهم لعمل معتاد، أو صورة شائعة، أو منتج مستعمل وهكذا، علشان بس يعودوا عيون الناس على مشاهدة الجمال ببساطة ووضوح، وشوية شوية يعلوا بذوقهم من السكة دي. ده بالضبط اللي فكر فيه القائمين على "خيوط"، طلبة من المحتكين بمجال الفن سواء بالدراسة أو الممارسة أو بالدراسة والممارسة سوا، فكروا أنهم يشركوا الناس في تذوق الفن بالشكل اللي قلنا عليه، تحويل العمل الفني لمنتج، بحيث يبقى بيستعمل، فيفضل متشاف، والعين تتعود عليه، وتشوف غيره، وغيره، وواحدة واحدة تقدر تميز بين أنواع وألوان وطبائع الفنون المختلفة. الناس دول مجموعة فنانين بسطاء في طور النمو وتكوين الفكر الفني الخاص بهم، وقرروا أنهم يعملوا اللي قلنا عليه ده، قاموا عملوه إزاي؟ قعدوا يعملوا منتجات يدوية بسيطة من خامات سهلة التشكيل نسبيًا.. الورق، والجلد، والقماش، والخيط، اللي بعد كده بتبقى شنط، ومحافظ، وإكسسوارات، وBookmarks، وNotebooks، وكوفيّات، وغيرهم. اللقطة الأجمل بقى في البُعد الفكري اللي أشرنا له في الأول، أن كل كوليكشن بينزل بيبقى له طابع فني واحد، يعني كل مجموعة منتجات هي في الواقع معبرة عن نوع معين من أنواع الفنون، مش مجرد منتجات جميلة وعملية وخاماتها كويسة وتصميماتها جذابة، والحقيقة هم مدركين جدًا أن الموضوع ممكن في الأول يبقى مش واضح أوي بسبب فقر الثقافة الفنية نسبيًا عند كثير من الناس، لكن ده مخلي لشغلهم معنى أكثر، ومخليهم مؤمنين أنهم محتاجين يبذلوا مجهود أكبر في أنهم مش بس يفكروا في طبيعة كل كوليكشن، لأ كمان يفكروا إزاي ممكن يخلوا الناس على وعي بأن اللي في أيديهم "فكرة" و"رمز" معبر عن طابع إنساني معين.. مش مجرد منتج! "خيوط" بدأت من سنة ونصف تقريبًا، و على فترات كانت بتنزل مجموعات المنتجات بطوابعها الفنية المختلفة، آخرها كان مع بداية السنة الجديدة، وبيتواصلوا مع عملائهم من خلال طريقتين: بشكل أساسي من خلال صفحة الـفيسبوك الخاصة بهم، ومن خلالها بتتم عملية طلب المنتج وتسليمه، أو من خلال أنهم يسيبوا منتجاتهم في بعض مساحات العمل المشتركة أو الجاليريهات أو المكتبات في القاهرة. الجديد أنه وإحنا على مشارف توديع حر الصيف وقدوم أولى النسايم الباردة المنذرة بقدوم الشتاء "خيوط" فاجئتنا بكوليكشن كوفيّات بناتي لطيف جدًا وياخد العين، ألوان زاهية، وتصميمات مبهجة، وخامة كويسة، ونَفَس الفنان لسه سايب أثره فيها! تقدروا تاخدوا لفة سريعة في صور منتجات الكوليكشن الجديد من هنا. تقدروا كمان تدخلوا على الصفحة وتعرفوا أماكن تواجدهم والمنتجات المتوفرة وطرق الحصول عليها، والأهم من ده تعرفوا منهم القصة اللي ورا كل منتج، والفكرة اللي ورا كل تفصيلة، والحكاية.. اللي ورا كل خيط.

...

بوتيك 17: بوتيك مختلف ممكن تروحيه في الزمالك
اصدرت في: 25/10/2016

كلنا عارفين أن كل شوية أهل القاهرة بيجي لهم هوس بفكرة معينة، تلاقي الشعب كله متجه لتنفيذ الفكرة دي؛ يعني مثلًا ينجح محل كب كيكس، تلاقي أربعة محلات كب كيكس فتحوا دفعة واحدة... برجر مثلًا، وهكذا. من ضمن الحاجات اللي انتشرت فجأة وبقت بيزنس مربح جدًا الأيام دي هو بوتيكات اللبس الحريمي؛ في الأول الموضوع كان جديد، والواحد كان مبهور بفكرة الملابس اللي جاية من بره واللي المفروض مش هتلاقي حد تاني لابسها. ولكن الموضوع فقد أهميته بعد ما بدأت البوتيكات في الانتشار بشكل مبالغ فيه، والمنتجات اللي المفروض أنها مختلفة بقت تقريبًا نفس القطع في أماكن مختلفة وبأسعار متفاوتة. وبما أن البوتيكات كثيرة في الزمالك، توقعنا أن بوتيك17 Boutique 17 - هيبقى مجرد واحد من ضمن البوتيكات اللي انضمت للموجة، ولكن انطباعنا اختلف كثير بعد زيارتنا له. في مكان هادي في منطقة الزمالك –جنب محل كوتون بول في شارع أحمد حشمت- بوتيك 17 موجود في مكان صغير بواجهة أنيقة مكونة من واجهة زجاجية فيها مانيكان وحيدة وفوقها اللوجو باللون الفضي على خلفية رمادي. وبالرغم من مساحة المحل الصغيرة، إلا أن أول حاجة لفتت نظرنا كانت نظام العرض؛ كل في المنتصف حوالي 4 شماعات كبار متقسمة عليهم الملابس على حسب مجموعتهم اللونية. أول مجموعة كان اللون الأساسي فيها هو اللون المرجاني (فوشيا + برتقاني)؛ ما بين المجموعة دي عجبنا قميص طويل وواسع (405 جنيه بعد الخصم) وفي نص الظهر فيه رسوم لأشخاص بخياطة، ومن نفس المجموعة كان فيه تي شيرت مطبوع عليها صورة (315 جنيه) وتميزت أن قماشها قطني خفيف. المجموعة الثانية كانت للألوان المحايدة، زي الأبيض، الأسود والرمادي. ومعظم قطع المجموعة دي كانت عبارة عن كارديجانز عجبنا منهم واحد باللون الأبيض طويل من الدانتيل (700 جنيه)، ومن نفس اللون توب أبيض بكمام وفيه من على جانب منه حركة بنفس القماش بس محددة بكنار من اللون الكحلي (700 جنيه). من الألوان الثانية لاقينا توب أصفر مخرم (400 جنيه) وبلوزة من الحرير لونها أخضر سعرها (600 جنيه). في نصف المحل معرض على شماعة أقصر وأصغر مجموعة من الهوت شورتس الجينز و مجموعة محدودة من المايوهات البيكيني. الهوت شورتس عجبنا منهم واحد على أطرافه كنار من القماش المنقوش بأشكال هندسية (400 جنيه). طبعًا مش هنقدر نختلف على معلومة أن الأسعار غالية جدًا-حتى أكثر من البوتيكات العادية- ولكن علشان نبقى منصفين القطع مختلفة تمامًا عن القطع المعروضة في أغلب البوتيكات اللي روحناها قبل كده. وحتى الذوق والخامة فهم أحلى بكثير من القطع اللي بنشوفها في المعتاد. بوتيك 17 – Boutique 17 مكان مميز تشتري منه قطعة مختلفة لدولابك، صحيح وارد جدًا المحفظة تشتكي من هزال بعدها، بس المحل عامل حاليًا خصم 30% على قطع معينة فممكن تستفيدي منه.

...

أتش أند أم: هدوم الشتاء نزلت في المهندسين
اصدرت في: 20/10/2016

ومع "أخر أيام الصيفية" وبدأ الشتاء يهل علينا أهو، وكل المحلات نزلت الشتوي، قولنا نروح أتش أند أم – H & M في المهندسين ونشوف الكوليكشن الجديد. ومن حظنا الحلو أن وقت زيارتنا كان لسه فيه حاجات من الصيف وعليها خصم خاص، زي القمصان القصيرة مشجرة الواحد منها كان بـ 120 جنيه، وأشكال مختلفة. كمان كان فيه قمصان طويلة لبعد الركبة منها عجبنا منها اللون الأبيض لأنه مناسب يتلبس عليه أكثر من حاجة وكان بـ 300 جنيه. برضه لفت نظرنا فستان أسود طويل مقفول، بكمام طويلة لحد بعد الركبة وخامته شتوية شوية، كان بـ 400 جنيه، ونحب نقول لكم يا جماعة أن تقريبًا رقم 400 جنيه ده بقى عامل زي 200 جنيه زمان، يعنى أي حاجة كنتم بتشتروها بملغ 200 جنيه أو أكتر شوية بقت بـ 400. وده يمهد لنا أننا نتكلم عن لبس الشتاء. نبدأ بالجاكتات، كان فيه جاكت قصير شوية لحد الركبة وفيه جيوب وشكله بسيط من القطن التقيل بـ 400 جنيه. وكان فيه جاكتات بأشال مختلفة منها التقيلة أكتر ومنفوخة شوية برضه بـ 400 جنيه، وفيه منها كل الألوان، وقيس على ده كل لبس الشتاء تقريبًا. لفت انتباهنا أن في الفرع ده كان فيه أدوات مكياج مختلفة غير الإكسسوارت والأحذية ولبس البيت، ومن ضمن الحاجات اللي لفتت انتباهنا، أطواق الورد اللي بيبعوها، والباندانات المشجرة، برضه كان فيه شنطة كبيرة سودة مربعة، كان شكلها حلو قوي وبـ 400 جنيه. دي فكرة عامة عن أغلب المعروضات هناك، ونصيحة مننا ابقوا حوشوا للبس الشتاء يا جماعة، أو بيعوا أعضائكم أيهما أسهل.

...

Imperfiction: الفن يدب مطرح ما يحب!
اصدرت في: 17/10/2016

الفنان العظيم مش اللي بيستخدم المساحة المتاحة قدامه لإنتاج أو عرض فنه، الفنان العظيم هو اللي بيبقى قادر على خلق فرصة الإنتاج ومساحة العرض بنفسه، وإبداع التحف من اللاشيء.. بمعنى تاني: الفنان العظيم هو اللي متجاوز لفكرة المساحات والحدود، وقادر يظهر فنه في أي مكان وتحت أي ظروف. "ناردين سمير"، البنت اللي يادوب على وشك إنهاء العقد الثاني من سنين عمرها، قدرت تجبر كل اللي شافوا إنتاجها على تصنيفها ضمن أفراد النوع الثاني، وتفرض نفسها على سوق المنتجات ذات الطابع الفني بقوة. الفنانة صغيرة السن اختارت –بنضج يمكن يكون غريب على بنات جنسها، وبالذات اللي في المرحلة العمرية دي- مساحة ميتة –بالتعبير التجاري الدارج- علشان تكون مسرح الأحلام لعمايل إيديها، وآهي تبقى ضربت عصفورين بحجر، عصفور لابس زي تجاري وتسويقي شوية وهو أنك كل ما تختار مساحة ماحدش بيزاحمك فيها فده هيكون أدعى لأنك تظهر بشكل مميز وقوي، وعصفور تاني لابس زي فني رسالي بحت وهو أنك تظهر للجمهور المستهلك أن الفن ماهوش عمل جامد، وأنه مالوش صورة نمطية ولا مجالات محدودة. وشوش الكوتشيهات السادة، ألوان فاتحة يعني اتساخ سريع، أو ألوان غامقة يعني شكل مش أد كده! طب وبعدين؟ نجيب العدة ونجرب نتسلى شوية، يمكن الموضوع يحل المشكلة.. فرشة يمين، فرشة شمال، والدنيا بدأت توضح، واللوحة بتكمل، وصورة الطريق كمان بتترسم، الناتج واضح أنه عملي جدًا، غير أنه جميل وشيك إلى أبعد الحدود. الأمور مش دايمًا بتمشي بالبساطة دي، ولو كانت البدايات مبشرة أو حتى مبهرة، مش عيب أنك تقف اضطراريا في وسط الطريق، لكن المهم أنك تبقى عارف كويس أنت عايز تروح فين، والأهم أن وقوفك الاضطراري يخليك تصلح العيب اللي وقفك، ويخليك تحسب أمورك كويس بحيث تتفادى أي صعوبة تانية محتملة.. "ناردين" كانت تحب أنه الموضوع مايقفش عند حدود موهبة بيتم تنميتها أو فن بتمارسه باستمتاع مستمر، وإنما يبقى الموضوع ممارسة موجهة بوعي متزايد، علشان النقلات تبقى أسرع، والفروق تبقى أوضح، وكانت شايفة أنه ده هيتم من خلال أنها تسند الموهبة بتعليم أكاديمي قوي، يديها المعرفة، ويفتحلها طرق أكتر للإبداع، ولأن الرياح لا تأتي بما تشتهي السفن، فالأمور مشيت على عكس ترتيباتها، وفاتها الالتحاق بالكلية المرغوبة، وكانت خيبة أمل نسبية في المرحلة دي، لكن زي ما قلنا: اللي محطة الوصول بالنسباله واضحة، والوقوف بيبقى فرصة للشحن الإيجابي واستعادة القوة وتصحيح المسار.. لازم هيوصل. الثابت في فترة الانطفاء المرحلي دي كان المشروع الصغير، "Imperfiction".. الأقلام، ووشوش الكوتشيهات السادة، كانوا ونس وتسلية، لحد ما الموضوع بدأ ياخد شكل مختلف، وبدأت عمايل إيديها تنال إعجاب واستحسان المقربين منها، وبدأت تنفتح السكة لمشروع حقيقي بياخد مساحة الاهتمام الأكبر من حياتها، خصوصًا بعد ما طلع للنور وبدأ الإعجاب والاستحسان مايبقاش متوقف عند القريبين، وإنما كل من شاف المنتجات عجبه الشغل، بما يعني أنه احتمالية أن يكون الاستحسان ده مجاملة معارف وقعت، وده زود قيمة المشروع في نفسه، وفي عين صاحبته. ناردين مؤخرًا خرجت برة إطار الفن المجرد وبدأت كمان تاخد سكة الرسم المشخص، شخصيات كارتون، رسوم لمكونات طبيعية، وغيره.. وده لاقى قبول شديد عند المراحل العمرية الصغيرة نسبيًا، وفتح باب سكة سوق جديد للمنتج. المميز في اللي بتعمله ناردين بعيدًا عن جمال المنتج فنيًا وجودة الماتيريالز سواء للألوان المستخدمة أو للكوتشيهات نفسها اللي بترسم عليها، أنها مراعية كويس أوي أن المنتج يكون عملي واستعماله مايسببش مشاكل، وده نفهمه أوي من طبيعة الأشكال اللي بتختارها وأماكن الرسومات وطبيعة الألوان وتوزيعها، علشان ماتقعش في مشكلة أنه المنتج يبقى جميل جدًا لوحده بس مش هيليق إلا على ألوان ملابس محدودة جدًا فيفقد قيمته. باقي نقول لكم أنه للتواصل مع "ناردين" وطلب المنتجات الجاهزة أو حتى طلب منتج خاص فالأمر ماشي كله أونلاين، عن طريق صفحة الـ Facebook الخاصة بالمشروع، بيتم من خلالها التواصل ومعرفة تفاصيل كل منتج وأسعار الأعمال الخاصة وغيره.

...

فاطم: شنط جلد ومحافظ مصرية بتصميمات مميزة أونلاين
اصدرت في: 10/10/2016

بنفرح جدًا لما نعرف أن فيه محلات بتنتج منتجات مصرية وفي نفس الوقت اللي قائمين عليها شباب سنهم صغير. "فاطم" مشروع صغير لصناعة الشنط والمحافظ اللي معمولة بجلد طبيعي وممكن تشتريها ببساطة أونلاين من خلال التواصل على الفيسبوك أو إنستجرام. صاحبة المشروع "فاطمة خليفة" قررت تغامر بعد ما اتخرجت من كلية تجارة أنها تحقق حلمها وتعمل المشروع الخاص بها واللي بتحقق فيه شغفها. مش بس كده الذوق الراقي في تصميم المنتجات ونوع الجلود يخلينا نكون زبائن دائمين عندهم خاصة أنهم بيوصلوا المنتجات كمان لحد عندكم بـ 20 جنيه زيادة بس، وعلى حسب المكان طبعًا. وتقدروا تشوفوا منتجاتهم كلها وتتواصلوا معاهم على صفحتهم على الفيسبوك هنا. كمان فاطم هينظم ورش لتعليم تنفيذ المنتجات الجلدية يوم السبت 15 أكتوبر من سن 10 لـ 18 سنة وتقدروا تلاقوا تفاصيل الحدث هنا. عجبنا عندهم أكثر من حاجة نبدأ بشنطة جلد خضراء بـ 450 جنيه، تفاصيلها رقيقة جدًا وواخدة ستايل التخريم النوبي بس من غير ألوان كتيرة. كمان عجبتنا شنطة بجلد بني أشبه بالبيج شوية معمل بستايل نوبي فيه تخريم مثلثات مع ألوان مختلفة حلو جدًا. وفيه منها أكثر من حجم يناسب كل الأذواق. وفيه منها بنفس الشكل محفظة ونوت بوك. الشنطة بـ 800 جنيه، والمحفظة بـ 250 جنيه والـ Note book بـ180 جنيه. وكان فيه محفظة جلد بني عليها تطريز بخيوط ملونة بـ 150 جنيه. فاطم من الأماكن القليلة اللي تنبسط وأنت بتدفع فيها فلوسك لأنك بتاخد منتج مميز مصري معمول يدويًا من إيد فنانة بتحب اللي بتعمله.

...

أبو عوف: فرع ثاني واسع ومريح لمحل المحمصات في الزمالك
اصدرت في: 04/10/2016

من أكثر من سنة، زرنا محل أبو عوف اللي كان فتح جديد في شارع البرازيل في الزمالك. وبالرغم من أن منتجات أبو عوف كان تقييمها ممتاز في المجمل، إلا أن المحل كان فيه عيب قاتل وهو مساحته الضيقة اللي مستوعبة كم كبير من المنتجات اللي مش واخدة حقها في العرض. بعدها بفترة فوجئنا بفرع ثاني بيفتح في شارع طه حسين، مكان محل الشوكولاتة باتشي – Patchi (اللي نقل في نفس الشارع على الناصية الثانية)؛ الفرع الجديد لأبو عوف أوسع كثير، لدرجة أننا ما قدرناش نقاوم الفضول أننا ندخل نشوف شكله عامل إزاي. طبعًا شتان ما بين الديكور في الفرعين، الجديد مقسم لناحيتين ما بينهم حائط جزئي بيفصل ما بينهم. الجزء الأول فيه ثلاجة لمجموعة المكسرات الفريش واللي إجمالًا سعرها أرخص من سعر المكسرات المحمصة بحوالي خمسة جنيه. و جنب الثلاجة فيه نفس مجموعة المكسرات ولكن محمصة واللي ذقنا منها لوز بنكهة الباربكيو (سعر الـ 100 جرام 26 جنيه)؛ اللوز كان فريش وحباته كبيرة. وبيكان مملح (سعر الـ 100 جرام 42 جنيه) واللي بالرغم من أن البيكان نفسه كان فريش، إلا أن ملحه كان زيادة حبتين. الجزء الثاني من المحل مقسم لمجموعة المنتجات الجاهزة اللي بيقدمها أبو عوف، منها شاي المريمية اللي أي حد راح نويبع أو دهب أكيد هيكون جربه (سعر العلبة 17 جنيه)، ومجموعة كبيرة من أنواع القهوة الخضراء، وهي القهوة اللي ممرتش بعملية التحميص وبالتالي يقال أن لها فوائد صحية كثيرة أهمها حرق الدهون. والأسعار بتبدأ من 25 جنيه، وبتوصل لـ 120 جنيه. من ضمن المنتجات الصحية الموجودة، فيه مجموعة حبوب الكينوا بأنواعها المختلفة (البيضاء – الحمراء)، واللي ناس كثيرة بتستخدمها كبديل للأرز وكمكون جديد مع السلطة، كيس حبوب الكينوا البيضاء لاقيناه بسعر (56 جنيه). وبجانب مجموعة الحلويات اللبنانية زي النوجات والملبن اللي المكسرات (سعر الكيلو 240 جنيه) واللي جربنا منها الملبن بالفستق؛ أسطوانة ملبن صغيرة حواليها قطع فستق مقرمش موازن طراوة الملبن. أما لو بتحب اللوز فمن ضمن المجموعة دي فيه المارزيبان واللي في الغالب بتكون عجينة لوز لونها فاتح شبه الغريبة. أبو عوف عنده علب مارون جلاسيه جاهزة، سعر الحجم الصغير 190 جنيه، والأكبر 320 جنيه –صحيح إحنا عمرنا ما ذقناه، إلا أننا ما نمانعش أن العلبة تجيلنا هدية وخصوصًا أن شكلها حلو ينفع قوي تاخدها وأنت رايح زيارة. في وقت زيارتنا للفرع القديم، ماكينة طحن القهوة ما كنتش متوفرة، ولكن المرة دي انبسطنا لما لاقينا كاونتر كامل لأنواع القهوة المختلفة (بن برازيلي – بن أبو عوف – بن جولد)، وخصوصًا أننا من أشد معجبين ببن أبو عوف. بترشيح من القائم على الخدمة، اشترينا بن جولد (على حد قوله أفضل الأنواع)، اخترناه وسط ومحوّج (سعر الكيلو 174 جنيه). طبعًا أي حب بيحب القهوة مش محتاجين نوصف له ريحة البن كانت عاملة إزاي ساعتها، أول حاجة عملناها لما رجعنا البيت هي كوباية القهوة، واللي تحويجتها كانت أكثر من ممتازة. إحنا كنا داخلين ناخد فكرة عن المكان من غير حتى ما نكتب مقال، ولكن كالعادة ما قدرناش نقاوم تجربة منتجاته. وبالتالي نقدر نقول أن الفرع الجديد ممتاز من حيث الشكل والمضمون.

...

الأفراح في كايرو: 8 خبراء تصميم فساتين أفراح لعرايس كايرو
اصدرت في: 04/10/2016

فكرة تحقيق للفرح المثالي عملية معقدة يا جماعة. يعني مبدئيًا لازم مصور شاطر وأكل لذيذ وأجواء ممتعة وطبعًا مكان حلو. لكن لو سألت العروسة إيه أهم حاجة عندها يوم فرحك هتكون الإجابة بدون تفكير: فستان الفرح أكيد! الفكرة أنك عشان تدفعي رقم محترم في فستان هيتلبس يوم واحد بس أكيد قرار صعب. أكيد اختيار الفستان المناسب هو أصعب قرار ممكن يواجه أي عروسة، لكن لو عايزة قماش حلو وتصميم خطير وأفكار مبتكرة، فإحنا يهمنا نساعدك وعلشان كده جمعنا ثمانية أسماء مهمة في عالم الأزياء أكيد هيعجبوكم. ديانا شعبان مجموعة ديانا شعبان لفساتين الأفراح مستوحاة من الروح العربية والهندية واليونانية والفكتورية القديمة، وتعتبر فساتين فريدة من نوعها علشان بتقدم لكل عروسة الفخامة والتميز اللي تتمناه يوم فرحها. شوفوا تصميمات ديانا شعبان من هنا. شيرين حسين شيرين هي مصممة أزياء خريجة مركز التصميمات والموضة (إف دي سي)، ولها خط أزياء يحمل اسمها. لو كنتِ عروسة عايزة فستان فرح بسيط وفيه لمسة شياكة، بلاش تفكير كثير واطلعي كايرو بوتيك علشان تشوفي مجموعة شيرين المميزة. تقدري كمان تتفرجي على جزء من أعمالها على صفحتها على فيس بوك. نسمة حلمي أكيد هتستغربوا إن نسمة حلمي صاحبة 33 سنة وخريجة كلية علوم اختارت تكون مصممة أزياء محترفة، وقدرت تغزو السوق المصري بخط فساتينها التفصيل للزفاف. نسمة كمان كانت العقل المدبر لفساتين عدد كبير من المشاهير، وتمتلك بوتيك خاص بيها في المعادي. شوفوا صفحتها على فيس بوك واعرفوا أكثر عن شغلها. ياسمين يحيى مين قال إن فستان الفرح لازم يكون أبيض؟ ياسمين يحيى وهي واحدة من أشهر الأسماء في عالم الأزياء وتحديدًا فساتين الأفراح بتقدم تصميمات مبتكرة تجمع بين درجات الأبيض التقليدية مع ألوان ثانية بحيث الفستان يكون له شكل جريء ومميز. اعرفوا أكثر عنMaison Yeya من صفحتهم على فيس بوك وموقعهم الرسمي. شايز كوتور Shay's Couture حصلت مصممة الأزياء المصرية شيماء ماهر على دبلومة من الأكاديمية الإيطالية للموضة، وبعدها أسست شايز كوتور Shay's Couture علشان تقدم لمستها المميزة على فساتين الأفراح. تقدروا تشوفوا شغلها من هنا. . أماني الشريف فساتين أفراح أماني الشريف ساحرة وبتخطف قلب أي عروسة، خصوصًا إنها بتجمع بين الشياكة والجرأة. ستايل أماني بيركز على الأناقة والاهتمام بالتفاصيل، وأهم حاجة عندها إنها تحقق حلم كل عروسة في يوم فرحها. اعرفوا أكثر عن عالم أزياء أماني الشريف من هنا. ملك العزاوي ملك العزاوي دائمًا بتتحدى كل القيود في فساتينها، والأكيد إن أي فستان من تصميمها هيكون أجمل هدية ليوم فرحك. فساتين ملك كمان تتميز بالأناقة كونها بتستخدم أقمشة عالية الجودة من مصر والسعودية ونيويورك وباريس. ممكن تعرفوا أكثر عن شغل ملك فوزي من صفحتها على فيس بوك. هديل علي "كفاية أفكار قديمة وخلونا نفكر في حاجة جديدة"، هو ده شعار هديل اللي نقدر نقول عليها فنانة موهوبة بتصمم مجموعة من أحلى فساتين الأفراح. .

...

كف فاطمة: مشغولات يدوية مصرية محترفة ومبهجة
اصدرت في: 29/09/2016

من الأماكن اللي اكتشفناها بمحض الصدفة وإحنا ماشيين في شوارع المعادي، المكان لازق في كريف في دجلة بتنزل له سلمتين وتدخل عالم كامل مليان ألوان، ومنتجات يدوية، ولبس بدوي، وخدديات مزخرفة، وشمع كبير متكوب عليه بخط عربي، غير التابلوهات المميزة، حاجة كده لأصحاب الذوق العالي وبس. عجبنا هناك المخدات الملونة اللي فيه منها احجام كتير وألوان أكتر، وبيختلف سعرها على حسب الحجم واللون. كمان كان فيه فنجاين شاي وقهوة ومجات منقوش عليهم، ومكتوب على الماج أمثال شعبية، وجمل مبهجة، كمان عندهم إكسسوارات كتير برضه واخدة الستايل البدوي، بتبدأ من 50 جنيه وأنت طالع، ما بين سلاسل وحلقان وغوايش، غير الشنط الجلد كانت حلوة جدًا، عجبتنا شنطة زرقاء جلد طبيعي في نصها قطعة صوف مشغولة يدوي بألوان مبهجة وسعرها (500 جنيه)، كان فيه انواع شنط جلد مختلفة بنفس السعر تقريبًا، على حسب الموديل وشكله. كمان أكتر حاجة عجبتنا أن عندهم كل اللي تحتاجيه في اللبس البدوي، سواء البنطلون اللي فيه حزام بصوف بدوي، ورجليه واسعة، أو بلوزة فيها شغل بدوي في النص، أو بليزر معمول بالكامل من الشغل البدوي، أو طبعًا الجلابية البدوي، بس بيكون فيها شغل بدوي خفيف، والأسعار بتبدا من 600 جنيه، علي حسب نوع الموديل والشغل المعمول فيه. كمان فيه كل أنواع الشموع الكبير والصغير، عجبنا شمعة كبيرة جدًا بحجم التليفزيون تقريبًا وكانت بـ 350 جنيه ومكتوب عليها بخط عربي "قل أغوذ برب الفلق"، وعجبنا كمان تابلو جواه سلسلة مكتوب عليها "حب" ونازل منها دلايات فيها أولان مختلفة، و سعرها 420 جنيه. "كف فاطمة" من الأماكن الحلوة اللي ممكن تشتروا منها هدية لحد بتحبوه أو تدلعوا نفسكم بمنتجاتهم في البيت.

...

ما فيش فلوس لطقم العيد؟ نصايح وأماكن تجيبي منها إكسسوارات تظبطي بيها طقم قديم
اصدرت في: 10/09/2016

هو صحيح العيد يعتبر جاي في أول الشهر نسبيًا، إلا أن برضه الموضوع ما يمنعش أن الحالة ممكن تبقى عند البعض ضنك ومش ناقصها مصاريف لبس عيد. إلا أن الحمد الله أهل الموضة اخترعوا لنا حاجة اسمها الإكسسوارات... شخصيًا، طول عمرنا بنعتبر الإكسسوارات رفاهية محتاجة ميزانية لوحدها –خصوصًا في ظل الظروف اللي إحنا بنمر بيها حاليًا- إلا أن هنا بقى ييجي وقتها. المقال ده عن الإكسسوارات وأهميتها وهنحاول نقول لك على حبة نصايح بالمرة على قد ما نقدر: الشنط والجزم: من الحاجات اللي الناس بتسيب كل اللي أنت لابساه وتركز فيهم. والحقيقة ما ننكرش أنهم قطع مهمة –مش هنمشي حافيين، وهنشيل الميت ألف حاجة اللي بنخرج بيها فين- لدرجة أن الواحد ممكن يلبس تي شيرت وجينز عاديين جدًا، إلا أن الشنطة والجزمة بيعملوا شغل. المهم، فيه أماكن كثيرة ممكن تلاقي فيها شنط وجزم تناسب كل الأذواق من غير ما تضطري تفجري المحفظة؛ زي بيكسي – Pixi كده، واللي على طول فيه حاجات جديدة، ده غير فروعه الكثيرة المنتشرة في كل القاهرة، شوفي من هنا. نصيحة: مش شرط طبعًا الجزمة والشنطة يكونوا شبه بعض (نفس القماش أو الألوان)، ولكن حاولي أنهم يكونوا من نفس الـ Style؛ يعني يا إما هما الاثنين فورمال، أو كاجوال. أحلى عقد عندك الطويل والقصير والتخين والرفيع منها؛ دلوقتي كل المحلات اللي بتبيع لبس عندها مجموعة كبيرة ممكن تختاري منها. أكثر أعقاد بنشوفها في الوقت الحالي هي الأعقاد القصيرة اللي بيبقى داخل فيها أحجار ملونة أو لؤلؤ مع المعدن، دي بقى ممكن تتلبس على أي حاجة بسيطة؛ قميص جينز أو تي شيرت مثلًا، أو حتى تلبسيها على حاجة منقوشة بس بقية اللبس يكون بسيط. أما اللي نزلين جديد الأيام دي فهي الـ Chokers واللي بتبقى ببساطة عبارة عن شريط لافف حوالين الرقبة، وده ممكن ينفع لو أنت مش محجبة، أو لو بتربطي سبانيش. الأعقاد الطويلة مش موجودة بكثرة زي السنين اللي فاتت، إلا أنك ممكن تلاقي منهم نسخة أقصر شوية وعادة بيبقى فيها دلايات لونها ذهبي أو فضي. هتلاقي مجموعة حلوة عند إتش & إم – H&M ممكن تختاري منها. نصيحة: وأنت بتختاري الأعقاد الضخمة، حاولي تبعدي عن الثقيل منهم في الوزن علشان ما يكونش مزعج في اللبس، وطبعًا ما تنبهريش بالألوان الكثيرة؛ أهم حاجة يكون لونها لايق على الطقم اللي هتلبسيه. الساعات: الساعات زمان ما كانتش بس مصدر للـ "إيافة"؛ دي كانت شيء أساسي كحاجة بتحسب لنا الوقت –الواحد كان بيبقى تايه لو في يوم نزل من غيرها. دلوقتي مع انتشار الموبايلات، الساعة بقت بالنسبة لناس كثير مش بنفس الأهمية. توقعنا أن أسعارها هتنزل بعد ما ساعة الموبايل بقت موجودة، إلا أن الساعات –زي النضارات- لسه من الحاجات الغالية. بما أننا عايزين نظبط الميزانية، حاولنا على قدر الإمكان أننا ندور لك على ساعات في الحنيّن؛ عندك محل ألدو – Aldo فيه مجموعة محترمة من الساعات الحلوة اللي مش هتزيد عن 500 جنيه. نصيحة: بما أن مش كل يوم بنشتري ساعات؛ الساعات المعدنية بتمشي على كل حاجة (أهم حاجة أنن لونها يكون لايق على بقية الإكسسوارات) وهي موضة الأيام دي. وحاولي على قدر الإمكان أن حجمها يكون متناسب مع حجم إيديكي. النظارات : زي الساعات بالظبط، النظارات من الحاجات اللي معروفة أن أسعارها غالية، إلا أن فيه مجموعة كبيرة من المحلات اللي ممكن تلاقي فيها أنت عايزاه بسعر لطيف؛ زي بارفوا - Parfois واللي عنده مجموعة كبيرة من النظارات اللي بيبدأ سعرها من 149 جنيه، وأغلى واحدة عندهم بـ 599 جنيه. نصيحة: حاولي تختاري نظارة تليق على معظم الحاجات اللي بتلبسيها، وطبعًا أهم حاجة أنها تكون لايقة على شكل وشك ويكون حجمها مناسب عليه.

...

دليل كايرو 360 لصكوك الأضحية وأسعارها السنة دي
اصدرت في: 07/09/2016

طبعًا كل سنة وأنت طيب، والعيد فرحة –خصوصًا بكم الأجازات اللي جاية مع العيد السنة دي- إلا أن ده ما يمنعش أننا نتكلم عن الجزء الجد اللي في موضوع عيد الأضحى وهو الدبح. زمان اقتناء الخروف في المنوّر أو المطبخ كحيوان أليف –حتى ولو لمدة يومين- كان حاجة مبهجة ودمها خفيف، إلا أن لما كبرنا عرفنا أن الموضوع أكبر من مجرد اللعب مع الخروف، وأن مسألة الدبح وتوزيع اللحمة على الناس اللي محتاجينها مسألة معقدة. من فترة، جمعيات خيرية كثيرة قدرت تقصر المسافة وتسهل الدنيا على الناس اللي نفسها تدبح بس ظروفها مش سامحة بصكوك الأضحية؛ تروح تدفع مبلغ معين مقابل شراء أضحية في أي جمعية من الجمعيات الخيرية، واللي بتتولى عملية الدبح وتوزعها على الناس اللي محتاجينها. السنة دي السعر مش بيقل عن 1490 جنيه، ولكن هنقول تفاصيل كل جمعية على حدة. مجموعة الجمعيات اللي الموجودة في المقال ده هي الأشهر في موضوع صكوك الأضحية، وهي الآتي: جمعية الأورمان: من الجمعيات الخيرية المشهورة، واللي السنة دي عندها مجموعة من الأسعار اللي بتبدأ من السعر العام السنة دي وهو (1490 جنيه) للخروف الصغير، أما المتوسط فسعره (1690 جنيه)، والكبير (1990 جنيه). ولو الأسعار دي أكبر من أنك تدفعها مرة وحدة؛ جمعية الأورمان بتسمح لك أنك تقسط على 6 شهور –وده طبعًا بموافقة دار الإفتاء المصرية. وبالتنسيق مع الجمعية تقدر تاخد نصيبك من الأضحية وهو 5 كيلو. ممكن تشتري الصك من أي بنك من البنوك دي، أو فوري ومصاري. وممكن برضه تتصل بيهم على 19455، وهيبعتوا لك مندوب. دي صفحتهم على الفيسبوك، وده الموقع الخاص بيهم. بنك الطعام المصري: بنك الطعام المصري كان كل سنة بيقدم صك للأضحية البلدي بسعر، وصك للأضحية المستوردة بسعر عادة بيكون أرخص، ولكن السنة دي علشان سعر الدولار ارتفع، قرر بنك الطعام المصري أنه يوحد السعر ويخليه السعر المتعارف عليه السنة دي وهو (1490 جنيه). السعر ده ممكن يدخل في ثمن عجل (7/1 ثمنه) أو وزنه من 360 لـ 400 كيلو، أو خروف وزنه من 50 لـ 55 كيلو. والسنة دي بنك الطعام المصري لغى حصة المشتري من اللحمة (5 كيلو) علشان أكبر قدر من المحتاجين توصلهم اللحمة. عملية الدبح السنة دي هتكون في مصر، وخارجها (السنة دي في البرازيل، الهند وأستراليا) وممكن تحضر عملية الدبح لو أنت في أي بلد من البلاد دي. ده الموقع الإلكتروني للجمعية، ودي صفحة الاستفسارات واللي متوفر فيها البنوك اللي ممكن تشتري الصك من خلالها والأماكن الثانية زي فوري و سوق. كوم، ده غير منافذ التسويقية المتواجدة في مولات وأماكن كثيرة في أنحاء القاهرة. جمعية مصر الخير: مصر الخير سعر الصك الخاص بيها هو الأغلى بين الجمعيات التانية وهو (2195 جنيه)، وهو بيماثل 7/1 عجل بلدي؛ بما يوازي 24 كيلو لحمة، واللي هيتم دبحهم وتجميد لحمتهم علشان يتم توزيعها على محافظات مصر أيام العيد -2 كيلو لكل أسرة محتاجة. وبعكس جمعية بنك الطعام المصري، تقدر تتصل على 16140 علشان تاخد نصيبك من الأضحية. دي صفحتهم على الفيسبوك، وده موقعهم الإلكتروني اللي تقدر تشتري من عليه صك الأضحية على طول من هنا. وطبعًا ممكن تشتري عن طريق فوري أو تتصل بيهم على نفس الرقم اللي موجود في الفقرة اللي فاتت وهيبعتوا لك مندوب. جمعية رسالة: زي ما تقدر أنك تشتري صك أضحية بالسعر المتعارف عليه وهو (1490 جنيه)، تقدر كمان أنك تدبح بمعرفتك وتبعت لهم اللحمة اللي أنت عايز توزعها عن طريقهم. علشان تشتري صك، تقدر أنك تتصل بيهم على 19450 وهيبعتوا لك مندوب، وممكن كمان تروح لأي مقر من مقرات الجمعية. دي صفحتهم على الفيسبوك، وده الموقع الإلكتروني الخاص بيهم.

...

شاهد المزيد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن