The Definitive Guide to Living in the Capital , Cairo , Egypt

بوتيك سمر

بوتيك سمر: پرفانات ومكياج أصلي بأسعار أقل في الدقي

  • 3 شارع الدقي
  • صحة وتجميل
  • 0237491933,0237484349,01223334056
تم التقييم بواسطة
Shahista Sherif
قيم
قيم الآن
بوتيك سمر: پرفانات ومكياج أصلي بأسعار أقل في الدقي

في أول
شارع الدقي وانت جاي من عند جنينة الحيوانات، دايماً كُنا بـ نلاقي محل قديم وشكله
صغير واسمه «سمر». الحقيقة إحنا كل اللي كان بـ ييجي في بالنا إنه محل قديم وصغير
وأكيد مش هـ يبقى فيه حاجة تهمنا، لكن يوم ما قررنا إننا نروح ونشوف إكتشفنا إننا
كُنا غلطانين، ومش بس كده، ده إحنا كان فايتنا كتير، قوي كمان!

المحل
بـ تنزله بكام سلمة وبعدين تدخل من الباب، تلاقي ڤاترينات على يمينك وعلى شمالك مرصوص
فيهم پرفانات من ماركات مختلفة. حاجات قديمة وحاجات جديدة، من أول 100 جنيه ولغاية
أغلى الپرفانات العالمية اللي ممكن تتخيلها. بس اللعبة هنا بقى مش في إن المحل
متوفر فيه كل أنواع الپرفانات، ولا إن أغلب أسعاره بـ تبقى أرخص من بره، ولا حتى
إنهم ممكن يجيبوا لك أي پرفان تطلبه حتى لو مش متوفر في البلد كلها، لأ ده الموضوع
كله إنهم كمان بـ يبقى عندهم الـ” تستر” Tester بتاع أغلب الپرفانات.

ولو انت
مش عارف إيه هو الـ “تستر” وإيه الفرق بينه وبين الپرفان نفسه، إحنا هـ
نقولك حالاً! التستر بـ يبقى هو هو الپرفان الأصلي بالظبط (بـ نتكلم عن المضمون
طبعاً)، بمعنى إنه بـ يبقى نازل من نفس الشركة اللي عاملة الپرفان بس من غير
الحركات اللي بـ تبقى في الإزازة الأصلية، لكن الپرفان نفسه بـ يبقى زيه زي المعبأ
في العلبة العادية والحجم كمان هو هو. يعني تلاقى علبة التستر لونها أبيض بس عليها
لوجو الماركة، وتلاقي الإزازة مُجَرَدة من أي حركات زيادة (الحاجات اللي مش مُفيدة
وبـ تدّي منظر وخلاص للإزازة)، من الآخر يعني التستر ده هو اللي بـ يبقى موجود في
المحلات الكبيرة وبـ يرشولك منه لو عايز تجرب پرفان قبل ما تشتريه. وده بـ يبقى
مُفيد وموَفِر جداً لو حد عايز يجيب الپرفان الأصلي، ومش فارق معاه شكل العلبة
والإزازة.

  وطبعاً سعر
التستر بـ يبقى أرخص من سعر الپرفان العادي، الفرق بينهم بـ يبقى من أول 50 جنيه
وانت طالع. يعني مثلاً لمّا سألنا عن Paco Rabanne – Black XS الحريمي لقيناها بـ 450 جنيه، لكن التستر بتاعها بـ 375 جنيه. والـ Carolina
Herrera – 212 Sexy الحريمي
بـ 450 جنيه والتستر بـ 350 جنيه. والـ Calvin Klein – Euphoria الحريمي بـ 595 جنيه والتستر بـ 395 جنيه. وغير
التستر كمان عندهم عينات الپرفانات (الأصلية)، ودي بـ تبقى حاجة صغيرة كده قد
الصباع، ولمّا سألنا عن سعرها لقيناها بـ 10 جنيه بس!

الحاجة اللي المفروض تعرفها إن أغلب الأوقات لمّا بـ
تسأل عن سعر حاجة بـ يبقى لسّه عليها خصم في حدود 25 أو 50 جنيه. ولو فيه پرفان مش
موجود عندهم ممكن تطلبه منهم وهما بـ يجيبوه (إحنا نفسنا طلبنا منهم قبل كده پرفان
قديم جداً ومش موجود في البلد كلها وعرفوا يجيبوه).

بعيد بقى عن الپرفانات، فيه كمان سپراي الجسم ( Body Spray ) لكل أنواع الپرفانات تقريباً، وسعر الواحد بـ يبقى
في حدود 15 جنيه. أغلب السپراي اللي هناك من ماركة اسمها Galleria، وديه بـ تعمل سپراي لأغلب الپرفانات العالمية وإحنا
جربنا منه كذا واحد قبل كده. الحقيقة ريحتهم بـ تبقى قوية وثابتة، وبعضهم بـ تبقى
ريحته أحلى من الپرفان الأصلي نفسه. وإكتشفنا كمان ان فيه جزء مستخبي جوة المحل
مأخدناش بالنا منه في الأول، لكنه جزء مش هَيِن برضه. هـ تلاقى جوة أشكال وألوان
وأنواع مختلفة من الماكياچ، المصري والمستورد منه، وكمان هـ تلاقي أنواع مختلفة من
الكريمات.

نصيحة 360

ماتنسوش تسألوا عن الخصم بعد ما تسألوا عن سعر الپرفانات، أغلب الأوقات مش بـ يقولوا لك إلا لو سألت بـ نفسك.

أحسن حاجة

عندهم "تستر" Tester الپرفانات الأصلي، وده بـ يوفر كتير قوي. ده غير إنك لو عايز پرفان مش عندهم بـ يجيبوه مخصوص.

أسوأ حاجة

المحل صغير من بره ومش باين فـ الناس مش بـ تشوفوه.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح