-
محل 17 دور B1
-
إكسسوارات
-
Nagla Ashraf
معروف في القاهرة أنك لو عاوز تكرم حد له مَعزة في قلبك بـ تجيب له هدية فضة، سواء ميدالية أو دلاية أو عقد وأنسيال، بس مش دائمًا بـ تلاقي حاجة حلوة شغلها متقن وحلو بسعر معقول في نفس الوقت، وده بالضبط اللي إحنا لقيناه في محل “سيلفر ستون – Silver Stone “،محل صغير في الجراند مول جنب كذا محل فضة ثانيين، بس الحقيقة أن شغله حلو جدًا.
أول ما بـ تدخل المحل بـ تلاحظ التنوع في الأذواق في كل حاجة، يعنى مثلًا الميداليات اللي كانت مُعلقة في صندوق زجاجي علشان تشوفها، فيها كل الأشكال والأحجام اللي أنت ممكن تحتاجها، زخرفة إسلامية وزخرفة عادية، ده غير أنك ممكن تطلب طلب خاص بك وتكتب جواها اللي أنت عاوزه. الميداليات سعرها بـ يبدأ من 250 جنيه لـ 400 جنيه وطبعًا على حسب حجمها والشغل اللي فيها.
كمان عنده تشكيلة عقود حلوة جدًا، عنده الأنسيال بتاعها والخاتم لو حابين تشتروا المجموعة كلها، سعر العقد بـ يبدأ من 480 جنيه.من أجمل العقود اللي شوفناها كان عقد فيه ثلاث دوائر فضة، كل دائرة مكتوب فيها كلمة بـ تكون جملة زي آيه: “فَاللّهُخَيْرٌحَافِظًاوَهُوَأَرْحَمُالرَّاحِمِينَ”، أو جملة “القلب يعشق كل جميل”، وممكن تطلب الجملة اللي تحبها والمحل يعملها لك.
وعنده تشكيلة أنسيال رقيقة جدًا، للي بـ يحب الشغل الهادي، وفيه غوايش فضة فيها أحجار كريمة، بـ يتراوح سعرها من أول 200: 290 جنيه.
أما الخواتم، فكانت عادية، فيه خواتم بأحجار كريمة وخواتم سادة، بس اللي عجبنا فيها جدًا الخواتم اللي كانت على شكل دائرة صغيرة ومكتوب جواها كلمة “مودة” أو “حب”، كمان الخواتم اللي على شكل فراشة، ومكتوب جواها كلمات مفرغة زي “الحمد لله” أو “الله أكبر”، وبـ تبدأ أسعارها من 60 لـ 200 جنيه.
أما الدلايات اللي بـ يعملها بـ تتميز بطابع عربي أصيل والحقيقة أن شغلها نظيف وممتع، وسعرها بـ يختلف طبعًا على حسب حجمها ونوع الشغل اللي فيها، بس اللي عجبتنا فيهم وسألنا عن سعرها كانت كبيرة ومزخرفة زخرفة إسلامية ما بين دوائر ومثلثات مقسمين تقسيم هندسي حلو قوي، وسعرها كان 350 جنيه.
طبعًا شراء الفضة أذواق زي أي حاجة الواحد بـ يشتريها، المهم لو بـ تشتري هدية لحد، فكر في أكثر حاجة هـ تناسبه ويفرح بها، دمتم في محبة وود.