The Definitive Guide to Living in the Capital , Cairo , Egypt

على الرغم من اقتحام المنتجات المستوردة الأسواق المصرية في الفترة الأخيرة بصورة رهيبة زي الصيني والتركي.. وغيرهم، إلا أن فيه بعض المنتجات المصرية ظلت محتفظة بمكانتها وسط زحمة المنتجات المتعددة العاطلة، بالإضافة لركود المنتجات المصرية في الأسواق وعدم الثقة بها، وبالتالي عدم تشجيعها إلا القليل منها طبعًا.

النساجون الشرقيون من 1981 لحد دلوقت مازالت موضع ثقة لأغلب الناس، وخاصة اللي جربوها سواء من حيث الخامات أو التصميم أو حتى المقاسات، اشتهرت عالميًا باسم “النساجون الشرقيون”، أسسها رجل الأعمال المصري محمد فريد خميس، وتخصصت في إنتاج وبيع وتصدير السجاد الميكانيكي والأكلمة والألياف والخامات المتعلقة بها.

بعد كده توسعت في الخارج وأسست مصنعين واحد في الولايات المتحدة الأمريكية والثاني في الصين، غير أنها بـ تعتمد على التصدير بشكل أساسي حوالي 60% من منتجاتها للخارج، بالإضافة إلى خططها المستقبلية لتوسيع شبكات البيع والتوزيع داخل مصر وخارجها.

تعتبر مجموعة النساجون الشرقيون أكبر مدينة صناعية في مصر، وهي تضم حوالي 800 وحدة، تتعامل كالنظام الملكي يعني بـ توفر أسلوب وفلسفة إدارية موحدة بين جميع شركات المجموعة.

المدينة عبارة عن مجتمع مزدهر متوفر فيه كل الإمكانيات اللي ممكن يحتاجها العامل لإخراج منتجات أعلى قيمة وشكل ومضمون.

من بين 800 فرع تقريبًا اختار فريق كايرو 360 فرع الوراق للنساجون الشرقيون، وده لأن أغلب الفروع الثانية متوفر عنها معظم المعلومات أو على الأقل مكتوب عنها بعض التفاصيل لوجودها في أماكن أكثر  شهرة من غيرها.

فرع النساجون الشرقيون الموجود في الوراق تحديدًا في شارع ترعة السواحل جنب محطة المياه، ودي منطقة شعبية أغلب سكانها من البسطاء وبالتالي كان تركيز فرع النساجون الشرقيون على المنتجات الأقل أسعارًا من الفروع الثانية، أو على الأقل اللي تناسب حالتهم المادية، من خلال تجربتنا مع النساجون الشرقيون هـ نحاول ننقل لكم بعض التفاصيل اللي ممكن تميز فرع الوراق عن غيره من الفروع الثانية التابعة للمجموعة.

فرع الوراق لا يختلف كثير عن باقي فروع المجموعة من حيث الشكل والتصميم للمكان، وهو عبارة عن دورين، الدور الأول فيه أغلب المنتجات اللي بـ تُباع بالأمتار، بالإضافة إلي مجموعة المنتجات اللي عليها خصومات تقريبًا طوال السنة أو المجموعة الأقل سعرًا عن باقي المنتجات الموجودة داخل الفرع ده، بالإضافة إلى المخزن وده على فكرة كل اللي فيه منتجات مكررة علشان ما يحصلش عجز في أي وقت في الفرع، أما بالنسبة للدور الثاني وده أغلب المنتجات اللي فيه  تقريبًا لا تختلف كثير عن باقي الفروع الثانية من حيث الجودة والتصميم والمضمون، يعني باختصار الفرع فيه السجاد الغالي والرخيص واللي عاوز حاجة هـ يلاقيها على عكس الفروع الثانية أغلبها منتجاتها أسعارها عالية لوجوده في مناطق حيوية.

الفرع أو المجموعة عامة بـ تعمل عروض طوال السنة بـ تبدأ من 5% إلى 50%، بالإضافة للأسعار الخاصة للسجاد الدرجة الثانية وده على فكرة عيوبه مش فظيعة لأن أغلبها بـ تكون يا إما لونها فاتح جدًا فالبتالي السحب عليها بسيط، أو فيها خيوط إضافية أو تداخل في شكلها من حيث الرسمة وقت التصنيع.. وهكذا، يعني مش هـ تلاقي السجادة مقطوعة أو حتى دايبة ويقولك عليها تخفيض، مافيش الكلام ده.

أما بالنسبة للأسعار بـ تكون حسب المقاسات والخامات بـ تبدأ من 10 جنيه إلي 3000 جنيه تقريبًا للمتر الواحد، بالنسبة للسجاد اللي بالمتر بـ يبدأ من 10 جنيه إلى 1000 جنيه تقريبًا للمتر، ومن أكثر الأنواع المعروفة أو بـ تحقق مبيعات في الفرع كثيرة سجاد سلطانو، جاستن، آرينا، بينكل.

ده غير أن فيه إمكانية تفصيل أي موديل وأي مقاس في وقت قياسي أسعاره بـ تبدأ من 570 جنيه للمتر ولكن مقتصر على نوع واحد من الخامات وهي التافت، على الرغم من قلة العاملين بالفرع إلا أنهم متعاونين جدًا وبـ يستقبلوك استقبال لطيف وسلسين في المعاملة وما عندهمش أي مشكلة أنك تتفرج علي كم كبير من المنتجات، وكمان فيه إمكانية الاستبدال خلال 14 يوم.