The Definitive Guide to Living in the Capital , Cairo , Egypt

تسوق
صلاح الدين

صلاح الدين: أجهزة منزلية وديكورات وتحف في ميدان الجيزة

تم التقييم بواسطة
Waleed Abuarab
قيم
قيم الآن
صلاح الدين: أجهزة منزلية وديكورات وتحف في ميدان الجيزة

لو كنت بـ تعدي من وقت للثاني على ميدان الجيزة يبقى أكيد هـ تبقى عارفه، “صلاح الدين حبيب الملايين” من أكبر وأشهر محلات الأدوات المنزلية والأثاث والديكورات في الميدان العريق، محل «صلاح الدين» من أقدم المحلات في المنطقة، وكاتب جملة “حبيب الملايين” على اللافتات الرئيسية للمحل، وواضح أنها من أسباب شهرة المحل لأنه معتز بها جدًا ومكررها على كل الجدران واليفط.

سهل أنك تعرف ليه صلاح الدين ممكن يبقى حبيب الملايين بمجرد ما تقرب من فاترينة العرض الخارجي وتقرأ الأسعار على كل المعروضات، أسعار خارج المنافسة لكل قطع الأثاث والحليات والديكور والتحف، يمكن اللي أسعارها كانت منطقية شوية كانت الأجهزة الكهربائية والمنزلية لأن دي أسعارها معروفة، لكن المحل ده أكيد بـ يبقى وجهة ناس كثير من سكان الجيزة أو المناطق القريبة منها أول ما يفكروا يجهزوا شقة أو يضيفوا شوية ديكورات للمكان اللي عايشين فيه.

المحل مساحته كبيرة من الداخل، بـ يفكرنا شوية بتقسيمة محلات “التوحيد والنور” مع الفارق أنه هنا مكون من طابق واحد أرضي، واخد ناصية كبيرة في قلب الميدان بجوار محل “الغليون” المشهور للملابس الحريمي، واليافطة مكتوب عليها بخط رقعة زي محلات عمر أفندي وصيدناوي زمان، والفاترينة مقسمة للأجزاء بـ تعرض كل حاجة لوحدها. جزء للتحف والأنتيكات وجزء للموبيليا والمرايات وجزء للأجهزة الكهربائية المنزلية وجزء لساعات اليد والأجهزة الكهربائية الخفيفة والصغيرة.

نبدأ بالأثاث هو في رأينا أكثر حاجة مميزة بـ يعرضها المحل، فيه مكاتب مذاكرة وكمبيوتر (400 جنيه) وترابيزات تليفزيون (300 جنيه) وفيه زي كونسول صغير باللون الذهبي والبني المحروق (130 جنيه) عجبنا جدًا شكله وسعره طبعًا، علشان الحاجات دي عادة بـ تبقى أغلى من كده ده لو لقيتها بشكل منفرد أصلًا. فيه مكتبات حائط (350 جنيه) ومرايات طولية مناسبة لمداخل الشقق والمحلات بأسعار من 120 لـ 200 جنيه. معترفين أن الشياكة مش قد كده في كل المعروضات، ولا حتى جودة التقفيل هي الأفضل، لكن بالنسبة للأسعار دي، الموضوع معقول جدًا، لأن أنت هنا هـ تدور على حاجات ناقصاك مش المفروض تفرش بيتك بالكامل مثلًا.

غسالات وبوتاجازات وثلاجات، وخلاطات ماركة مولينيكس العريقة وشفاطات وغلايات وسخانات ومراوح بكل الأشكال والأنواع، وعدد مهول من اللوحات والتابلوهات والتماثيل بأحجام كبيرة ومتوسطة وصغيرة، مصنوعة من النحاس والخشب، وساعات حائط وفازات فخار وصيني بأسعار من 50 لـ 100 جنيه. فاترينة ساعات اليد فيها موديلات حريمي ورجالي ظريفة، لكن ماركات مش معروفة أو تقليد لماركات عالمية، وأسعار من أول 50 لحد 500 جنيه، وفيها بجانب الساعات موديلات مختلفة من الريسيفر والسيشوار وماكينات الحلاقة، عشوائية شوية، بس هو المحل فعلًا بـ يبيع حاجات مالهاش علاقة ببعض كثير، ويمكن ده سبب ثاني أنه يبقى “حبيب الملايين” علشان أكيد هـ يلاقوا عنده حاجات هم محتاجينها وناسينها جنب الحاجات اللي هم أصلًا رايحين يشتروها، تقريبًا ده فكرة إدارة المحل، لأننا لما دخلنا جوه المكان حسينا أن فيه عشوائية مقصودة في توزيع البضائع والمعروضات، بس مافيش حاجة مالهاش لازمة، كأنك في مول شعبي صغير، وشعبي هنا مرتبطة أكثر بالأسعار.

اعمل زيارة للمحل ده بلا أي هدف، وهـ تلاقي نفسك عاوز تشتري شوية حاجات ما كانتش تخطر على بالك، وما تترددش تسأل الموظف اللي معاك جوه عن أي حاجة، هم متعاونين وذوق بما فيه الكفاية.

نصيحة 360

«صلاح الدين» بـ يوصل أي حاجة تشتريها بعربيات تبع المحل، بس كله بحسابه طبعًا.

أحسن حاجة

موضوع "حبيب الملايين" ده!

أسوأ حاجة

بعض قطع الأثاث تقفيلها ردئ.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح