The Definitive Guide to Living in the Capital , Cairo , Egypt

طبعًا كلنا بـ نحب نستنصح ونعمل فيها "بُرم"، مهما كانت حالتنا الاجتماعية بـ نبقى فرحانين أوي وإحنا بـ نقول "أنا جيبت الجهاز الفلاني بأقل سعر ممكن ووفرت فيه كذا"، قال يعني جبنا الديب من ديله، وطبعًا أكثر مكان ممكن نمارس فيه حالة الاستنصاح دي هو "شارع عبد العزيز" في العتبة، حيث عشرات المحلات على الصفين بـ تبيع كل أنواع الأجهزة الكهربائية.

نحب نقول لكم: "ما يقع إلا الشاطر"، ونحب نقول لكم كمان أن شارع عبد العزيز هو أكثر مكان ممكن يتضحك عليك فيه وبشكل مبالغوتحس كأنك اتنصب عليك لما تسأل عن سعر نفس الجهاز في مول كبير، أو مكان موثوق مافيهوش لا فصال ولا خد وهات، طبعًا ده مش معناه أن شارع عبد العزيز وحش، لكن الحقيقة المُرة أنه شارع عاوز الناصح اللي بجد، مش اللي بـ يستنصح والفرق كبير على فكرة.

إحنا بقى كان لنا شوية تجارب زي الفل في الشارع ده، وبصراحة ماحبيناش نخرج بها كده من غير ما نقول لكم عليها، علشان أنتم حبايبنا برضه.

في السطور الجاية هـ تشوفوا أبرز عشر قواعد تقدروا من خلالها تتعاملوا مع هذا الشارع الأسطوري، طبعًا كلنا شوفنا المسلسل الشهير "شارع عبد العزيز" واللي خوف ناس كثير منه على أساس أن أهل الشارع بـ يبيعوا أجهزة بايظة على أنها جديدة، في الحقيقة تجربتنا هناك ما كانتش مع أجهزة بايظة، يبدو أن دي أسطورة حاول المسلسل أنه يخلقها حول الشارع، الحقيقة المُرة هـ تعرفوها في السطور الجاية لذلك خلوا بالكم وخليكم صاحيين.

ملحوظة: الغالبية العظمى من البياعين كده علشان ما نعممش.

 

القاعدة الأولى: إياك تروح وراء سمسار

من قبل ما تدخل الشارع ولحد ما توصل لآخره هـ يقابلك عشرات البشر اللي هـ يلزقوا فيك زي البعوض، ويبتدوا يسألوك أسئلة مختلفة: "هـ تبيع الموبايل"، "عاوز جهاز كهربائي"، "بـ تسأل على إيه".. وهكذا، سواء رديت أو ما رديتش مش هـ يسيبوك، وهـ تحس بإحساس سخيف جدًا ودي أول مرحلة من مراحل "كلفتة الزبون"، بـ تحاول تهرب منه بأي طريقة لحد ما تنجح فـ تروح داخل على اللي بعده.

إياك ثم إياك ترد عليهم أو تستجيب، لأن ده سمسار، وبـ يأخدك يكلفتك في المحل اللي هو تبعه وبـ يأخذ عليك عمولة، أنت اللي بـ تدفعها فوق ثمن الجهاز وما بـ تقدرش تفلفص لأنه غالبًا بـ يحاوطك هو وأصحاب المحل اللي أنت رايحه، وبـ يقنعوك من خلال كورال جماعي عن قد إيه المنتج حلو ورائع، وأنت قد إيه ناصح وذكي أنك وصلت لهم دونًا عن غيرهم!

 

القاعدة الثانية:

إياك تسمع كلام البياع لما يقول لك:"اتفضل هـ اجيبلك كل اللي أنت عاوزه، وخصوصًا لو قال لك: "هو مش عندي بس هـ ابعت أجيبهلك"، انفذ بجلدك واطلع اجري مباشرة لأنه كده واخد البضاعة من محل جنبه، وبـ يصرفها لهم، حتى لو مش هـ يأخذ نسبة، فأنت فرصتك في الحصول على سعر قليل اتعدمت.

 

القاعدة الثالثة: انزل مرتين ثلاثة

إياك تشتري من عبد العزيز من أول مرة تنزل، هـ تتخم يعني هـ تتخم، لازم تنزله مرتين ثلاثة لو معدي يعني، واسأل كل المحلات علشان تعرف الأسعار والأنواع واسمع ترشيحاتهم  واستوعب كل ده علشان تعرف الدنيا ماشية إزاي.

 

القاعدة الرابعة: اسأل المحل نفسه مرتين، صدقونا هـ يغيروا كلامهم

هـ تستغربوا أوي لما تلاقوا أنكم بـ تسألوا على سعر المنتج في نفس المحل مرتين في يومين، وتلاقوا السعر مختلف تمامًا، طبعًا لو غلطت وقلتله: "ما أنت قايل إمبارح كذا"، هـ تلاقي قائمة طويلة عريضة من الأسباب المنطقية وغير المنطقية اللي هـ تصدعك.

 

القاعدة الخامسة: ورقة وقلم

خدوا معاكم ورقة وقلم، واكتبوا الأسعار وأسماء المحلات اللي تستقروا عليها وتحبوا تشتروا منها، والأرقام اللي بـ يقولوا لكم عليها علشان لما يرجعوا يغيروا كلامهم تبقوا متأكدين من نفسكم ومايقدروش يشككوكم في نفسكم.

 

القاعدة السادسة: السعر اللي يتقال لك نزل منه 300 جنيه على الأقل

الكلام ده طبعًا للأجهزة الكبيرة، لأنهم غالبًا بـيكونوا مزودين على ثمنها رقم كبير، لو دفعته خير وبركة، ما دفعتوش هـ يأخذ منك هامش ربح أكبر من الطبيعي برضه، المهم أنك لما يقول لك رقم وتنزل 300 هـ يفضل ينازع ويماطل، وفي النهاية هـ يسيب لك منهم 150 وأنت قال يعني هـ تتنازل عن 150 جنيه وبكده توصلوا لـ "نص البلد" و"تمسكوا العصاية من النص" وتخرجوا أنتم الاثنين، أنت حاسس أنك منتصر وهو بايع الجهاز بالسعر اللي مريحه.

 

القاعدة السابعة: ما حدش كلمته واحدة ولا نهائية

هـ تلاقي في السوق بقى محلات أصحابها، قال يعني بقى كلمتهم واحدة ونهائية ويحسسك لو فاصلت أنك كائن غريب، دي ناس شبعانة سيبك منها، بـ يكونوا في أماكن ظاهرة وسهلة الوصول، ومش محتاجين لا يخفضوا ولا يوجعوا قلبهم بـ يقولوا السعر اشتريت كان بها ما اشتريتش مش مشكلة، لو قال لك "أنا كلمتي واحدة" اعرف أنها مجرد أسطورة مش أكثر.

 

القاعدة الثامنة: إياك تسأل عن سعر الجهاز بعد ما تشتريه

بياعين عبد العزيز عندهم حاسة سوق بـ يقدروا يفرقوا بها بين اللي اشترى واللي لسه ما اشتراش، شكلك بـ يبقى باين، وساعتها لازم يقول لك سعر قليل كده، علشان يحسرك ويحسسك أنك اختارت غلط، نصيحتنا لك ما دام اشتريت، خد حاجتك وروح وما تسألش أبدًا محل ثاني عن سعر المنتج اللي اشتريته.

 

القاعدة التاسعة: بـ يعرفوا يقرأوا وشك.. انتبه

البياعين في الشارع ده مخضرمين فعلاً، لما تتكلم كلمتين بس بـ يعرفوا يقرأوك، مستواك الاجتماعي، وشك، طبعك، كل حاجة وعليه بـ يحددوا السعر اللي هـ يقولوهلك، ويا سلام لو جايلهم مع سمسار، ساعتها بـ تبقى "زبون" على حق.

إياك تقعد داخل المحل لأى سبب، لأن ده معناه برضه أنك "زبون" وبـ يتضحك عليك بالبطئ، وشوية القعدة اللي هـ تقعدهم هـ تدفع ثمنهم عشرات وميات.

إياك كمان تسمع لتاجر بـ يقول لكأنك غلبته، لو قال لك كده يبقى غالبًا هو اللي غلبك وبالقوي كمان، مافيش تاجر بـ يخرج من بيعة مغلوب، اوعى تحس بالذنب.

وخد بالك أن أشهر كام كلمة هـ تسمعها وأنت مع البياع "السوق نايم" ، "الأسعار غليت"، "السعر بـ يتغير بين يوم وليلة"، "أنا لسه بـ استفتح بك"، "الدنيا خربانة والحال واقف"… كله هجص علشان يحسسك بنهاية الكون وتدفع وتمشي علشان تنجو بروحك من الهري، طول بالك وما تسمعلوش.

 

القاعدة العاشرة: النقل والمواصلات

هناك على قفا من يشيل، فاصل براحتك في ثمن المشوار، وما تخليش السواق يحسسك أنه تنازل علشان هـ يوصل لك، دي طريقة بايخة بـ يستخدموها لما ما يعرفوش يضحكوا عليك، هم هناك كثير جدًا، لو ضايقك سيبه وشوف غيره.