The Definitive Guide to Living in the Capital , Cairo , Egypt

إيجو – Ego

إيجو: فرع جديد للبوتيك الفخم في فيرست مول بالجيزة

  • 35 شارع الجيزة - داخل فيرست مول
  • أحذية
  • 0224177727
  • 10 صباحًا - 12 صباحًا
تم التقييم بواسطة
Jessica Noble
قيم
قيم الآن
إيجو: فرع جديد للبوتيك الفخم في فيرست مول بالجيزة

طبيعي جدًا أن إيجوEgo يفتح فرع ثاني في واحد من أفخم المولات في مصر وهو فيرست مول في الجيزة، لأنه تقريبًا المكان الوحيد اللي بـ يقدم للطبقة الراقية تجربة تسوق مختلفة بعرضه لعدد كبير من منتجات أشهر دور الأزياء في العالم. مش هـ نبالغ لما نقول أن الأسعار في إيجو فوق طاقة المتسوق العادي، لأننا ببساطة بـ نتكلم عن أسماء ماركات عالمية زي “أرماني”، “جيمي تشو”، “إيف سان لوران”، “كلويه” وغيرها. الفرع ده متخصص في الإكسسوارات فقط.

أول ما دخلنا المحل، القائم على خدمة البيع رحب بنا بإسلوب بارد وفيه درجة كبيرة من الإرتياب، فعرفنا أننا في خلال جولتنا هـ نكون تحت المراقبة، وده اللي حصل بالفعل.

أول جزء مخصص لحقائب السيدات، المحافظ والأحذية، غير مجموعة كبيرة من الإكسسوارات. لاحظنا أن بالرغم من أن القطع بـ تنتمي لماركات عالمية، إلا أن معظمها تفتقر الذوق الراقي. لفت نظرنا مجموعة كبيرة من حقائب “زاجلياني” المصنوعة من جلد الثعبان الملون، بوت طويل من “بالدان”. عجبنا بوت من “سيرجيو روسي” من الجلد الناعم الرمادي، سعرهم وصل (10.000 جنيه). أما مجموعة “جيمي تشو” فهى كلاسيكية بأحذية معظمها كعبها عال ومدببة، أسعارها بـ تفوق (4000 جنيه). وسط المجموعة دي لاقينا حذاء High Top، وهو حذاء رياضي برقبة ومرصع بالألماظ –مش حقيقي أكيد- سعره (7700 جنيه).

الجزء الثاني المخصص للرجال ما يختلفش في فخامة منتجاته عن الجزء الأول؛ لفت نظرنا حذاء شمواه أزرق، ومجموعة كبيرة من زراير القمصان والأحزمة والمحافظ والكرافتات. ده غير أن فيه عدد كبير من أحذية الأطفال، أسعارها بـ تبدأ من (1000 جنيه).

قبل ما نلاقي على الهدية المناسبة اللي كنا بـ ندوّر عليها أثناء مهمتنا، القائم على خدمة البيع إرتاب فينا لمجرد أننا كنا بـ نستخدم الموبايل بصفة متكررة. دقائق وكان مديرة الفرع بنفسها بـ تراقبنا، بعد لحظات سألتنا بنفاذ صبر عن سبب إهتمامنا الزائد بمعرفة سعر كل قطعة. من غير شرح كثير، بعد موقف لا نحسد عليه تم اصطحابنا للخارج.

بلا شك إيجو متميز، وإحنا ما نقدرش ننكر الموضوع ده. ولكن بالمنتجات والأسعار دي، من المتوقع أن الخدمة تكون أرقى من المستوى اللي شفناه. نصيحة أخيرة: إقفل موبايلك وما تسألش عن الأسعار بطريقة مبالغ فيها، علشان ما تخرجش بالقوة من المحل.  

نصيحة 360

فرع مصر الجديدة أكبر، وفيه ملابس كمان.

أحسن حاجة

هـ تلاقي أشهر الماركات والأسماء العالمية.

أسوأ حاجة

الخدمة غير الراقية بالمرة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح