The Definitive Guide to Living in the Capital , Cairo , Egypt

جاهزين يا أهل القاهرة الكرام؟ دلوقت جاء وقت الشوبينج وتضبيط دولاب الصيفي، مع وصول تشكيلات ملابس الصيف لأرفف المحلات، إحنا عن نفسنا بدأنا نشيل حاجتنا القديمة ونبدأ رحلة البحث على حاجات جديدة.

مع وجوده في مركز تسوق القاهرة الجديدة بقى له فترة، واضح أن "سويت بلانكو – Suiteblanco" يعتبر بداية كويسة علشان نبدأ رحلتنا، مكان المحل في الدور الثالث، ويميزه إضاءة قوية ومساحة مناسبة، لا هي واسعة زيادة ولا صغيرة زيادة.

بشكل عام، لاحظنا أن مجموعة الصيف أنيقة ومريحة، وفي كل مكان من المحل بـ تشوف قطع عملية، الشكل السائد كان الألوان الفاتحة الخفيفة مع قطع ثانية ألوانها قوية أكثر للناس اللي عاوزة هدوم مطرقعة.

سويت بلانكو بـ يخصص قسم كامل للجينز، وفيه بـ يعرض قصّات وأشكال مختلفة، شوفنا عدد كبير من jeggings بدرجات ألوان متنوعة (229 جنيه) مع جينزات مقطعةripped boyfriend jeans (329 جنيه).

كمان من ضمن تشكيلة الصيف Tops عليها خياطة خفيفة، أكثر حاجة عجبتنا منهم كان Top أبيض (229 جنيه) وكيمونو كروشيه لونه كريمي (359 جنيه)، شد انتباهنا كمان فستان بطول الركبة عليه ورد ألوانه مشرقة (329 جنيه).

ندخل جوه المحل شوية لمكان عرض الإكسسوارات، واللي بـ يقدم مجموعة متنوعة من الأحذية وشنط اليد، بشكل عام، قسم الإكسسوارات ما عرفش يبهرنا، علشان معظم المعروض جودته متواضعة وتصميماته عادية جدًا. من الحاجات اللي شوفناها باليرينا فلات كروشيه برسومات ورد (199 جنيه)، صنادل بكعب عالي ألوانها فاتحة (359 جنيه) وشنط يد تقليدية بألون الأسود والبيج (299 جنيه).

الموظفين طوال وقت زيارتنا حافظوا على مسافة معينة، بحيث نقدر نلف في المكان براحتنا، أول لما بـ نحتاجهم بـ يكونوا معانا.

على العموم، سويت بلانكو بـ يعاني في منطقة الجودة والتصميمات، تحديدًا في قسم الإكسسوارات، والأكيد أنهم بـ يعوضوا النقص ده بقصات وتصميمات الملابس الجديدة. أكيد بـ ننصح بالمكان ده لكل اللي عاوز هدوم عملية بسيطة وما تدمرش الميزانية.