The Definitive Guide to Living in the Capital , Cairo , Egypt

فينتاج بوتيك – Vintage Boutique

فينتاج بوتيك: محل جديد لكل المهووسين بالموضة في الزمالك

تم التقييم بواسطة
Dina Mokhtar
قيم
قيم الآن
فينتاج بوتيك: محل جديد لكل المهووسين بالموضة في الزمالك

فيه مقالات قبل كده قلنا أن بالرغم من كم المحلات الموجودة في الزمالك، نسبة المحلات اللي بـ تبيع ملابس قليلة جدًا بالمقارنة للمطاعم والكافيهات، وحتى المحلات الموجودة أغلبيتها بـ تبيع أي حاجة ثانية غير الملابس من أول لوحات فنية، ورد حتى الكتب. في خلال الكام شهر اللي فاتوا دول فتح كذا مكان بـ يبيع ملابس حريمي؛ منهم فينتاج بوتيكVintage Boutique في شارع الجزيرة الوسطى بالزمالك.

البوتيك ده بـ يختلف عن معظم محلات الملابس الحريمي اللي صادفناها قبل كده سواء باهتمامه بشكله الخارجي، واللي عبارة عن واجهة زجاجية محاطة ببانوهات بيضاء طابعها عتيق زي اسم المحل، أما من الداخل ففيه اهتمام بتفاصيل الديكور ولكن ببساطة مميزة ما تلفتش نظر أي واحدة بعيد عن مهمتها المقدسة وهي التسوق.

أول مجموعة لاقيناها كانت عبارة عن Cardigans بنصف كم، قماشتهم خفيفة ومخرمة (250 جنيه)، وألوانهم الأحمر والأزرق. ممكن يتلبس تحتهم أي تي شيرت بسيط. بما أننا في الصيف، معروض عدد من التي شيرتات القطنية بأشكال وموديلات مختلفة منهم واحدة لونها فوشيا بدون أكمام في ظهرها فتحات على طول الظهر (400 جنيه)، ومن نفس الستايل تي شيرت بيضاء بنصف كم عليها قلب؛ الأكمام عليها نفس الفتحات، أما القلب المطبوع على صدر التي شيرت فشكله زي القفص الصدري (300 جنيه).

من ضمن المعروضات اللي عجبتنا جدًا، كانت مجموعة من الكيمونو، وهو موضة من السنة اللي فاتت، بـ يبقى عبارة عن كارديجان طويل من قماش خفيف زي الشيفون مثلًا، وعادة بـ يكون منقوش، من غير أزرار، وله شراشيب في طرفه، من ضمنهم معروض واحد بيج برسومات هندسية بالأسود سعره (350 جنيه). فينتاج بوتيك كمان عنده كم هائل من البنطلونات الجينز، بجميع أشكالها وألوانها.

فينتاج بوتيك بـ يعرض إكسسورات لعدد من المصممين المشهورين في عالم الموضة في مصر زي مجموعة الغوايش الملونة المصنوعة من الخرز واللي معلق فيها دلايات معدنية مزخرفة (20 جنيه للواحدة) من Miral’s Designs، ومجموعة ثانية من العقود للمصممة سارة بشير واللي ممزوج فيهم بين التراث وموتيفاته والتصميمات العالمية.  وبما أن الخواتم الكبيرة موضة، كان فيه مجموعة كبيرة منهم مرصعين بالكريستالات الملونة.

بجانب كل ده، فيه كمان مجموعة من الأحذية والشنط المعروضة، واللي بـ تناسب كل الأوقات سواء كاجوال أو سهرة أو حتى ملابس رسمية. نازلة السنة دي موضة القماش الـ Hologram. وهو عبارة عن قماش لامع بيضوي ألوان كثيرة زاهية لما النور بـ ييجي عليه. من الستايل ده فيه مجموعة كبيرة من الشنط الـ Backpacks المتوسطة (500 جنيه)، والصنادل والـ Wedges الرياضية، نوع الأحذية الأخير ده متوفر منه أشكال وأنواع كثيرة منها واحد هولوجرام في أسود وقطع معدنية سعره 1300 جنيه.

فيه كمان مجموعة كبيرة من فساتين الكوكتيل والسهرة، ومنهم كمان للأطفال، كم المعروضات كبير، وبجانب أن الأسعار تعتبر غالية لحد كبير، عيب البوتيكات دي أن المعروضات والمقاسات مش كلها بـ تبقى متوفرة طوال الوقت. لو بـ تحبي الموضة نعتقد أنك هـ تحبي فينتاج بوتيك.

نصيحة 360

تابع صفحتهم على الأنستجرام، عليها كل الجديد.

أحسن حاجة

المعروضات متبعة أحدث صيحات الموضة.

أسوأ حاجة

الأسعار والمقاسات... مبالغ في الأولى، والثانية مش موجودة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح