The Definitive Guide to Living in the Capital , Cairo , Egypt

بالرغم من أن كثير من محلات اللبس الأيام دي بيبقى عندها ركن للإكسسوارات، إلا أن مش شرط المجموعة تكون متنوعة وترضي كل الأذواق زي لما يكون المحل متخصص في القطع المكملة للـ Look  النهائي. برفوا – Parfois من الأماكن اللي جمعت كل الإكسسوارات اللي ممكن تحتاجها أي واحدة؛ من أول الحلي لحد الأحذية والشنط، وإحنا زرنا فرع مول العرب.

بالرغم من أن المحل صغير نسبيًا، إلا أن مجموعة المعروضات كبيرة ومتنوعة. أول حاجة شفناها في جولتنا كانت مجموعة الحلي اللي بتتكون من حلقان وأعقاد وخواتم بمختلف الأشكال والأحجام؛ عجبنا أن المجموعة فيها البسيط وبرضه فيها تصميمات جريئة سواء في الحجم والتفاصيل الكثيرة، ده غير تنوع الألوان اللي هيساعدك تلاقي حاجة تليق على لبسك بسهولة.

الحلقان هتلاقيهم حاجة من اثنين؛ يا إما مجموعة مكونة من 3 حلقان بيتباعوا مع بعضهم، ودول أغلبيتهم بتبقى حلقان صغيرة –على قد الودن بالضبط- وبسيطة في التصميم –اللي بيكون شبه موحد مع فروق بسيطة. شفنا من المجموعة دي مجموعة متفاوتة في الحجم؛ أصغرهم دهبي على شكل دايرة مفرغة من الوسط، الأكبر منه على طول الحلقة الدهبي دي فيها حجر لونه بنفسجي فاتح، أما الحلق الأكبر فهو مختلف نوعًا ما عن بقية المجموعة لأنه عبارة عن نص كورة دهبي ومرصعة بالألماظ. المجموعة دي مناسبة للي بيحبه الحلقان البسيطة وسعرها (59 جنيه).

الحلقان الأكبر عادة مش بتبقى في مجموعات وأغلبها بيبقى فيها تفاصيل. وقت زيارتنا لاقينا مجموعة من الحلقان اللي تصميماتها كانت شرقية؛ يعني فيه واحد (119 جنيه) على شكل هلال وعليه مجموعة من الأحجار الملونة على شكل نص وردة ، ونازل من الهلال ده قطع معدنية صغيرة.  عامة الأسعار مش بتخرج برة حدود السعرين دول.

مجموعة الشيلان كبيرة، وبتتنوع ما بين خامة البوليستر، فيسكوز والحرير. هتلاقي مجموعة كبيرة من الشيلان المستطيلة المصنوعة من الخامة الأولى وسعرها بيبدأ من 139 جنيه، وبيتميزوا بأنهم طوال وكبار وفيه منهم سادة. أما الخامات الثانية فعادة بتبقى أغلى، وخصوصًا الحرير، واللي عجبنا منها واحد حجمه 85×82 سم وسعره (329 جنيه)، وطبعًا لأن القطن من الخامات المهمة، فكان الشال المصنوع منه هو الأغلى (499 جنيه)، وبالرغم من أننا شخصيًا نفسيتنا ما تستحملش أننا ندفع فيه كل ده، إلا أنه نقشته الهندسية المكونة من مجموعة ألوان نارية مع لونه الأبيض رائعة، ده غير أنه ثقيل فممكن يكون هايل في الشتاء.

أغلبية الشنط منقوشة، وبالتالي حسينا أنها هتكون مقيدة. عجبتنا مجموعة الشنط اللي بتتشال على الضهر لأنهم عمليين بالنسبة لنا، لاقينا منها واحدة شبه رياضية (529 جنيه) مناسبة ليوم على البحر، منقوشة بمجموعة من الورود الصغيرة. أما من الشنط العادية واللي شايفنها مناسبة لخروجة لطيفة (469 جنيه) فهي متوسطة، لونها أبيض من الجانبين ومنقوشة بنقشة هندسية باللون اللبني على الوش والضهر. طبعًا الأسعار بتختلف حسب حجم وخامة الشنط.

مجموعة الصنادل والبالارينات محدودة جدًا في المحل، عجبنا منهم صندل لونه تركواز بسيط جدًا (159 جنيه)؛ سيره الرفيع بيبدأ من الصوابع ومتصل بواحد ثاني حولين القدم.

برفوا عنده كمان مجموعة من النضارات، إكسسوارات الشعر والمحافظ وحتى شنط السفر. وبالرغم من أن الأسعار ممكن ما تسمحش أنك تشتري براحتك من هناك إلا أن عن تجربة شخصية، الشنط هناك بتستحمل الاستخدام اليومي المستمر، ففلوسك مش بتروح على الفاضي.