The Definitive Guide to Living in the Capital , Cairo , Egypt

سيليني – Cellini

سيلليني: ملابس رجالي كلاسيكية إيطالية

  • محل رقم 255
  • ملابس رجالي
  • 0224802112
تم التقييم بواسطة
Waleed Abuarab
قيم
قيم الآن
سيلليني: ملابس رجالي كلاسيكية إيطالية

المحل مشهور من زمان، ورنين الاسم الطلياني ماتخيبوش الودان، وعمل لنفسه
سمعة محترمة كواحد من أحسن محلات الملابس الرجالي والبِدل والكرافتات في مصر، له
حوالي 10 فروع في القاهرة بس وكل فترة تفتح فروع زيادة، وده يدل على الإقبال
والنجاح اللي بـ يزيد يوم عن يوم.

في الدور الثالث في «سيتي ستارز» فيه فرع كبير لـ «سيلليني»، وعلى فكرة مش
أي محل يقدر ياخد المساحة اللي هو عايزها جوة «سيتي ستارز» لازم يكون محقق شعبية
أصلاً وإدارة المول توافق على المساحة المطلوبة أو ترفضها، يعني الموضوع مش فلوس
ومين يقدر يدفع أكتر وبس.

الإضاءة قوية والديكور بسيط ووقور عشان يليق على طابع المحل الرجالي
والكلاسيكي قوي، والمحل متقسم 3 أقسام، البِدل الكاملة على اليمين وانت داخل من
الباب والكاﭼوال على الشمال وفي وسط المحل وواجهته أرفف وستاندات عليها إكسسوارات
زي الأحزمة والكرافتات والشرابات.

الموظفين في المحل آخر شياكة، طبيعي وهم بـ يشتغلوا في مكان زي ده، كلهم
شباب طبعاً عشان المحل رجالي بس، هـ يقفوا قريبيين بس مش هـ يعرضوا المساعدة إلا
لو انت طلبت، ودي حاجة كويسة ومريحة نفسياً وانت بـ تتفرج.

الخامات ممتازة والتفصيلات حصرية لـ «سيلليني»، نتكلم عن الموديلات
والأسعار بقى، في قسم الكاﭼوال – وكاﭼوال المحل يعتبر “Semi Formal”برضه – هـ تلاقي ﭼـينز بألوانه الأساسية وخامته
سميكة وبسيط جداً ومافيهوش أي حركات أو قصات عجيبة، سعره 260 جنيه، وفيه البول
أوﭭر الصوف الخفيف اللي رقبته سبعة المشهور بيه المحل بكل الألوان والمقاسات وده
سعره 275 جنيه، والكاروهات منه كان سعره 370 جنيه.

فيه في قسم الكاﭼوال كام جزمة كده معروضين بالستايل الايطالي المعروف
بالبوز الرفيع وكلها لونها إسود وفيه منها لميع ودي كان سعرها 1000 جنيه! كتير مش
كده؟ بس كان مكتوب عليها “صنع في ايطاليا” فـ ممكن نعذرهم.

فيه ﭼواكت جلد طبيعي شيك جداً –زي أي حاجة في المحل – سعرها 1000 جنيه بس
دي فعلاً تستاهل، بس الغريبة بقى أن كان فيه بالطوهات صوف طويلة وكان سعرها 600
جنيه بس! في حين أنها كان المفروض تبقى أغلى من كده.

البدلة عند «سيلليني» تقريباً ليها شكل واحد، ممكن تلاقي درجات ألوان كتيرة
من الغوامق بس القصات هي هي، ودي ميزة مش عيب عشان ده محافظ للمحل على شخصيته،
اللي هـ نفضل نقول قد إيه هي وقورة لحد آخر المقال. البدلة أسعارها من 2000 لـ
3000 جنيه لأن في إختلافات بسيطة في التصميمات بس الطابع العام واحد، وكلها
تفصيلات إيطالية إنتشرت مؤخراً بـ 2 زرار بس من قدام وبـ تكون مظبوطة قوي على
الجسم أو Slim Fit.

فيه ركن خاص لبدل السهرة والزفاف والتاكسيدو، دي بقى تصميماتها عبقرية
ولمعة الساتان فيها جميلة ورقيقة وسعرها كان 2100 جنيه، صحيح هـ تتلبس في مناسبات
قليلة قوي أو ممكن تتلبس مرة واحدة في العمر في ليلة الزفاف، بس أناقتها تخليك مش
فارق معاك الفلوس اللي هـ تدفعها.

فيه رف عليه بنطالونات جبردين بكل الألوان بس المميز منها اللون الكاكي
والبيـﭺ وتفصيلته Straight وخامته متينة وسعره 195 جنيه، مش
بطال، وفيه البولو شيرت القطن الشهير اللي موجود طول الوقت من السنة.

تشكيلة كبيرة قوي من الكرافتات بكل الموديلات
والأحزمة الجلد (160 جنيه الحزام) والبابيونات والقمصان الكلاسيك السادة والمقلمة
والشرابات، يعني نقدر نقول دي جنة أي رجل إتعود يلبس كلاسيك أو لبس محترم مافيهوش
تقاليع.

ليه زباينه المخلصين اللي بـ يتابعه آخر خطوط
الموضة في الملابس الكلاسيك الرجالي من خلاله، وعلى كل رجل أن يفخر بأن عنده حاجة
من «سيلليني».

نصيحة 360

لوعايز تعمل دعم لدولابك باللبس الكلاسيك الشيك عشان الشغل بتاعك محتاج ده، إملا محفظتك وروح على «سيلليني».

أحسن حاجة

فروعه في كل حتة، والتشكيلات عنده متنوعة جداً.

أسوأ حاجة

أسعار حاجات معينة ممكن تكون مش منطقية.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح