The Definitive Guide to Living in the Capital , Cairo , Egypt

باص

باص: ملابس رجالي بأسعار جيدة في كارفور المعادي

  • سيتي سنتر المعادي (كارفور)
  • ملابس رجالي
  • 01008810995,0225204414
تم التقييم بواسطة
Waleed Abuarab
قيم
قيم الآن
باص: ملابس رجالي بأسعار جيدة في كارفور المعادي

ساعات بـ ندور على حاجة معينة في الملابس ومش بـ نلاقيها في أي
حتة، أو مش بـ نلاقيها بالأسعار اللي إحنا عاوزينها، وعلشان كده لما بـ نقع في
مكان بـ يعمل المعادلة الصعبة ويقدم موديلات مميزة بأسعار كويسة بـ نشرككم معانا
على طول وبـ نحاول نعرفكم بالمكان ده.

ده اللي حصل معانا وإحنا داخل سيتي سنتر المعادي (كارفور) ولقينا محل صغير
في الممر التجاري اسمه «باص – Bass» عارض ملابس رجالي
كاجوال، ومافيش أي ملابس كلاسيك. أول حاجة عجبتنا في المحل كانت التي شيرتات
البولو بألوان مختلفة ومن ماركات غير معروفة لكن قصتها شيك وفيها شبه من موديلات US
Polo وLacoste وأسعارها من
150 لـ 190 جنيه، غالية شوية على أنها مجهولة الهوية بس خامتها حلوة وشكلها حلو في
اللبس بصراحة.

اللي لقيناه هنا بقى ومش بـ نلاقيه في أي حتة “وبالسعر ده” هو
البنطلون الجبردين اللي تفصيلته شبه الجينز Straight وبـ يبقى غالبًا باللون البيج والكاكي والبني (ماركة
اسمها Men’s Club)، المفاجأة بقى كانت
سعره اللي هو 140 جنيه، ومتوفر منه كل المقاسات، وفيه ألوان عجيبة كمان زي
البنفسجي والأحمر والأخضر، الألوان اللي نزلت موضة وانتشرت بشكل غريب بعد ظهور
بوسترات محمد منير وتامر حسني الأخيرة، وفيه كمان بنطلونات باجي اللي كنا بطلنا
نشوفها تقريبًا من منتصف الألفينات، لكن لسه لها محبيها وبرضه ما كناش عارفين ممكن
نلاقيها بـ تُباع فين، موجودة هنا وبأسعار مناسبة جدًا من 150 لـ 200 جنيه.

فيه قمصان بس كلها نفس الشكل تقريبًا، كاروهات كبيرة ونصف كم زي اللي كانت
منتشرة في التسعينيات، هو المحل فعلًا تحس أنه أنتيكا شوية، فيه موديلات قديمة
وحاجات بِطلِت، لكنه برضه مواكب الموضة وجايب جينزات وتي شيرتات جديدة، هو الميزة
الحقيقية اللي فيه أنه متنوع ومش متوقع، يعني مش زي أي مكان مرتب ممكن تدخله وبعد
دقيقتين تبقى عرفت هو إيه اللي عنده وإيه اللي مش عنده وتكون عرفت متوسط أسعاره.
هنا الموديلات مختلفة والأسعار متفاوتة، وفي وسط ملابس الخروج العادية هـ تلاقي إكسسوارات وملابس داخلية رجالي وجوارب، وفيه كمان شورتات رياضية وجينز وملابس بحر
(100 جنيه) وموديلاتها شيك وحديثة. هو بس ما كانش عارض أي أحذية.

تجربتنا في «باص» كانت جيدة وقررنا بالفعل نروح نجيب فلوس كفاية ونلحق لنا
بنطلون وتي شيرت بالأسعار دي، وعرفنا أن المحل ده هو وجهتنا كل لما نحب ندور على
حاجة مش موجودة بسهولة.

نصيحة 360

مافيش فروع ثانية للمحل على حد علمنا، لازم تيجي كارفور المعادي.

أحسن حاجة

التنوع في المعروضات والأسعار الجيدة.

أسوأ حاجة

مافيش أحذية، كنا نتمنى يبقى فيه وبالأسعار الحلوة دي.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح