The Definitive Guide to Living in the Capital , Cairo , Egypt

تاي شوب – The Tie Shop

تاي شوب: كل أنواع الإيشاربات اللي ممكن تتخيلها في المعادي

  • جراند مول المعادي، محل 322
  • إكسسوارات
  • 0225195401,0109999978
تم التقييم بواسطة
Nagla Ashraf
قيم
قيم الآن
تاي شوب: كل أنواع  الإيشاربات اللي ممكن تتخيلها في المعادي

كثير مننا بـ يحب يدور في أكثر من محل قبل ما يقرر يشتري الحاجة اللي هو عاوزها، ده في حالة أنه مقرر فعلًا هو هـ يشتري إيه ومش بـ يتفرج من باب التسلية.

تاي شوب –Tie Shop سلسلة محلات فاتحة في أغلب المولات علشان توفر لك عناء أنك تفضل تلف في كذا محل لحد ما تلاقي اللي أنت عاوزه.

زرنا فرع تاي شوب اللي في الجراند مول واللي يعتبر حجمه صغير شوية بالنسبة لباقي الفروع إلا أنه مكانه متميز ومتوفر فيه كل أنواع الإيشاربات اللي ممكن تتخليها غير ربطات العنق طبعًا اللي هي أساس اسم المحل.

أول ما بـ تدخل المحل بـ يلفت نظرك مجموعة من الإيشاربات الحرير، وهنا لنا وقفة.. ليه بقى؟

الإيشارابات الحرير للي ما يعرفهاش بـ تبقى رقيقة جدًا ولها معاملة خاصة، لأن من أول غسلة غلط أو دبوس مزعج ممكن تخسري الإيشارب اللي إحنا عارفين أنه مش رخيص إطلاقًا، الحرير طبعًا أنواع، نوع حرير 100% وده كان بـ 350 جنيه للواحد، والحق يقال أنه كان أكثر الأنواع تماسكًا من نوع القماش، وطبعًا تشكيلة الرسومات والألوان وهمية. ونوع آخر 160 جنيه خامته أقل وتشكيلته أشبه بالرسومات الهادية للورود المرسومة ببراعة، وأرخصهم الحرير الهندي بـ 100 جنيه وبـ ينطبق عليه نفس الكلام إلا أننا عن تجربة بـ ننصح أنكم لو من اللي بـ يقضوا طول اليوم ما بين مواصلات وخروج لأماكن كثيرة في اليوم، تتجنبوا النوع ده لأنه من نتشة هـ يروح في خبر كان، ومع أول غسلة بمسحوق الغسيل العادي هـ يبوظ ويدوب، لازم يتغسل بالشاور جل ويتكوي بالبخار، وده حل غير عملى لكثير من النساء العاملات إلا أن النوع ده بالذات بـ يقع في حبه الكثير من السيدات اللي بـ تعشق الموضة والشكل الجذاب والذوق الراقي بالتأكيد بس أدفع يا فخري.

نيجي للوجه الآخر من الحقيقة الإيشاربات القطن بالذات أنها طلعت موضة ثاني في الفترة الأخيرة واللي برضه مش بـ تليق على أي حد، ولا بأي طريقة لازم بأسلوب ما يبينش الوش كبير وما يظهرش أكثر من المفروض يبان، مش كل حاجة في الموضة بـ نتبعها عمياني، التفكير شوية حلو وآه العشرين شعرة اللي في أول رأسك هـ يفرقوا. الأقطان مقسمة لقطن ليكرا وده بـ يبقى طري قوي ومرن وبـ تتراوح أسعاره ما بين 30 لـ 45 جنيه.

فيه كمان إيشاربات قطن مخططة جديدة تنفع scarf أوإيشارب بـ يبدأ سعرها من 65 جنيه لـ 85 جنيه. ولكن الإيشاربات القطن 100% طبعًا لها مذاق خاص لأنها بـ تبقى مريحة جدًا وحجمها كبير وبـ 100 جنيه.

لكن أكثر نوع قماش بـ نحبه في الإيشاربات بالنسبة لنا هو الشيفون لأنه لا طري زيادة عن اللزوم ولا ناشف لدرجة أنه يضايقنا، والشيفون برضه أنواع شيفون طبيعي بـ 85 جنيه، وشيفون عادي بـ 65 جنيه، والحقيقة أن الألوان الموجودة مع الرسومات برضه كانت حلوة قوي ويمكن دي حاجة من اللي بـ تميز تاي شوب ومخلياه مشهور وناجح.

عجبنا إيشارب أبيض فيه رسومات لورد رقيق بأحجام مختلفة وأنواع مختلفة متدرج فيه الأزرق بأكثر من درجة وأجمل حاجة فيه أنه حجمه كبير ومش صغير زي أغلب الإيشاربات العادية وكان بـ 65 جنيه.

هـ تلاقوا كمان إيشاربات ساتان لو عندكم مناسبة ومحتاجين إيشارب سواريه وأسعاره ما بين 45 جنيه لـ 65 جنيه.

وطبعًا  ما نقدرش ننسى ربطات العنق Ties للرجال السادة والمخططة بـ 100 جنيه. تاي شوب بدأت تعمل حاجة ظريفة توك صغيرة فيها فيونكة مخططة أو سادة الواحد بـ 10 جنيه، وفيه توك فيونكة كورشيه بـ 5 جنيه.

الحقيقة أننا أستمتعنا جدًا هناك لتعدد الأنواع والأذواق ولأن قليل ما تجد أكثر من شيء يعجبك في مكان واحد وتبقى محتار تجيب إيه ولا إيه، في الغالب بالذات في الإيشاربات لما ذوق القماش بـ يبقى وحش بـ نروح وإحنا محبطين ومنزعجين. جميل أنك تلاقي حد مهتم بالذوق الراقي.

نصيحة 360

تقدر تتواصل معاهم على صفحتهم على الفيسبوك وتقدر تشوف منتجتهم على موقعهم من هنا.

أحسن حاجة

الأنواع المختلفة وذوق رسومات الإيشاربات.

أسوأ حاجة

المكان صغير وضيق.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح