The Definitive Guide to Living in the Capital , Cairo , Egypt

إحنا بـ نعشق حاجة اسمها مكسرات، مش بس علشان هي مفيدة صحيًا، فيها أحماض دهنية غير مشبعة ودي دهون مفيدة للجسم وخاصة القلب، ده كمان علشان طعمها حلو وتسلية مفيدة على عكس اللب مثلًا، ولأن القاهرة ما سابتش تخصص إلا وأوجدته، فيه محلات كثيرة فتحت متخصصة في بيع المكسرات زي "أبو عوف – Abu Auf" اللي كتبنا لكم عنه قريب، وكمان "المحمصة اللبنانية – Lebanese Roastery" اللى لها فروع كثيرة مستقلة زي فرع داندي مول اللى رحناه، أو داخل السوبر ماركت الكبيرة زي "هايبر ماركت".

فرع المحمصة اللي في داندي يعتبر المفضل عندنا، لأنه مرتبط بذكريات شرب القهوة عنده، ده حقيقى.. المحل مش مجرد مكان لشراء المكسرات بس، لأ بـ يعملوا لك أحلى قهوة بالطريقة اللي تحبها، وبـ يبيعوا بُن كمان، وغير كده كمان عندهم قسم لحلوى النوجا بأنواعها، والحلويات الشرقية، وكمان حاجات زي دبس الرمان وماء الزهر (كل ما هو منتج لبنانى).

في قسم المكسرات شوفنا حاجات أول مرة تقع عيوننا عليها، منها لوز تخين وكبير وطعمه رائع مستورد، هناك ممكن تذوق الحاجة قبل ما تأخذها، وأقل كمية ممكن تأخدها هناك 100 جرام، أسعار المكسرات هناك واللي جربناها شخصيًا: لوز محمص (176 جنيه/ الكيلو)، وكاجو نص مملح (203.50 جنيه/ الكيلو)، بندق (176 جنيه/ الكيلو)، عين جمل مقشر فاتح هندي (181.50 جنيه/ الكيلو)، وعندهم كمان صنوبر باكستانى (440 جنيه/ الكيلو).

كل المكسرات اللي هناك مافيش حاجة عليها تعليق، كلها محمصة وملحها مضبوط وجودتها عالية، والحلو هنا أن الأسعار شاملة ضريبة المبيعات، كمان ما ينفعش نروح من غير ما نذوق القهوة، جربنا المرة دي بندق باللبن بدون كافيين (9 جنيه)، بـ تُقدم فى كوب ورقى صغير بس فيها الخلاصة، طعمها كان حلو جدًا ويعدل المزاج.

"المحمصة اللبنانية" نتمنى أنها تفضل رائدة فى المجال ده، لو عاوز تجيب مكسرات أو عندك مناسبة وعاوز منتجات مضمونة، هو ده المكان المناسب.