The Definitive Guide to Living in the Capital , Cairo , Egypt

تسوق

جوائز اختيارات محرري كايرو 360 لأفضل محلات الموضة لعام 2016‏

جوائز اختيارات محرري كايرو 360 لأفضل محلات الموضة لعام 2016‏
بواسطة
Cairo 360

بالرغم من أن فيه رأي بيقول أن الاهتمام بالموضة شيء سطحي، إلا أننا لو فكرنا في الموضوع هنلاقي أن مهما حصل الغالبية العظمى بتتأثر بشكل أو بآخر بالموضة؛ مش علشان الغالبية بتفكر بشكل سطحي، علشان أحيانًا بتنجح موضة معينة لدرجة أنها بتبقى الحاجة الوحيدة الموجودة في المحلات وبالتالي بنضطر نمشي مع الموجة ونجيبها، وبكده تبقى الموضة انتصرت في النهاية.

وبما أننا بنعترف بأهمية الموضة؛ القائمة دي جمعنا فيها أفضل وأهم المحلات اللي بتقدم للقاهرة الجديد في الموضة، وقسمناها لثلاثة تصنيفات فرعية، وهي موضة المحلات، الموضة والإكسسوارات والموضة الرجالي –عارفين أن المحلات الحريمي مكتسحة في القائمة، بس نعمل إيه بقى!

 

موضة المحلات:

50A كونسيبت ستور – 50A Concept Store:

القطع المعروضة في 50A كونسيبت ستور أصحاب المحل بيختاروها بنفسهم من كل حتة في العالم؛ القطع دي مش بس تشمل الملابس الحريمي، الرجالي والأطفال، دي كمان بتضم مجموعة كبيرة من قطع الإكسسوارات المنزلية اللي ممكن تناسب كل الأذواق. الجديد كمان أن  50A  كونسيبت ستور بقى كمان بيوصل اللي أنت عايزه لحد البيت.    

 

بوهو جاليري – Boho Gallery:

بعد نجاح الفرع الأول لبوهو جاليري في مصر الجديدة، المحل قدر يوصل لكل مجانين التسوق في الناحية الثانية من القاهرة بفرع الثاني في الزمالك. بيميز بوهو جاليري أنه بيجمع ما بين القطع المستوردة والقطع اللي بيصمموها الفنانين المصريين الشباب. وأجمل حاجة أن المعروضات متاح منها قطع محدودة، علشان ما تلاقيش نص مصر لابسة زيّك.

 

بوب أب شوب – Pop-up Shop :

بالرغم من أن مول داون تاون قطامية بيعتبر مكان للخروج أكثر من كونه مكان للتسوق، إلا أن بوب أب شوب قدر أنه يشد اللي بيحبوا الموضة في منطقة القاهرة الجديدة بالمجموعة المتنوعة اللي بيعرضوها في محلهم المكون من دورين. ما بين إكسسوارات وحتى قطع الديكور المختلفة واللوحات الفنية، أكيد هتلاقي حاجة تعجبك.

 

تاج كونسيبت ستور –  Taj Concept Store:

تاج كونسيبت ستور عنده تشكيلة كبيرة من الملابس والإكسسوارات الحريمي اللي تحمس أي حد بيحب الموضة أنه يشتري من المجموعة اللي على طول متجددة. بدأ المكان في شارع عبد السلام فريد في مصر الجديدة، ونجاحه قرب يوصله لفرع جديد في منطقة وسط ما بين المهندسين، الزمالك وأكتوبر –مش عارفين فين بالضبط بس إحنا مستنيين.

 

فيلا بابوشكا – Villa Baboushka :

من البوتيكات اللي حققت نجاح كبير من أول ما فتحت، والنجاح لسه مستمر بدليل أن المحل لسه بيفوز عندنا بجوائز اختيارات محرري كايرو 360 زي كل سنة. بيعجبنا في فيلا بابوشكا الاهتمام بالتفاصيل؛ من أول القطع المعروضة المميزة والأنيقة ولحد أناقة المكان نفسه، والموجود في الزمالك.

 

فينتاج بوتيك – Vintage Boutique:

إضافة جديدة لقائمة الفائزين، من المحلات اللي قلبت الزمالك من أول ما فتحت. فينتاج بوتيك هو جنة لأي واحدة بتحب تجدد في شكلها؛ لأنه بيقدم مجموعة متنوعة من القطع اللي مش مقيدة بستايل معين، وبالتالي أيًا كان ذوقك هتلاقي حاجة تناسبك.

 

الموضة الرجالي:

يالا… علشان الرجالة اللي بتحب الموضة ما تزعلش مننا… آدي محل موضة رجالي فائز معانا.

أورانج سكوير  – Orange Square :

ما نوعدكش أنك تبقى جيمس بوند لما تختار بدلتك أو تفصلها من أورانج سكوير، ولكن المضمون والمؤكد أنك هتلاقي بدلة تناسبك من بين تشكيلة البدل الكثيرة اللي جاية من بلاد الموضة العالمية زي إيطاليا وإنجلترا. ده غير أن المحل بيفصّل لك الستايل اللي أنت عايزه بالتفاصيل اللي على مزاجك. وسواء اشتريت جاهز أو فصلت، البدلة هتاكل من عليك حتة.

 

الموضة والإكسسوارات:

إيه بي أن جي وورلد – Abn’G World :  

المحل عالم لوحده، نعتقد أنك ممكن تدخله وتنسى نفسك جواه من كثر المعروضات الموجودة، واللي بتضم كل حاجة ممكن تتخيلها، ومن أي مكان في العالم. لو ليكي في الموضة هتلاقي… لو ليك في قطع الديكور الغريبة هتلاقي. إحنا شخصيًا دخلناه قبل كده وكان نفسنا ناخد ركن نعيش فيه هناك… أهو بدل ما نشتري الحاجة نعيش وسطها.

 

أميوز – Amuse:

عمرك شوفت محل مريح للأعصاب؟ أميوز من الأماكن اللي مساحتها واسعة، وبالتالي نقدر نعتبرها جنة الشوبينج على الأرض؛ عدد المعروضات كبير ومش متكتلة في مساحة ضيقة، فأنت شايف كل حاجة ومرتاح في الفرجة. والمعروضات مش بس بتشمل الملابس الحريمي المستوردة أو اللي مصممة على إيد شباب مصممي الأزياء المصريين، دي بتمتد للإكسسوارات المنزلية وحتى الكتب اللي لها علاقة بالفن من قريب أو من بعيد.

 

بيمن – Beymen:

بيمن يعني ماركات عالمية مهمة زي ديور، شانيل ودولتشي & جابانا؛ المحل طبعًا مش بيدخل في أي وقت في السنة، لأن الداخلة هناك بإفلاس علني.  الموضوع مش بس متوقف على الملابس، ده ممتد للإكسسوارات والمكياج وحتى قطع الأثاث المختلفة. بالرغم من أن أسعاره فوق مستوى الأسعار العادية، إلا أنه من الأماكن اللي لما بتعمل تخفيضات بتعمله بجد.  

 

جاليري منايا – Mounaya  Gallery :

من أوائل البوتيكات اللي فتحت في القاهرة –و ده كان سنة 2006. جاليري منايا بهر محبي التسوق بمعروضاته اللي أكثريتها إكسسوارات وحلي حريمي، ده غير مجموعة الملابس الحريمي اللي عليها إمضاء أشهر مصممي الأزياء المصريين زي "أمينة كيه" وغيرها كثير.

 

سامي أمين – Sami Amin:

من المحلات اللي بتتميز بطابع خاص بمنتجاتها واللي لحد دلوقتي ما حدش قدر أنه ينافسه. من أول قطع الحلي النحاسية، مرورًا بالشنط المصنوعة من الجلد الطبيعي وحتى قطع الأثاث والإكسسوارات المنزلية؛ منتجات سامي أمين المستوحاة من التراث المصري قدرت أنها تحقق نجاح وتثبت أن مقولة "البلدي يوكل" صح مية في المية.

 

تويا – Tuya :

جديد معانا في قائمة الفائزين، وهو من الأماكن القليلة جدًا في القاهرة اللي لسه بتقدم شنط ومحافظ رجالي وحريمي مصنوعة من الجلد الطبيعي، بعدما اكتسح الجلد الصناعي الساحة بقوة. وبعكس غالبية الأماكن اللي بتقدم منتجات من الجلد الطبيعي، تويا موديلاته حديثة ومناسبة لكل الأذواق.

مقترح