The Definitive Guide to Living in the Capital , Cairo , Egypt

تسوق
بكير – Bakier

بكير: أدوات مكتبية وهدايا في مول العرب في الشيخ زايد

تم التقييم بواسطة
Dina Mokhtar
قيم
قيم الآن
بكير: أدوات مكتبية وهدايا في مول العرب في الشيخ زايد

صحيح إحنا بـ نروح مول العرب بصفة أسبوعية، إلا أننا عمرنا ما فكرنا أننا نلقي نظرة على الدور اللي تحت، واكتفينا بمجموعة المحلات الكثيرة اللي موجودة في الدور الأرضي، من فترة كبيرة لاقينا مجموعة من الإعلانات عن افتتاح مكتبة بكير – Bakier في مكان ما هناك، إحنا فاكرين أن موقع المحل كان مكتوب في الإعلان، إلا أننا اعتمدنا على "حس القبطان" اللي جوانا وقلنا إحنا أكيد هـ نلاقيه في جولة من جولاتنا، أخيرًا لاقيناه في الدور اللي تحت الأرضي بالصدفة، وعلشان ما تتوهش ننصحك أنك تدخل من باب 17 وهـ تلاقيه أمام كافيه بينوس –  Beano’s.

بما أننا من عشاق الأدوات المكتبية والمكتبات عامًة، بكير بالنسبة لنا كانت جنة، وخصوصًا أن تقسيمة المعروضات منظمة: فيه قسم للهدايا وقسم للأدوات المكتبية العادية (أقلام وكراسات)، ومجموعة من الاحتياجات المكتبية الخاصة بالطابعات والكمبيوتر، وكل قسم فيه شخص قائم بالخدمة، أول ما دخلنا سألنا عن أستيكة وأقلام فلوماستر (اللي بـ تتباع بالواحدة)، عجبنا أن القائم على الخدمة فاهم إحنا بـ نسأل على إيه بالضبط، صحيح أن الأقلام اللي كنا عاوزينها ما كانتش متوفرة في الفرع ده، إلا أنه كان عارف ماركتها والغرض المستخدم منها، ده غير أنه طرح بدايل لها، واللي كانت عبارة عن علب ألوان أسعارها بـ تختلف حسب النوع وعدد المجموعة اللي فيها؛ لاقينا منها ماركة Staedtler مكونة من 12 لون (17 جنيه)، وفيه طبعًا  Crayola اللي سعرها كان غالي شوية (89 جنيه) –مكونة من 16 لون حجم صغير- إلا أن بـ يميز النوع ده أن سن كل قلم في المجموعة له سُمك وشكل مختلف عن الثاني؛ وهي عامة موجهة لسن معين زي معظم منتجات الماركة دي.

كنا مكسوفين وإحنا داخلين المحل الكبير ده علشان نطلب أستيكة، وتوقعنا أننا ممكن ندفع فيها كثير، إلا أننا لاحظنا أن الأساسيات أسعارها مش مبالغ فيها؛ الأساتيك والبرايات العادية جدًا سعرهم مش بـ يخرج عن حدود 2 حتى 4.50 جنيه، وكل ما كان الحاجة شكلها معقد ومحبب للأطفال كل ما سعرها زاد.

طبعًا لو قعدنا نتكلم عن الأقلام مش هـ نخلص، فهـ نكتفي بأننا نقول أن كل الأسعار والأنواع والأشكال موجودة: القلم الـReynolds  العادي (الأبيض أبو غطاء أزرق) سعره جنيه واحد، أما مجموعة الـ Uni–Ball فهي أعلى  شوية لغاية ما توصل للماركات والأقلام الثمينة (واللي تنفع جدًا كهدية)، الأسعار بـ تبدأ من 140 جنيه قلم ماركة Lamy وهو مصنوع من الـ Stainless steel، أما ماركة  Cross فممكن تلاقي واحد بـ 610 جنيه، طرفه ومشبكه ذهب عيار 23، ماركات زي Hugo Boss بـ توصل الأسعار فيها لـ 990 جنيه، الأقلام الـ Montblanc بـ توصل لـ 8500 جنيه.

مجموعة الهدايا هناك ممتازة وشكلها مختلف، وبكير بمناسبة عيد الحب عامل عرض تاخد كارت ببلاش مع لفة الهدية، محبي الفنون برضه ممكن يلاقوا ألوان أكريليك وباستيل وجواش وتوالات للرسم، إجمالًا لو أنت من عشاق الأدوات المكتبية والمكتبات زيًنا، ننصحك تبقى محدد أنت عاوز إيه لأن كل حاجة هناك مغرية.

نصيحة 360

أنت ممكن تشتري من موقعهم على الإنترنت ويوصل طلبك لحد البيت.

أحسن حاجة

الخدمة أثناء عملية البيع.

أسوأ حاجة

الإغراءات كثير هناك.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح