The Definitive Guide to Living in the Capital , Cairo , Egypt

صحيح السنة الجديدة فاضل عليها كام يوم، بس احتفالاتها بدأت بدري شوية، ومن ضمن الاحتفالات دي مهمة صعبة وهي اختيار وشراء الهدايا، مافيش كلام أن القاهرة مليانة على آخرها أسماء عالمية معروفة وماركات محلية ممتازة، بس المشكلة أن شراء هدية مميزة موضوع صعب شويتين.

لو كنت زي كثير من الناس اللي وصلوا للمرحلة دي بسبب الكسل والتأجيل، اوعى تقلق.. الحل عندنا! اقرأ الكلام ده واختار اللي يناسبك أيًا كانت هواية صاحب الهدية من موسيقى أو كتب أو رياضة

 

الناس السمّيعة

لكل أصدقائك أو أفراد عائلتك اللي مش بـ يتحركوا من غير سماعاتهم، ننصحك تشتري سماعات Skullcandy، الماركة دي بـ تقدم تصميمات أنيقة ومميزات رائعة تشمل ميكروفون داخلي وزرار إعادة تشغيل وكمان بـ يوفروا كابلات وفوق كل ده صوتها روعة، أسعار Skullcandy تبدأ من 125 جنيه لسماعات الأذن العادية، لغاية 2000 جنيه للسماعات الضخمة المحيطة بالأذن، تقدر تشتريها من محلات الأجهزة زي راديو شاك وفيرجين ميجا ستورز.

 

اللى مش بـ يبطّل رسايل على الموبايل

كلنا عندنا الشخص اللي مش بـ يبطل يبعث رسائل أو يلعب أو ينزل كام صورة على أنستجرام، والنوع ده ممكن يحصل له أزمة قلبية لو موبايله فصل شحن، قدِّم لصاحبك العاشق للتليفونات باور بانك في الكريسماس وحافظ على شحن بطاريته وعلى صحّته في نفس الوقت، أسعار الباور بانك تبدأ من 100 لغاية 600 جنيه –على حسب الأمبير– وتقدر تشتريهم من محلات الأجهزة وكمان الهايبر ماركت زي كارفور وهايبر وان.

 

عشاق الهدايا المخصوصة

فكرة عمل هدايا خاصة بصاحبها ممكن يكون فيها أفورة شوية، بس الشيء الأكيد أنها هـ تعجب صاحب الهدية جدًا، الفكرة أنك عملت مجهود علشان تقدم هدية مميزة ومختلفة لشخص عزيز عليك، سواء كانت مج مطبوع عليه نكتة بـ تضحكه أو جراب موبايل عليه حروف اسمه أو تي شيرت عليها جملة من مسلسله المفضل، أسعار الهدايا المخصوصة تتراوح بين 50: 400 جنيه ومتوفرة في كثير من مولات القاهرة زي سيتي ستارز وكايرو فيستيفال سيتي ونايل سيتي تاورز.

 

عشاق الأفلام

فيه ناس متعتها الأولى والأخيرة أنها تشوف فيلم وهي متدفية في بيتها، ويا سلام لو الفيلم معاه شوية فيشار من اللي هو، لو كده مافيش أحسن من فشار كوكوروزا، كوكوروزا عنده تشكيلة هايلة من نكهات الفشار، من الجبنة الشيدر لغاية القرفة، وسعر العلبة يتراوح بين 30: 45 جنيه، كوكورزا بوب كورن له فروع في سيتي ستارز وكايرو فيستيفال سيتي، وبالمرة وأنت هناك ممكن تسأل عن باقة الـ 100 جنيه المميزة بنكهات فيشار مخصوصة.

 

شعب إنستجرام

الإنستجرام أصبح فن قائم بذاته عند ناس كثير، وإيه الهدية اللي تنفع معاهم وتنمي موهبتهم الفنية أحسن من عدسة 3x1؟ هديتك لكل أصحابك "المبدعين" علشان يطوروا تجربتهم على إنستجرام هي عدسة للتليفون بـ تضيف مؤثرات خاصة على صورهم.

عدسات التليفون تتميز بحاجات كثيرة تشمل عدسة بزاوية عريضة Wide Angle وعدسة عين السمكة Fish Eye وعدسة ماكرو وتكلفتها 120 جنيه، اشتري عدسة الموبايل من محلات الموبايل زي موبايل شوب أو من المتاجر الإلكترونية زي سوق.كوم.

 

لعشاق الكتابة

مافيش كاتب بـ يمتلك أجندات كفاية، والقاهرة حدث ولا حرج مليانة مكاتب ومحلات كتب، "Paper Blanks" بـ يقدموا تشكيلة لطيفة من المفكرات بتصميمات كلاسيكية، و"مفكرة Mofakera" عندهم مجموعة مفكرات هايلة، أما "PlanIt's" فصمموا مفكرات فريدة تساعدك على كتابة مقالات أو تخطط جدول أعمالك وغيرهم.

أسعار المفكرات تبدأ من 35 جنيه وممكن توصل لغاية 200 جنيه، اشتري مفكرتك من قرطاسية أو فرع ديوان للأدوات المكتبية أو مكتبات "أ" أو فيرجين ميجا ستورز.

 

لمدمني الصحة واللياقة

الحياة الصحية هي الموضة اليومين دول في القاهرة، كل يوم بـ نشوف ناس جديدة بـ تدخل في عصر الأكل الصّحي والنظام التدريبي المتوازن، وهي حاجة ممتازة مافيش كلام، تقدر تساعدهم على تحقيق أهدافهم بأنك تجمع لهم أكلات صحيّة مفيدة لنظامهم الغذائي، يعني مثلاً ممكن جرانولا أو زبدة فول سوداني صحيّة من Fino's Nut Butters، أو مقرمشات من المكسرات والفاكهة أو مخبوزات صحيّة خالية من الجلوتين من عند سي سولت بيكري Sea Salt Bakery، المجموعة دي ممكن تكلفك من 200 لـ­ 500 جنيه، أو لو كانت ميزانيتك كويسة ممكن تختار عرض من عروض الاشتراك في الجيم اللي تبدأ من 500 جنيه.

 

عشاق السبا والمنتجعات الصحيّة

الحياة في كايرو كلها ضغوط عصبية ومشاكل، وأكيد مافيش حد فينا مش محتاج شوية دلع واهتمام كل وقت والثاني، فيه طرق لطيفة للهروب من القاهرة بزحمتها وإزعاجها وهي أنك تشتري بطاقات هدايا للمنتجعات الصحيّة في القاهرة، صحيح أسعار السبا ممكن تكون عالية شوية، سعر ساعة مساج ممكن يعمل حوالي 200 جنيه وأسعار الباقات تبدأ من 550 جنيه تشمل تنظيف وتقشير وتدليك وماسكات للبشرة.

 

الباحثون عن الراحة

تعتبر كتب التلوين للكبار من مضادات التوتر الممتازة وتعتبر من طرق العلاج المبتكرة للناس اللي بـ تدوّر على طريقة مبتكرة للاسترخاء، الهدية دي ممكن فعلاً تساعد أي شخص على الراحة والهدوء في أوقات الفراغ، أسعار كتب التلوين تبدأ من 140 جنيه وموجودة عند ديوان ومكتبات "أ" وفيرجين ميجا ستورز.

 

أهل التكنولوجيا

هدية صديقك التكنولوجي مش صعبة بعد النهارده، هـ نقول لك على مكانها وخلاص كلّه تمام، ممكن تختار هدية تقليدية وهي ملف تسلا أو لافا لامبlava lamp  -متوفرين في Odd Bits سيتي ستارز– أو لعب على شكل ممثلين أو شخصيات كارتونية منThe Fun Corner أو اتفرج على ألعاب Kryptonite Toys لو عاوز مجموعة رائعة من كتب الكوميكس أو ألعاب على شكل أبطال أفلام وغيرها.

 

كل تسوق وأنتم بخير وسنة سعيدة!