The Definitive Guide to Living in the Capital , Cairo , Egypt

كاربت سيتي – Carpet City

كاربت سيتي: مساحة واسعة واختيارات متنوعة وأسعار مختلفة في العجوزة

  • 101 شارع عبد المنعم رياض – العجوزة
  • أثاث ومستلزمات منزل
  • 33447723,33447722
تم التقييم بواسطة
Cairo 360
قيم
قيم الآن
كاربت سيتي: مساحة واسعة واختيارات متنوعة وأسعار مختلفة في العجوزة

“محمود إيه ده يا محمود؟.. ده كاربت سيتي يا جميلة!”.. مين فاكر الإعلان ده؟ كان بـ ييجي زمان، لكن بطل ييجي وكاربت سيتي بطلت تعمل إعلانات عن نفسها لحد ما ناس كثير نسيتهم والبعض بقى يفتكرهم بـ يبيعوا سجاد بس، في مرة كنا جنب واحدة من فروعهم الكبيرة في منطقة العجوزة، فـ عدينا عليه، وأخذنا وقت كبير قبل ما نربط بين المبنى الضخم ده، والإعلان الأثري اللي كنا بـ نتفرج عليه دائمًا واللي ارتبط في ذهن المصريين باسم محمود!

المدخل كان ضخم جدًا، والمبنى كبير فعلاً، لكن حسينا لوهلة من بره أنه مهجور، مش علشان مافيش بضاعة، لكن علشان الشكل كئيب شوية من بره، الإضاءة مش قوية زي الداخل، ومافيش زبائن كثير يليقوا بحجم المكان، دخلنا الدور الأرضي كان كله مفروشات،  وسجاد، وكذلك الأدوار اللي بعد كده، السجاد كان حلو، وكمان الموكيت، وإمكانية تصميم السجادة بالألوان والأشكال اللي الزبون يطلبها، في الدورين الأخيرين فوجئنا أن فيه أثاث كمان، غرف نوم، وسفرة وأنتريهات، كانت ذوقها ظريف مقارنة بحاجات كثير كنا بـ نشوفها، لكن اتصدمنا في الأسعار تمامًا، كاربت سيتي غالي فعلاً.

عجبتنا أكثر من حاجة، كنا بـ نجيب سجادة بالطلب، كان سعرها زي أي سجادة في النساجون الشرقيون، تقريبًا 900 جنيه، بالأبعاد والحجم اللي عاوزينه، لكن الفرق أن ألوانها على ذوقنا، بعد ما خلصنا حبينا نتفرج شوية على الأثاث لكن فوجئنا بالأرقام الكبيرة، صحيح كاربت سيتي أسعار السجاد عنده وخاماته قوية وقريبة من النساجون الشرقيون، لكن اللي مش معقول أبدًا، ولا قريب من أي حاجة ثانية هي أسعار العفش.

غرف السفرة فوق الـ 20 ألف جنيه بكثير وبـ توصل لـ 30 ألف، والأنتريهات في حدود 15 ألف وأكثر، وغرف النوم في الثلاثينيات، رغم أنه إنتاجهم يعني المفروض تكون أسعاره أقل، لكن حسينا أنهم مبالغين جدًا في الأسعار، لأنها مش بعيد عن كثير من الأثاث المعروض بنفس الجودة في أماكن ثانية…صحيح فيه نظام للتقسيط لكن الأسعار تخلي أي اثنين عرسان في مقتبل حياتهم يخافوا يقربوا!

عجبتنا الأذواق والمجهود، العمال اللي موجودين قلبهم على الزبون وعاوزين يفرجوه ويبيعوا لكن بطريقة لطيفة مش منفرة، على الموقع الإلكتروني لكاربت سيتيمكتوب أن عندهم 8 فروع: في العجوزة، والمعادي، ومدينة نصر، والهرم، وجناكليس، رمارا، السويس، وبورسعيد، اسم كاربت سيتي كبير فعلاً، وشغلهم محدد، الشركة بدأت سنة 1985، بـ تعتبر نفسها المكان الوحيد اللي بـ يضم تحت سقفه خمس مجموعات من المنتجات المختلفة: سجاد يدوى وميكانيكى، وموكيت وفينيل، وموبيليا، ومفروشات، وأقمشة، ووبريات.

الشركة واضعة لنفسهاهدف أنها تتوسع إقليميًا، لكن لو كان لنا أننا نقول لهم حاجة، هـ نقول اهتموا بالتسويق شوية، وبمحاولة تخفيض الأسعار، خلوها معقولة علشان تبيعوا أكثر لأن شغلكم حلو ومتقن وحرام يفضل قاعد من غير بيع، أما السجاد وجودته فدي حاجة مافيهاش كلام، لما أخذنا رأي بعض المقربين لنا يختاروا كاربت سيتي ولا النساجون قالوا من غير كلام: “كاربت سيتي طبعًا”.

نصيحة 360

لو عاوزين سجاد محترم عمولة أو عادي، وتلاقوا خامات محترمة وتركيز أكبر على المحتوى مش على الشكل عليكم وعلى "كاربت سيتي".

أحسن حاجة

المساحة الواسعة والقدرة على الاختيار بين حاجات كثير معروضة، وإمكانية تفصيل السجاد على المقاس بالضبط وبالألوان المرغوبة.

أسوأ حاجة

الأسعار العالية قوي للأثاث.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح